Kubuza abana Ikinyarwanda ni ubukunguzi- Bamporiki
Amakuru

Kubuza abana Ikinyarwanda ni ubukunguzi- Bamporiki

NTAWITONDA JEAN CLAUDE

March 12, 2022

Umunyamabanga wa Leta muri Minisiteri y’Umuco n’Urubyiruko, Bamporiki Edouard, yavuze ku babyeyi babuza abana kuvuga ururimi rw’Ikinyarwanda bifatwa nk’ubukunguzi cyangwa guhemuka.

Yabigarutseho kuri uyu wa Gatanu ubwo hasozwaga ukwezi kwahariwe gutoza umuco mu mashuri, ukaba warabereye mu ishuri rya Lycée de Kigali mu Mujyi wa Kigali.  

Bamporiki avuga ko umutoza wa mbere w’ururimi rw’umwana w’Umunyarwanda, ari mama we kuko ngo Ikinyarwanda ni ururimi rw’ababyeyi.

Agira ati: “Ntabwo ushobora kubuza umwana w’Umunyarwanda kuvuga Ikinyarwanda, ibyo byaba ari ubukunguzi, byaba ari uguhemuka.

Si iby’i Rwanda, kuko ni nko kuvuga ngo umwana wanjye sinshaka ko agira ikirango cyanjye […].”

Ururimi rw’Abanyarwanda ni umurage twese duhuje, abatubyara, twebwe abavutse n’abo tuzabyara.

Akomeza asobanura ko ururimi rw’Abanyarwanda abana kuba baruhabwa n’ababyeyi babo, atari ikintu bakwiye kuba bagura ahubwo ngo ni uburenganzira bwabo.

Ati: “Umubyeyi utekereza ko yabuza umwana kuvuga Ikinyarwanda, arahemuka, narekereho ni uburenganzira bw’Umunyarwanda kuvuga Ikinyarwanda”.

Mwumvaneza Antony wiga muri Lycée de Kigali avuga ko Ikinyarwanda ari ururimi gakondo umuntu wese agomba kwishimira.

Ati: “Ni ururimi dukwiye kwishimira ntawe uzigera afata ibyawe ngo abikunde utabimukundishije. Natwe Abanyarwanda reka dukundishe abanyamahanga ururimi rwacu, tubakundishe Ikinyarwanda, tukivuge ahantu hose.

Aho kugira ngo utange imbwirwaruhame uvuge mu ndimi z’amahanga ahubwo twese twimakaze Ikinyarwanda kandi dukoreshe Ikinyarwanda cy’umwimerere”.

Asaba ababyeyi gushishikariza abana kuvuga Ikinyarwanda, akongeraho ko ari byiza kumenya indimi z’amahanga ariko ngo ntibikwiye ko zirutishwa Ikinyarwanda.

Minisiteri y’Urubyiruko n’Umuco yasabye ko ababyeyi bareka abana babo bakavuga Ikinyarwanda

Uko Ikinyarwanda gihagaze mu Biyaga Bigari

Abahanga mu iyigandimi bavuga ko Ikinyarwanda na cyo ari rumwe mu ndimi zisangwa mu muryango w’indimi ziswe Bantu. 

Iyi nyito yakomotse ku bushakashatsi bwimbitse bwakozwe ku ndimi zose zivugwa muri Afurika mu bihugu bitandukanye byo munsi y’ubutayu bwa Sahara mu gice cy’amajyepfo y’uburasirazuba bw’Ikiyaga cya TCHAD cyane cyane mu majyepfo ya koma y’Isi (Umurongo ugabanya Isi mo ibice bibiri bingana). 

Ubwo bushakashatsi bugaragaza ko izi ndimi zifitanye amasano menshi cyane cyane amasano ashingiye ku magambo n’ibisobanuro byayo.

Urugero rutangwa ni ijambo ‘bantu’. Mu Kinyarwanda ni “Abantu” mu giswahili cyo muri Tanzaniya ni “Watu” cyangwa “Batu” muri Congo na ho mu kigande kivugwa muri Uganda ni “Abantu”.

Nta mubare uzwi neza w’abavuga Ikinyarwanda bose kuko bitoroshye kumenya abakivuga bari hanze y’igihugu cy’u Rwanda, ubu gifite abaturage bagituye basaga miliyoni cumi n’ebyiri (12,000,000).

Gusa kuri uyu mubare hakiyongeraho abaturanyi bavuga Ikirundi mu Burundi na Giha muri Tanzaniya, indimi ebyiri bivugwa ko zikomoka bya hafi ku Kinyarwanda.

Ubu igihugu cy’u Burundi kirabara miliyoni zisaga icyenda (9,000,000) z’Abarundi.

Iyo bavuga Ikirundi bumvikana neza n’abavuga Ikinyarwanda nta kibazo.

Naho ururimi rwitwa Giha rukoreshwa cyane n’abaturage barenga miliyoni imwe (1,000,000) muri Tanzaniya mu gace kitwa Kigoma.

Aba na bo nta kibazo bagira iyo baganira n’umuntu uzi Ikinyarwanda.

Mu majyepfo y’uburengerazuba bwa Uganda, mu Karere ka Kisoro hatuye abo mu bwoko bw’Abafumbira basaga ibihumbi Magana inani (800,000). Aba na bo imvugo yabo ntaho itandukaniye cyane n’Ikinyarwanda kivugwa mu Rwanda.

Banyamulenge ni ubwoko bw’abantu basaga ibihumbi mirongo inani (80,000) batuye mu gihugu cya Repubulika Iharanira Demokarasi ya Congo mu bice bya Kivu y’amajyepfo, Masisi na Rutshuru.

Aba bo bivugira Ikinyarwanda neza kurusha ndetse na bamwe mu batuye mu Rwanda.

Nk’uko bigaragazwa n’igereranya mu mibare, imbaga y’abavuga kandi bakumva Ikinyarwanda igizwe n’abasaga miliyoni makumyabiri n’eshatu (23,000,000) ku Isi.  Uyu si umubare muto habe na gato kuko ugenda ukura uko iminsi yicuma.

Umwihariko w’ururimi rw’Ikinyarwanda ni umubare munini w’amagambo akigize kandi amenshi akagira ibisobanuro bimwe.

Ni ukuvuga ko bisaba uwumva n’uvuga ururimi rw’Ikinyarwanda kumva neza ibisobanuro by’ijambo agendeye ku buryo ryakoreshejwe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA