Kigali: Uko igiterane cya Korali Shalom cyagenze
Imibereho

Kigali: Uko igiterane cya Korali Shalom cyagenze

Imvaho Nshya

September 18, 2023

Shalom Choir yo mu Itorero ADEPR Nyarugenge, yabaye Korali ya mbere yujuje BK Arena igizwe n’imyanya isaga 10,000, mu giterane cyo kuramya no guhimbaza Imana cyiswe “Shalom Gospel Festival”, cyabaye ku gicamunsi cyo ku Cyumweru taliki ya 17 Nzeri  mu Mujyi wa Kigali.

Iki giterane cyaranzwe n’ibyiciro bibiri; icyiciro cya mbere cyarimo ijambo ry’Imana, ubumamya n’indirimbo z’amakorali, mu gihe icya kabiri cyibanze ku ndirimbo ari na cyo cyakiriwemo umuhanzi Israel Mbonyi.

Cyayobowe n’abashyushyarugamba b’abanyamakuru ari bo Neema Marie Jeane wakunzwe cyane mu ndirimbo zo kuramya no guhimbaza Imana (Gospel) na Eric Shaba wakoreye ibitangazamakuru bitandukanye mu Rwanda akaba akunda no kuyobora ibitaramo mu nsegero zitandukanye mu Mujyi wa Kigali.

Mu cyiciro cya mbere haririmbye korali zirimo Shalom Choir yigaragaje iririmba indirimbo nka “Turagukurikiye, Yaranguraniye, Mwuka Wera, Ubuntu, iyitwa Yasannye Imitima iherutse gushyira ahagaragara n’izindi.

Pasiteri Dr Twahirwa Raymond, Umushumba wo mu Rurembo rwa Huye, yatanze ubuhamya bw’aho Imana “yamukuye mu buzima bwo ku muhanda imuhindura umuntu ukomeye none ubu ni umuganga.

Yavuze ko mu buzima bwo ku muhanda yabaga mu muryango w’aba “Rasta” witwa Abasaje, anywa urumogi no gusayisha mu byaha bitandukanye. Yujuje  imyaka 25, ni bwo Imana yamuhamagaye imubwira iti: “Nurenza aha urapfa…”

Ku myaka 33 yatangiye amashuri abanza yigana n’abana be, ariko ntiyacika intege kugeza ageze muri Kaminuza. Ati: “Imana yangiriye neza niga na Kaminuza, ubu ndi muganga. Nagira ngo nkubwire ngo humura nawe Imana yaguhindurira ubuzima”.

Mu cyiciro cya kabiri, Korali Shalom yagarutse yahinduye imyambaro, maze iririmba indirimbo zirimo iyitwa Ijambo Nyamukuru, Nyabihanga, ndetse na Komeza Ugende yatumye benshi babyina karahava.

Mu gihe hari hategerejwe Israel Mbonyi ku rubyiniro bamwe mu bakunzi be banyuzagamo bagahagamara bati “Mbonyi wee!”, aje yakirwa n’urufaya rw’amashyi n’urusaku rw’ibyishimo.

Uyu muhanzi uri mu bakunzwe cyane yaririmbye indirimbo zirimo Nzaririmba, Yankuyeho Urubanza, Baho, Nzi Ibyo Nibwira, Karame, Nina Siri, Umusirikare, Hari Ubuzima, Yaratwimanye n’Icyambu.

Muri iki giterane, Shalom Choir yanamurikiyemo ibindi bikorwa bakora by’urukundo nk’icyitwa “Shalom Charity”aho bahaye imashini zidoda ababyeyi b’abapfakazi bibumbiye mu itsinda rigizwe n’abantu 190 , bishyurira Mituweli abasaga 350 mu Turere twa Huye na Nyabihu.

Abarenga 100 bakijijwe bakira Yesu nk’Umwami n’Umukiza wabo.

Israel Mbonyi yasusurukije abakunzi

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA