Kwibohora 28: RDF yujuje ibikorwa remezo byatwaye miliyari 191 Frw
Amakuru

Kwibohora 28: RDF yujuje ibikorwa remezo byatwaye miliyari 191 Frw

NTAWITONDA JEAN CLAUDE

July 4, 2022

Mu rwego rwo kwizihiza Umunsi wo Kwibohora ku nshuro ya 28 kuri uyu wa Mbere taliki ya 4 Nyakanga 2022, ubuyobozi bw’Ingabo z’u Rwanda (RDF) bwatangaje ko hatahwa ibikorwa remezo byubatswe mu gihe cy’umwaka wose byatwaye amafaranga y’u Rwanda asaga miliyari 191.

Ibyo bikorwa remezo byubatswe na RDF birimo imidugudu y’icyitegererezo yuzuye itwaye amafaranga y’u Rwanda asaga miliyari 22.4, n’indi midugudu isanzwe yatwaye akabakaba miliyari 20.

Iyo midugudu y’icyitegererezo ikubiyemo amacumbi agezweho kandi yujuje ibyangombwa byose nkenerwa, yiteguye kwakira amagana y’imiryango itishoboye yabaga ahantu hashoboraga gushyira ubuzima bw’abayigize mu kaga.

Iyo midugudu y’icyitegererezo kandi yagiye ishyirwamo ibikorwa remezo bitandukanye uhereye ku bikenerwa buri munsi nk’amazi, amashanyarazi, imihanda, amashuri, ingo mbonezamikurire, ibiraro bikorerwamo ubworozi, ibibuga byagenewe imyidagaduro n’ibindi.

Ubuyobozi bw’Ingabo z’u Rwanda (RDF) butangaza ko umushinga nyamukuru wakoze kuri iyo midugudu y’icyitegererezo ari uwo Kubaka Umudugudu w’Icyitegererezo wa Munini mu Karere ka Nyaruguru, wuzuye utwaye amafaranga y’u Rwanda miliyari 15.7, ukaba utuzwamo imiryango 48.

Uwo Mudugudu ugizwe n’ibyiciro bitatu by’inyubako zo guturamo, aho buri cyiciro kigizwe n’amacumbi 16. Ubarizwamo kandi ikigo cy’ishuri cya G.S. Munini kigizwe n’ibyumba by’amashuri 18, inyubako y’ubuyobozi, laboratwari igezweho, icyumba cya mudasobwa, inzu yo kuriramo (refectoire) ifite ubushobozi bwo kwakira abantu 1000, ibibuga by’imikino, inzira zoroshya imigenderanire ndetse n’Irerero rifite amashuri n’igikoni.

Uwo Mudugudu kandi urimo ibikorwa remezo byoroshya imibereho y’abaturage nk’ikiraro cyo kororeramo amatungo magufi, ishyamba, n’Agakiriro, isoko, ibikorwa remezo by’amazi, imihanda, n’ibindi.

Ubuyobozi bwa RDF kandi, buvuga ko kuri uyu munsi hanatahwa indi midugudu itatu y’icyitegererezo mu Karere ka Karongi, aka Kayonza n’aka Nyaruguru yuzuye itwaye amafaranga y’u Rwanda asaga miliyari 6.7.  

Uretse iyo midugudu y’icyitegererezo uko ari ine, muri uyu mwaka Ingabo z’u Rwanda zujuje indi midugudu 32 yubakiwe abarokotse Jenoside yakorewe Abatutsi mu Turere twose w’Igihugu. Uwo mushinga wuzuye  utwaye amafaranga y’u Rwanda asaga miliyari 11 z’amafaranga y’u Rwanda.

Hari izindi nzu zigezweho zubatswe mu Busanza mu Mujyi wa Kigali zigenewe kwimurirwamo imiryango 840 ndetse n’izindi zubatswe mu Karere ka Nyagatare zatwaye amafaranga y’u Rwanda asaga miliyari 8.5

Umuvugizi w’Ingabo z’u Rwanda Col. Ronald Rwivanga yavuze ko muri rusange muri uyu mwaka RDF yujuje imishinga 70 iza gufungurwa kuri uyu munsi wo Kwibohora wizihizwa ku nsanganyamatsiko igita iti, “Isoko yo Kwigira”.

Uretse imishinga y’inyubako z’amacumbi, indi mishinga yuzuye irimo  imihanda, amashuri, amasoko, ibiraro, ikigo cy’ubushakashatsi kuri kanseri zifata urwungano ngogozi, imishinga y’ubuhinzi n’ubworozi, ndetse n’iyo kubungabunga ibidukikije.

Indi mishinga irimo Ishuri Rikuru Nkomatanyamyuga (IPRC), Ingo Mbonezamikurire zitandukanye (ECDs), ibikorwa by’amashanayarazi n’ibindi binyuranye.

Col Rwivanga ashimangira ko iyo mishinga yose igamije kugira uruhare rukomeye mu iterambere ry’Igihugu no kunoza imibereho y’Abanyarwanda ikarushaho kuba myiza.  

Yagize ati: “Kwibohora ntibyari ukurwanya no kunesha ubuyobozi bubi; ahubwo ni no kunoza imibereho n’ubuzima by’Abanyarwanda. RDF yizera ko mu rwego rwo guharanira amahoro n’umutekano birambye, dukwiye no guharanira gukuraho ibibangamira imibereho myiza.”

Yakomeje agira ati: “Ni muri urwo rwego nka RDF dukorana n’abanyafanyabikorwa batandukanye iharanira kugira uruhare mu guhindura ubuzima bw’abaturage bacu.”

Mu mwaka wa 2020, hatashywe imidugudu y’icyitegererezo 14 kuri ubu icumbikiye imiryango 318, inzu 286 zatujwemo imiryango 561 y’abarokotse Jenoside yakorewe Abatutsi mu 1994.

Icyo ni cyo gihe hatashywe Umudugudu w’Icyitegererezo wa Gishuro mu Karere ka Nyagatare watujwemo imiryango 64. Mu mwaka wakurikiyeho wa 2021 hatashywe Umudugudu w’Icyitegererezo wa Kinigi mu Karere ka Musanze, watujwemo imiryango 144.

Hari n’indi mishinga nk’iyo yatwaye akayabo k’amamiliyari yuzuye mu tundi Turere tw’Igihugu ndetse kuri ubu ikaba icumbikiye amagana y’Abanyarwanda batagiraga aho haba batekanye.

Hubatswe n’amacumbi agenewe abarokotse Jenoside yakorewe Abatutsi mu Turere twose tw’Igihugu

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA