Kigali: Urubyiruko rwamuritse ikoranabuhanga ryifashishwa mu gucunga imishinga
Ikoranabuhanga

Kigali: Urubyiruko rwamuritse ikoranabuhanga ryifashishwa mu gucunga imishinga

NTAWITONDA JEAN CLAUDE

September 30, 2022

Rumwe mu rubyiruko rwo mu Rwanda rwishyize hamwe rwamuritse ikoranabuhanga rwakoze rikoreshwa muri telefoni (KudiBooks Mobile Application), rizajya rifasha urundi rubyiruko gucunga imishinga y’ubucuruzi no kumenyekanisha ibyo rukora.

Uyu mushinga ni wo wahize indi mu marushanwa y’ikoranabuhanga agamije  guteza imbere urubyiruko, yateguwe n’Umuryango CRS (Catholic Relief Services).

Ni muri gahunda yiswe “Youth for Youth” (Y4Y), aho ba rwiyemezamirimo b’urubyiruko bakora imishinga ifasha n’urundi rubyiruko gutera imbere.

Mu gikorwa cyo kumurika ibikubiye muri ririya koranabuhanga cyabereye i Kigali, Pacifique Ubukombe  Hallellua ushinzwe isakazamakuru no kwamamaza muri Kompanyi ya Kudibooks, yasobanuye icyo bashingiyeho bakora iriya porogaramu.

Mu kiganiro n’itangazamakuru yagize ati: “Akenshi ba rwiyemezamirimo baba bafite ibibazo byo gucunga umutungo n’imari mu bucuruzi bwabo, ugasanga ntibafite ubumenyi. Nk’urugero usanga abacuruzi benshi bacibwa amande kuko batatanze imisoro. Iyi porogaramu ikaba ikemura ibibazo bya ba rwiyemezamirimo badafite abacungamutungo babigize umwuga cyangwa n’ababagannye bikaba biri mu buryo buhenze”.

Yakomeje asobanura ko izabafasha kumenya uburyo amafaranga yinjiye, uburyo yasohotse, ibyo baranguye, inyungu bagize n’ibindi.

Hakizimana Eraste wo mu Karere ka Rubavu, ni umwe mu rubyiruko rwihangiye umurimo, ni umworozi w’inkoko n’ingurube, yagaragaje ko ririya koranabuhanga hari byinshi baryitezeho dore ko ari mu batanze igitekerezo mu  mushinga waryo.

Ati: “Ni amahirwe n’ibyishimo nagize kuko ibyo twavuze byatangiye gushyirwa mu bikorwa. Twajyaga ducunga umutungo twifashishije ibitabo; nkanjye w’umworozi nabaga mfite igitabo  najya nko kudaha amazi kikaba kiguyemo, imvura yagwa ngifite kikaba kiranyagiwe, ariko ririya koranabuhanga rifite umutekano aho nzaba ndi hose nzaba ndigendana, nzaba mbasha gucunga ibyanjye aho ndi  hose”.

Jude Marie Banatte  Umuyobozi Mukuru wa CRS mu Rwanda ashingiye ku kuba iki gihugu gifite umubare munini w’urubyiruko ( 27% bafite hagati y’imyaka 15-29), yavuze ko kugira ngo ugire uruhare mu iterambere ryacyo urufunguzo rwa mbere ari ukurushyigikira.

 Ni muri urwo rwego muri gahunda bagira harimo no gufasha urubyiruko by’umwihariko mu bijyanye n’ ikoranabuhanga kugira ngo  rigere kuri bose   kuko ryihutisha iterambere aho ubu rikoreshwa muri serivisi nyinshi zitandukanye.

Yakomeje asobanura  ko umushinga w’imyaka 3 bafite wa Y4Y bateganya ko uzagera ku rubyiruko rusaga ibihumbi 75 mu Rwanda, ariko ukazagera no bindi bihugu byo muri Afurika y’Iburasirazuba.

Brian Wenger umwe mu bagize Inama y’Ubutegetsi ya CRS yavuze ko mu Rwanda hari amahirwe menshi yo kubyaza umusaruro kandi ari Igihugu cyiyemeje  iterambere ry’ikoranabuhangana na gahunda zishyigikira urubyiruko, bakaba bishimiye kuhatangirira uriya mushinga w’ikoranabuhanga, kandi bashaka ko iriya porogaramu yahakorewe ikazakwira muri Afurika n’ahandi ku isi.

Iradukunda Yves Umunyamabanga Uhoraho muri Minisiteri y’Ikoranabuhanga na Inovasiyo, yagaragaje ko muri gahunda zitandukanye bagenda bakora zigenewe urubyiruko babona ko rurushaho kugenda rutyaza ubwenge mu gukora imishinga yagira akamaro hano mu Rwanda kandi ikanaguka ikarenga imipaka.

Yasobanuye uruhare rwa Leta muri gahunda nk’izi ziba zateguwe n’abafatanyabikorwa agira ati: “Uruhare rwacu nka Leta ni ukubafasha gukora porogaramu ziberanye n’icyo urubyiruko rwacu rukeneye ni na ko byagenze muri iri rushanwa”.

Yongeyeho ati: “… mu buryo bwagutse dushyiraho politiki zitandukanye harimo igamije ko ba rwiyemezamirimo bakiri batoya barimo guhanga udushya tubasha kubona uburyo bwo kubafasha, tunashyiraho ikigega aho dufite amafaranga tugenda duha ba rwiyemezamirimo bakiri bato kugira ngo batangire kuzamura ibitekerezo byabo”.

Yagaragaje ko mu mwaka ushize hari imishinga 45 igitangira yatoranyijwe izahabwa amafaranga yose hamwe agera kuri miliyoni 500 aturutse muri kiriya kigega.

Nk’uko yabigarutseho, hari amahugurwa batanga n’amarushanwa bategura, nka “Hanga Pitchfest” yatangiye umwaka ushize, aho uwahize abandi yahawe igihembo cy’amafaranga y’u Rwanda  miliyoni 50.

Urubyiruko rwakoze ikoranabuhanga rya Kudibooks

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA