Kirehe: Badindizwa no gucururiza ahataragera umuriro w’amashanyarazi
Amakuru

Kirehe: Badindizwa no gucururiza ahataragera umuriro w’amashanyarazi

Imvaho Nshya

October 13, 2023

Bamwe mu baturage bakorera mu masanteri y’ubucuruzi ari mu Murenge wa Nasho mu Karere ka Kirehe bavuga ko bari gusigara mu iterambere bitewe no kuba bataragerezwaho umuriro w’amashanyarazi bikaba bikomeje kuba inzitizi mu iterambere.

Abacuruzi bakora ubucuruzi butandukanye bwiganjemo ubw’ibiribwa n’imbuto, abacuruzi b’inyama n’abafite amaresitora bakoresha ibyuma bisaba umuriro w’amashanyarazi birimo nka firigo, ibikoresho bisya imbuto n’ibindi, bavuga ko bamaze igihe kitari gito basaba umuriro w’amashanyarazi kuko kuba batawufite bibadindiza bigatuma batabasha gukora ibikorwa by’iterambere nko kugura ibyuma bisya n’ibindi bikenera umuriro w’amashanyarazi ufite ingufu.

Byumvuhore Emmanuel atuye mu Kagari ka Rubirizi akaba acuruza resitora, yavuze ko kutagira umuriro w’amashanyarazi bituma ubucuruzi bwe butagenda neza.

Yagize ati: “Nk’ubu iyo abakiliya bansabye ibinyobwa bikonje ndabibura kuko nta firigo mfite, bagenda barakaye rero kuko serivisi baba bakeneye mba ntayibakoreye. Ubu kunywa ibikonje ni ukujya ku Murindi. Icyo twifuza ni umuriro kuko uhari nakwagura ubu bucuruzi ngashinga akabari ndetse n’iyi resitora ikagurwa. Birababaje kuba tumaze igihe kinini dusaba umuriro ariko tukaba twarahebye.”

Bamwe mu rubyiruko na bo bavuga ko baramutse babonye umuriro bashyira mu bikorwa imyuga bize bakarwanya ubushomeri.

Kwizera Deus yagize ati: “Nk’ubu twabonye umuriro muri kano Kagari hari ibikorwa byinshi twakora byaduteza imbere birimo gusudira, kogosha, gukoresha ibyuma bisya ndetse twakora n’indi myuga tukava mu bushomeri ariko ubu tuba turi mu rugo twicaye.”

Mukankusi Liberta utuye mu Kagari ka Kabusunzu na we yagaragaje ko abangamiwe n’imyigire y’umwana we iyo ashatse gusubiramo amasomo.

Yagize ati: “Nshana agatadowa kubera ko nta muriro dufite. Nanjye ubu nywufite abana n’abazukuru banjye bakwiga neza bidasabye ko mpora ngura peteroli. Twasaba ko baduha umuriro hano tukava mu icuraburindi.”

Umuyobozi w’Akarere ka Kirehe Rangira Bruno, yavuze ko muri aka Karere hari Utugari tutaragezwamo umuriro ariko ko bafatanyije n’Ikigo cy’Igihugu cy’Ingufu (REG) hari umushinga wo kugeza umuriro aho utari bitarenze mu mpera z’umwaka wa 2024.

Yagize ati: “Hari Utugari tutarageramo umuriro gusa ariko turi gukorana na REG, hari umushinga n’amasoko wo kugeza ahasigaye hose hataragera umuriro. Icyo twabwira abaturage, nibihangane bashonje bahishiwe kuko turi kubikurikirana kandi umuriro uzabageraho vuba bitarenze mu mpera z’umwaka utaha.”

Kugeza ubu Akarere ka Kirehe kagaragaza ko abangana na 72% ari bo bamaze kwegerezwa umuriro w’amashanyarazi.

NSHIMIYIMANA FAUSTIN

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA