Kicukiro: Hagaragajwe umuryango utekanye uwo ari wo
Imibereho

Kicukiro: Hagaragajwe umuryango utekanye uwo ari wo

Imvaho Nshya

July 17, 2023

Ku bufatanye n’ubuyobozi bw’Umurenge wa Kicukiro mu Karere ka Kicukiro mu Mujyi wa Kigali, ubuyobozi bw’Itorero ‘Eglise Methodiste Libre au Rwanda (EMLR)’ bwatangije ubukangurambaga bwo gusezeranya imiryango yabanaga bitemewe n’amategeko.

Mu kwezi gushize ni bwo imiryango 12 yasezeranye imbere y’amategeko binyuze mu bukangurambaga bwatangijwe n’itorero EMLR.

Ni mu gihe mu mpera z’iki cyumweru ku wa Gatandatu tariki 15 Nyakanga 2023 imiryango 11 muri 12 yasezeranye imbere y’Imana.

Urugendo rwo gusezerana kuri iyi miryango rwatangijwe n’ubukangurambaga Itorero EMLR ryakoze mu bayoboke baryo bari bafite ikibazo cyo kubana batarasezeranye.

Rév Ndagijimana Jean Baptiste, Umushumba w’Itorero Methodiste Paruwasi ya Kicukiro, avuga ko bamaze iminsi mu gikorwa cy’ubukangurambaga mu rwego rwo gukangurira imiryango ibana itarasezeranye mu buryo bwemewe n’amategeko kugira ngo isezerane.

Asobanura ko muri ubwo bukangurambaga bwakozwe, hari imiryango 11 yasezeranye kubana akaramata imbere y’Imana.

Iyi miryango yasezeranijwe nyuma yo kubahiriza ibyo isabwa birimo kuba yarabanje kunyura mu Murenge.

Yagize ati: “Icya mbere umuryango utekanye kuri twe ni umuryango ubanye mu buryo bwubahirije ibyo amategeko asaba ndetse n’ibyo itorero risaba kuko iyo umuryango ubana utubahirije gahunda z’itorero hari inzitizi baba bafite.

Mu bukangurambaga dukora ni ukugira ngo basoze ibyo gukiranuka babane nk’umugabo n’umugore bubahirije ibyo itorero ndetse bagire n’uburenganzira bwo kujya ku igaburo ryera”.

Muri uyu mwaka itorero Methodiste ni ryo ryabimburiye andi matorero rikaba ryashyingiye imiryango 11.

Mukandahiro Hydayat, Umunyamabanga Nshingwabikorwa w’Umurenge wa Kicukiro, ahamya ko bakora ubukangurambaga bityo bagashyingira imiryango itari isanzwe ibana mu buryo bwemewe n’amategeko”.

Yabwiye Imvaho Nshya ko ubu bukangurambaga buri muri gahunda yari yarashyizweho n’Akarere ka Kicukiro izwi ‘Akaramata’.

Amatorero yajyanyemo n’ubuyobozi bw’Umurenge abufasha gukora ubukangurambaga.

Mukandahiro yagize ati: “Icyo bidufasha nuko iyo umuryango ubanye utarasezeranye ntabwo uba utekanye, iyo rero umuryango ubanye usezeranye haba hari icyizere, abantu barakora ariko ntibatere imbere. Iyo hari icyizere usanga nta makimbirane akunda kuba mu muryango”.

Mukandahiro Hydayat, Umunyamabanga Nshingwabikorwa w’Umurenge wa Kicukiro

Ubuyobozi bw’Umurenge wa Kicukiro bushimangira ko iyo abantu babana batarasezeranye, umwe muri bo ahorana icyizere gicye cyangwa urwikekwe.

Umugore ahora atekereza ko umugabo azazana undi mugore n’umugabo agahora atekereza ko umugore ashobora kumucika akajya gushaka undi mugabo.

Ati: “Ibyo bituma akenshi iyo hari akantu gato kabaye mu muryango, umugore avuga ngo n’ubundi si ndi umugore wawe mu buryo bwemewe n’amategeko, umugabo na we akavuga atyo, iyo hari abana ugasanga ntibitaweho akenshi abashakanye ntibaba batuje”.

Tuyisenge Samuel, umwe mu basezeranye, yabwiye Imvaho Nshya ko bateganyaga gusezerana ariko ubuyobozi bw’itorero bubishyiramo imbaraga.

Avuga ko amaze imyaka 7 abana n’umugore ku buryo butemewe n’amategeko.

Ati: “Ubu ni umunezero mu muryango wacu kuko twasezeranye imbere y’amategeko, itorero naryo rikaba ridusezeranije imbere y’Imana”.

Avuga ko yari afite imiziro yo kutajya ku igaburo ryera kuko ngo yafatwaga nk’umuntu washatse gipagani.

Nyiraneza Ernestine na we wabanaga n’umugabo we ku buryo butemewe n’amategeko avuga ko asaba Imana gukomeza gukunda n’uwo bashakanye.

Agaragaza ko icyiza cyo kuba yarasezeranye mu buryo bwemewe n’amategeko, hari icyo bivuze ku iterambere ry’umuryango.

Ati: “Tutarasezerana nabonaga nta cyizere mfite ku mutungo wacu, ikindi nuko iyo mutasezeranye nta bubasha umwe mu bashakanye aba afite ku mutungo”.

Bashishikariza imiryango ibana ku buryo butemewe n’amategeko gusezerana kugira ngo bakomeze babane neza ntakwishishanya.

Umwaka wa 2021- 2022, umurenge wa Kicukiro wasezeranije imiryango 50 yabanaga ku buryo butemewe n’amategeko.

Umwaka wakurikiyeho ubuyobozi bw’Umurenge bwasezeranije imiryango 40. Ni mu gihe ukwezi gushize hasezeranye imiryango 12 ku bufatanye n’Itorero rya EMLR, yabanaga bitemewe n’amategeko.

Rév Ndagijimana Jean Baptiste, Umushumba w’Itorero Methodiste Paruwasi ya Kicukiro

Yanditswe na KAYITARE JEAN Paul

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA