Tariki ya 20 Gucurasi 2026, Polisi ikorera mu Mujyi wa Kigali ifatanije n’inzego zitandukanye n’Urwego rw’Ubugenzacyaha, Urwego rw’ubushinjacyaha, Inzego z’ibanze ndetse n’abaturage, yakoze igikorwa cyo kwangiza mu ruhame ibiyobyabwenge ndetse n’ibicuruzwa bitemewe bifite agaciro ka miliyoni 61 z’amafaranga y’u Rwanda, byafatanywe abaturage babicuruza mu bihe bitandukanye.

Ni ibiyobyabwenge byacuruzwaga mu Mujyi wa Kigali, iki gikorwa cyabereye mu Murenge wa Nduba ahasanzwe hajyanwa imyanda ikusanywa mu mujyi wa Kigali. Umuvugizi wa Polisi mu Mujyi wa Kigali CIP Wellars Gahonzire yatangaje ko ibiyobwange n’ibindi bicuruzwa bitemewe byangijwe byari bibitse mu masitasiyo ya Polisi atandukanye yo mu mujyi wa Kigali.

Ibyangijwe bigizwe n’Urumogi ibiro 352, Kanyanga Litiro 1,203, Inzoga z’inkorano zitujuje ubuziranenge z’amoko atandukanye, ibiribwa, ibinyobwa bitandukanye, amavuta atukuza azwi nka Mukorogo, ndetse n’ibindi bitandukanye. Ibi byose bikaba bifite agaciro k’amafaranga y’u Rwanda Miliyoni 61 n’ibihumbi 701 na 740

CIP Gahonzire yatangaje ko ibi biyobyabwenge n’ibicuruzwa bitemewe byafatanywe abaturage mu Mirenge itandukanye igize Umujyi wa Kigali ndetse no mu bihe bitandukanye biturutse ku makuru yatanzwe n’abaturage, ababifatiwemo bakorewe amadosiye bashyikirizwa ubutabera.

Polisi y’igihugu irashimira abaturage batanze amakuru ibiyobyabwe ndetse n’ibindi bicuruzwa bitemewe bigafatwa bitarakwirakwira mu baturage ngo bibagireho ingaruka, ikanibutsa abaturage gukomeza gutanga amakuru ku bantu bazwi ko bacuruza ibintu bitemewe.

Polisi kandi irihanangiriza abaturage bishora mu bikorwa byo gucuruza ibiyobyabwenge ndetse n’ibindi bicuruzwa bitemewe kubireka bagashaka ibindi bakora byabagirira akamaro, iranabibutsa ko ari icyaha gihanwa n’amategeko y’u Rwanda harimo n’igifungo cy’igihe kirekire.

Ba uwa mbere mu kumenya amakuru agezweho!!!