Kigali: COVID-19 iragereranywa n’isomo ryo kuziba icyuho mu bukungu
Amakuru

Kigali: COVID-19 iragereranywa n’isomo ryo kuziba icyuho mu bukungu

NTAWITONDA JEAN CLAUDE

May 26, 2022

I Kigali hateraniye inama y’iminsi ibiri, ihuje abashakashatsi n’abahagarariye inzego z’inyuranye zaba izo mu Rwanda no mu mahanga baganira ku ngaruka zatewe n’icyorezo cya COVID-19 n’isomo rikwiye kuvamo mu kuziba icyuho mu nzego zinyuranye hagamijwe kwihutisha iterambere.

Iyi nama ibaye ku nshuro ya 8 yateguwe n’Ikigo cy’Ubushakashatsi n’Amahugura (EPRN) cyagaragaje ubushakashatsi bwakozwe ku ngaruka za kiriya cyorezo n’iz’intambara yo muri Ukraine n’ubwo ibera hanze y’u Rwanda ariko na yo yagize ingaruka ku bukungu. 

By’umwihariko   ku cyorezo cya COVID-19,  cyagize ingaruka ku bihugu kinagaragaza inzego zarimo icyuho zirimo iz’ubuzima, ubuhinzi n’ubworozi n’izindi zikwiye kongerwamo ingufu  mu rwego rwo kubaka ubukungu bushobora guhangana n’ibindi bibazo byavuka  mu bihe biri imbere.

Umushakashatsi Dr Robert Ntuite wakoze ubushakashatsi ku ngaruka z’iki cyorezo mu rwego rw’ ubuhinzi n’ibiribwa mu Rwanda, ati: “…zikwiye gutuma abantu bagira umuhate wo guteza imbere ubuhinzi  no kongerera agaciro umusaruro ubukomokaho hashingiwe ku cyuho cyagaragajwe n’ubushakashatsi”.

Kwizera Seth Umuyobozi wa EPRN na we yagize ati: “ Icyorezo cya COVID-19 cyagize ingaruka ku mibereho y’abantu mu nzego zose yaba ku muhinzi, ku mucuruzi, haba ku rwego rw’amahoteli, amashuri  n’ibindi. Icyakorwa ni iki? Hariho gahunda yo kuzahura ubukungu binyuze mu Kigega Nzahurabukungu; bafashe abantu bakoraga bazahajwe n’iki cyorezo babe  bakongera bagakora neza”.

Avuga ko ariko n’abikorera bakwiye kugira umuhate wo guhindura imikorere n’icyerekezo bitewe n’ibi bihe. 

Dr Uwera Claudine Umunyamabanga wa Leta muri Minisiteri y’Imari n’Igenamigambi ushinzwe Igenamigambi

Ati: “Ariko uretse  izo mbaraga zizanwa na Leta n’abikorera ubwabo hari icyo bagakoze; bakareba bati niba narizigamye ku mikorere nahindura iki? Hari ugushaka amasoko mashyashya, ubungubu ushobora gusanga amasoko wari ufite mbere ya COVID-19 atakiri amasoko meza ukavuga uti noneho ni he nahindurira imikorere yanjye nkazana imishyashya?”

Ashingiye ku bushakashatsi bakoze, Kwizera yagarutse no ku mbogamizi zikigaragara muri iyi gahunda yo kuzahura ubukungu by’umwihariko ku bakoraga ubucuruzi buto.

Ati: “Nk’iyo turebye urwego rw’abikorera, imbogamizi iba ihari muri rusange iyo dukora ubushakashatsi, tuvuze nka bariya bacuruzi bato, abenshi usanga igishoro cyabo barakiriye kubera igihe cya Guma mu rugo batakoraga, iyo  ubwiye umuntu ngo haguruka ukore ushyiremo imbaraga arakubwira ati ibyo nakoreshaga nta bigihari, hari abatakaje amaseta kongera kubona aho gukorera ni ikibazo, abandi batakaje amasoko”.

Dr Uwera Claudine Umunyamabanga wa Leta muri Minisiteri y’Imari n’Igenamigambi ushinzwe Igenamigambi, yagaragaje ko ihuriro nk’iri ry’abashakashatsi bishyizwe cyane cyane barimo abize iby’ubukungu, bakora ubushakashatsi bigatuma haboneka  amakuru nyayo ashobora kugenderwaho n’ibihugu mu gufata ibyemezo.

Asanga ubu bushakashatsi ari ingenzi kuko ubu hanagaragajwe  inzego zitandukanye zarimo intege nke mbere ya COVID-19 bikaba byaratumye zihungabanywa cyane n’iki cyorezo. Ibi bituma  haboneka icyerekezo cy’ahagombaga gushyirwa imbaraga.

Ati: “… byari bikwiriye ko izo nzego ziba zarahawe imbaraga, ni ukuvuga ngo ubwo ni ubusesenguzi buba bukomeye cyane bwerekana ngo hariya hantu twari twarahibagiwe ariko hari ikintu kitweretse ko hagomba guhabwa imbaraga mu buryo bwo gushoramo imari. Berekanye nk’urwego rw’ubuzima  n’izindi, berekana ngo ntitwihutire gukemura ibibazo byatewe na COVID-19 gusa ahubwo mu buryo burambye tukitegura ibindi bihe bikomeye bishobora kuzabaho”.

Yakomeje agira ati: “Aya makuru adufasha kuba twashyiraho ingamba zihamye kandi zirambye, buri mwaka habaho kumurika ibyavuye muri ubu bushakashatsi tukabiganiraho kugira ngo bibe byagenderwaho mu gufata ingamba zirambye. Ingamba zidashingiye ku bushakashatsi ntabwo ziramba”.

Dr Uwera  Claudine yagaragaje ko nk’ingamba zafatwa ari ukugendera ku masomo abantu bakuye ku cyorezo, hakarebwa uburyo bwo guhindura imitekerereze no kubyaza umusaruro ibyo Igihugu gifite mu rwego rwo kwigira, no kureba amahirwe ari mu Karere akabyazwa umusaruro hatabayeho gushakira mu bihugu bya kure.

Nk’uko byagarutsweho muri iyi nama, ingamba zashyizweho na Guverinoma y’u Rwanda zirimo Ikigega Nzahurabukungu zatumye ubukungu buzahuka. 

Mbere ya COVID-19 bwazamukaga neza aho bwageze ku 10% rirenga. Muri 2020 bwagabanutseho 3,4%, ariko muri 2021 habayeho izamuka bugera ku 10,9%.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA