Kicukiro: Umwiherero wasigiye umukoro abavuga rikumvikana (Amafoto)
Imibereho

Kicukiro: Umwiherero wasigiye umukoro abavuga rikumvikana (Amafoto)

Imvaho Nshya

October 23, 2023

Abavuga rikumvikana bo mu Murenge wa Nyarugunga mu Karere ka Kicukiro mu Mujyi wa Kigali, bavuga ko umwiherero wabasigiye umukoro nyuma yo kurebera hamwe ibyo Umurenge wagezeho ndetse n’ibyo binenga.

Ni umwiherero w’umunsi umwe wahurije hamwe abagize Inama Njyanama y’Umurenge, abafatanyabikorwa, urubyiruko, abakozi b’Umurenge hamwe n’abaturage basanzwe bakorana n’Umurenge.

Wabaye ejo ku Cyumweru tariki 22 Ukwakira 2023, ubera mu Karere ka Bugesera mu Ntara y’Iburasirazuba, ahazwi nka Bugesera Lake Hotel. Bagize umwanya wo kuganirira mu matsinda ibyo bakora bagateza imbere umurenge n’ibyo binenga.

Abitabiriye umwiherero bakoze umukoro ngiro wo gusigasira igihugu bakabihuza no kugira aho bavana umurenge n’aho bawugeza mu iterambere.

Masiyo Jean De Dieu umuturage wo mu Murenge wa Nyarugunga, yabwiye Imvaho Nshya ko hari abaturage benshi batitabira uko bikwiye ubwisungane mu kwivuza ndetse na gahunda za EjoHeza, ibyo ngo bikabashyira ku mwanya batishimira.

Agira ati: “Dufite urubyiruko rwishora mu bibazo bitandukanye harimo ibiyobyabwenge, bigatuma urubyiruko tutarubonamo umusaruro twifuza ndetse n’ibindi twarwitegaho nk’u Rwanda rw’ejo hazaza”.

Umwe mu bavuga rikumvikana mu Murenge wa Nyarugunga, Tumukunde Monica, avuga ko uyu mwiherero bawitezemo byinshi.

Ati: “Tuwitezemo ko ibibazo byagaragajwe bigiye gushakirwa ibisubizo, cyane cyane ko turi kumwe n’abayobozi mu nzego zose”.

Ubufatanye bwabo ku mpande zose ngo ni bwo bubafasha kubona ibisubizo by’ibibazo bafite mu kugera ku iterambere ry’Umurenge.

Avuga ko ibibazo bagejejweho basanze bifite uburemere mu guteza imbere umuturage.

Yagize ati “Mu byo twaganiriye, umuturage twamufashe tumushyira hagati. Noneho twese tugiye kurebera kuri uwo muturage, tumenye ikibazo umuturage afite ni ikihe”.

Umunyamabanga Nshingwabikorwa w’Umurenge wa Nyarugunga, Uwamahoro Géneviève, avuga ko ibibazo bigaragazwa n’abaturage bari basanzwe babizi ari nayo mpamvu bateguye umwiherero.

Akomeza avuga ko hari ibyo biyemeje gukora nyuma yo kuva mu mwiherero.

Ati: “Umwiherero turawusoje, twiyemeje ubukangurambaga kuri buri muturage utari washobora kwishyura mituweli kandi atabuze ubushobozi.

Urubyiruko narwo twaruzanye muri uyu mwiherero, tuvuye hano bafashe ingamba ko bagiye kwegera bagenzi babo bakabereka ko bakwiye gutanga umusaruro w’umusanzu ku gihugu, bakirinda kwishora mu biyobyabwenge”.

Gatete George, Perezida w’Inama Njyanama y’Umurenge wa Nyarugunga, yahamirije Imvaho Nshya ko kujya mu mwiherero bizatanga umusaruro ufatika.

Ikindi ngo hari ikibatsi kigiye kuboneka mu guteza imbere Umurenge, nyuma yo kuva mu mwiherero.

Ati “Hari ibyo twishimira harimo kugira imihanda itandukanye, hari ibikorwa abaturage kenshi bikorera babigizemo uruhare ariko hari ibyo na Leta ikora biza mu mihigo.

Turabona ko mu bijyanye n’iterambere n’ubukungu duhagaze neza. Ikindi ni uko nta bibazo bidasanzwe ubona abaturage bacu bafite”.

Gatete yizeza ko bishoboka cyane ko imihigo y’uyu mwaka bazayesa 100% agereranyije uko buri wese uvuga rikumvikana imihigo, yayigize iye.

Ahamya ko haba hari umurongo igihugu kiba cyaratanze kuva kuri Perezida wa Repubulika.

Agira ati “Twese tugira ikintu tumukuraho kandi ni imbuto nziza tubona ikomeza kwera, ari na yo mpamvu tugira umwanya wo kwicara nk’abaturage tukavuga tuti ni hehe dushaka kuganisha Umurenge wacu, ni hehe dushaka kuganisha igihugu cyacu”.

Mu minsi ishize Umurenge wa Nyarugunga watashye inzu z’ubucuruzi ndetse n’imihanda yubatswe n’abaturage babitewemo inkunga n’Umujyi wa Kigali, ni mu gihe kandi inyubako y’Umurenge yamaze gusanwa.

Bakoze umukorongiro wo gusigasira igihugu
Bishimira ko besheje umuhigo wo gusigasira igihugu
Bafashe umwanya wo kwishimira ibyo bagezeho baniyemeza kongera ikibatsi mu gushyira umuturage ku isonga
Bafashe ifoto y’urwibutso
Abakozi b’umurenge wa Nyarugunga bitabiriye umwiherero

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA