Kwanga gukekwa nk’uwibye ibyo yaguze byatumye yaka fagitire 93 za EBM
Imibereho

Kwanga gukekwa nk’uwibye ibyo yaguze byatumye yaka fagitire 93 za EBM

Imvaho Nshya

October 25, 2023

Tuyishime Jean de Dieu, Umukozi w’Ibitaro by’Akarere ka Nyagatare, yashimiwe nk’umuguzi w’indashyikirwa mu gusaba fagitire za EBM mu Ntara y’Iburasirazuba nyuma yo gusaba inyemezabwishyu (fagitire) 93 za EBM  zifite agaciro k’amafaranga y’u Rwanda 91,400.

Tuyishime atuye mu Mudugudu wa Nyagatare, Akagari ka Nyagatare, Umurenge wa Nyagatare mu Karere ka Nyagatare. Avuga ko kuba umuguzi w’indashyikirwa atari ibintu yateganyaga kuko we yakaga inyemezabwishyu yirinda kuba yakekwa ko ibyo yaguze yaba yabyibye.

Yahembwe muri iki cyumweru mu gikorwa cyo gushimira abasora bitwaye neza mu Ntara y’Iburasirazuba mu mwaka w’Ingengo y’Imari 2022/23.

Gusa ngo ibanga nta rindi abikesha uretse kwaka inyemezabuguzi ku byo aguze byose bitewe no kwirinda ko hagira umufata nkaho ibyo yaguze abyibye cyangwa yabibonye mu buryo butemewe.

Yagize ati: “Nirinda kuba naba ndi kugenda mu nzira nkumva hari umbwiye ko ibyo mfite ari ibye cyangwa nabyibye. Ibaze mvuye kwigurira telefoni nk’umuntu akambwira ko ari iye cyangwa se umukozi wa RRA akansaba inyemezabuguzi y’ibyo naguze nkayibura, amakosa nk’ayo namenye kuyirinda kare”.

Akomeza avuga ko kuba umusoro ari ubukungu bw’Igihugu na byo byamufashije kujya yaka inyemezabuguzi.

Yagize ati: “Njye namenye icyo umusoro uvuze mu kugezwaho ibikorwa remezo bitandukanye aho ntuye ndetse n’uburyo ufasha igihugu mu iterambere mbikesha Inzego z’urubyiruko nakuriyemo. Ibi bituma ibyo nguze byose mbisabira inyemezabuguzi ya EBM, iyo nishyura amazi ndayisaba, najya muri resitora na ho nkayisaba kugira ngo umusoro wanjye ugere aho ukwiriye kuba uri.”

Tuyishime Jean de Dieu yavuze ko hari inzitizi zo kuba hari aho ajya kugura ibicuruzwa ariko agasanga nta EBM bagira cyangwa bakamwima inyemezabuguzi ku bushake.

Tuyishime kandi yavuze ko yatangiye kujya yaka inyemezabuguzi kuva ku itariki ya 01 Gashyantare 2022, aho yaka inyemezabuguzi akenshi ari muri resitora aho ajya gufatira ibyo kurya no kunywa.

Ubusanzwe Tuyishime ni umukozi ukora muri serivisi zo mu buruhukiro (morgue) bw’Ibitaro bya Nyagatare, akaba afite intego zo kurushaho kwaka inyemezabuguzi ndetse agakangurira n’abandi baguzi kujya bazisaba.

NSHIMIYIMANA FAUSTIN

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA