Kicukiro: Hasojwe amahugurwa y’abanyerondo basabwa gukora kinyamwuga (Amafoto)
Ubutabera

Kicukiro: Hasojwe amahugurwa y’abanyerondo basabwa gukora kinyamwuga (Amafoto)

Imvaho Nshya

July 15, 2023

Kuri uyu wa Gatanu taliki 14 Nyakanga 2023 mu Mujyi wa Kigali mu Karere ka Kicukiro mu Murenge wa Masaka hasojwe amahugurwa y’abakora Irondo ry’umwuga 195. Ubuyobozi bw’Akarere bwabasabye gukora kinyamwuga.

Murenzi Donatien, Umuyobozi ushinzwe imirimo rusange mu Karere ka Kicukiro yasabye abagize irondo ry’umwuga gukora kinyamwuga

Amahugurwa yamaze iminsi Itatu, yaberaga mu ishuri rya East African Christian College (EACC) riherereye mu Murenge wa Masaka.

Murenzi Donatien, Umuyobozi w’Imirimo rusange mu Karere ka Kicukiro yashimye igikorwa cy’indashyikirwa cyo guhugura abagize Irondo ry’umwuga cyakozwe n’abaturage ubwabo.

Yagize ati “Turashima igikorwa cy’Indashyikirwa abaturage b’umurenge wa Masaka bikoreye. Abagize irondo ry’Umwuga turabasaba gukora akazi kanyu kinyamwuga no gucunga umutekano w’abaturage”.  

Abagize Irondo ry’Umwuga bishimiye amahugurwa bateguriwe, bavuga ko bizeye kuzakuramo impamba ihagije izabafasha mu kazi kabo ka buri munsi.

Gatera John, umwe mu banyerendo basoje amahugurwa ukorera mu Kagari ka Cyimo mu Mudugudu wa Kabeza, yabwiye Imvaho Nshya ko bigishijwe amasomo azabafasha kudasobanya mu nshingano zabo.

Yagize ati “Twigishijwe ibintu bitandukanye bizadufasha kudasobanya mu kazi kacu.

Twatojwe kumenya inshingano zacu za buri munsi ariko tukirinda icyateza ibyaha ahubwo tugahashya abanyabyaha”.

Gatera ahamya ko bazarushaho gukorana neza n’abaturage kuko ngo ni bo babahemba.

Ati “Tuzakorana neza n’abaturage dutangira amakuru ku gihe ahari ikibazo cyabangamira abaturage kugira ngo n’izindi nzego dufatanya zihutire gukumira icyaha kitaraba”.

Yavuze kandi ko bagiye kurushaho kugira uruhare mu kwicungira umutekano bafatanyamo n’abandi baturage batuye mu Mudugudu.

Yasabye abaturage kwirindira umutekano mbere yuko bawurindirwa n’abandi.

Abanyerondo 195 bahuguwe mu minsi itatu bahawe ibiganiro bitandukanye

Nduwayezu Alfred, Umunyamabanga Nshingwabikorwa w’Umurenge wa Masaka, agaragaza ko bimwe mu bikorwa byakozwe mu gihe cy’amahugurwa, bahawe inyigisho zo kudasobanya (Parade).

Avuga ko abagize irondo ry’umwuga bahawe ikiganiro ku nshingano z’umunyerondo mu gucunga umutekano, cyatanzwe n’umuyobozi wa Polisi mu Karere ka Kicukiro, SSP John Niyibizi na na Lt. Col. Aimable Rukundo

Baganirijwe ku kubahiriza amategeko nk’inshingano z’irondo ry’umwuga, ikiganiro bahawe n’Umuyobozi w’Urwego rw’Ubugenzacyaha mu Karere ka Gasabo DCI Jean Bosco Dusabe.

Lt. Col. Jean Bosco Muhizi yatanze ikiganiro ku nshingano z’umunyerondo mu kazi.

Umuhango wo gusoza amahugurwa y’abanyerondo witabiriwe n’inzego zitandukanye zirimo Umuyobozi w’Imirimo rusange mu Karere ka Kicukiro, Lt Col. Frank Rwabugande ushinzwe guhuza abaturage n’ingabo.

Wanitabiriwe kandi n’umuyobozi w’inkeragutabara mu Karere ka Kicukiro, Lt.Col. Jean Bosco Muhizi, Umuyobozi wa Polisi muri Kicukiro SSP John Niyibizi, Umuhuzabikorwa w’Urwego rwa DASSO Kicukiro, Samuel Niragire n’ubuyobozi bw’Umurenge wa Masaka.

Hari kandi umuyobozi w’Urwego rw’Ubugenzacyaha muri zone ya Masaka, abahagarariye Inama Njyanama y’Umurenge, Utugari n’Imidugudu.

Mu muhango wo gusoza amahugurwa y’abanyerondo 195 mu Murenge wa Masaka, wasojwe no gutanga Seritifika kuri komite n’Abakuru b’Imidugudu.

Abagize irondo ry’umwuga bahawe imyambaro n’ibikoresho bazakoresha mu kazi.

Abagize irondo y’umwuga mu Murenge wa Masaka bahawe ibikoresho bibafasha kurangiza inshingano zabo
Abayobozi b’Imidugudu bahawe Seritifika
Abanyerondo bigishijwe kudasobanya
Inzego z’umutekano zatanze ibiganiro mu gihe cy’amahugurwa y’abagize irondo ry’umwuga

Yanditwe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA