Kwibohora 29: Abanyamuryango ba FPR Inkotanyi i Kigali basabwe kurangwa n’ibikorwa 
Amakuru

Kwibohora 29: Abanyamuryango ba FPR Inkotanyi i Kigali basabwe kurangwa n’ibikorwa 

NTAWITONDA JEAN CLAUDE

July 3, 2023

Abanyamuryango ba FPR Inkotanyi mu Kagari ka Kanserege Murenge wa Kagarama n’abo mu Kagari ka Nunga mu Murenge wa Gahanga mu Karere ka Kicukiro, mu Mujyi wa Kigali, basabwe kurangwa n’ibikorwa ubwo berekwaga ibyagezweho n’imigambi y’Umuryango. 

Babigarutseho mu Nteko Rusange y’Umuryango FPR Inkotanyi mu Kagari ka Kanserege na Nunga ku Cyumweru taliki 02 Nyakanga 2023. 

Rtd col. Jules Rutaremera, avuga ko imigambi ya RPF Inkotanyi itavuze gushaka gucyura impunzi ahubwo ivuga gukemura ikibazo gitera ubuhunzi bikajyana bo gucyura za zindi ziri hanze.

Ati: “Ugomba kureba igitera ibintu ariko ku gihe cya Habyarimana wasangaga byose bizingiye kuri ya Leta y’igitugu”.

Yagarutse kandi ku munsi w’ubwigenge avuga ko Abanyarwanda babonye ubwigenge igice, akomoza ku rugamba rwo kubohora Igihugu, amateka y’u Rwanda n’ivuka ry’Umuryango FPR Inkotanyi.

Yagize ati: “Iyo u Rwanda ruza kugira amateka meza, rukagira ubwigenge nyakuri ntabwo twakabaye tuvuga amateka mabi yaranze u Rwanda. Nta n’ubwo twakabaye tuvuga umunsi wo kwibohora kuko iyo tuza kugira ubwigenge buhamye ntabwo twakabaye tuvuga umunsi wo kwibohora”.

Imwe mu myanzuro yafashwe mu Kagari ka Nunga, harimo kuba abana bataye ishuri abamaze kurisubizwamo ari abana 15 kandi bagahabwa imyambaro y’ishuri n’ibindi bizatangwa nyuma.

Habimana Vedaste, Umuyobozi w’Umuryango FPR Inkotanyi mu Kagari ka Kanserege, yabwiye Imvaho Nshya ko abanyamuryango bakwiye kuba bandebereho.

Agira ati: “Bandebereho icyiza, umunyamuryango wa FPR Inkotanyi aho mu Mudugudu, numubona atambutse, ubona imyitwarire ye, umubona mu migambi Leta ifite myiza, buri munyamuryango abyiyumvemo, yumve ko ari itara rimurikira abandi”.

Prof Karangwa Chrysologue, umwe mu banyamuryango ba FPR Inkotanyi, avuga ko abanyamuryango bakwiye kugaragaza ibikorwa kuko ngo kuba umunyamuryango ntibireberwa ku myenda iriho ibirango by’umuryango FPR Inkotanyi gusa.

Yifashishije umugani w’Ikinyarwanda yagize ati “Vuga numve irutwa na kora ndebe”. 

Yibukije abanyamuryango ko kutitabira inama z’Umuryango cyaziraga kikaziririzwa.

Jules Ndamage na Nirere Madeleine bombi ni abanyamuryango ba FPR Inkotanyi, bavuga ko abari mu nzego z’ubuyobozi bw’umuryango ku rwego rw’Akagari, bityo bakwiye kwegera abaturage.

Abana 15 bagaruwe mu ishuri bagenewe imyambaro y’ishuri

Bavuga kandi ko Umuryango ugomba gukomera uhereye ku Mudugudu. 

Uwizeyimana Eric, Komiseri w’imiyoberere mu Kagari ka Kanserege, avuga ko hakozwe imihanda y’imigenderano kandi ishyirwamo kaburimbo.

Umuhanda unyura mu Mudugudu wa Kinunga, Ituze ugakomeza mu Mudugudu wa Byimana na wo washyizwemo kaburimbo.

Yagize ati: “1/3 cy’imihanda y’imigenderano irimo kaburimbo ikindi ni uko isigaye ishobora kugendeka”.

Bishimira ko ruhurura bari bafite yatezaga ikibazo cy’amazi menshi mu Mudugudu wa Byimana, ubu ngo yarakozwe n’icyo kibazo cyarakemutse.

Abaturage ba Kanserege kugeza ubu batangiye kwishakamo ibisubizo kugira ngo bashobore kwikorera kaburimbo kandi Umujyi wa Kigali ukabatera inkunga ya 70%.

Abanyamuryango bo mu Mudugudu wa Bwiza bamaze gukusanya miliyoni 17 mu gihe basabwa gukusanya miliyoni 90, Umujyi wa Kigali ukabatera inkunga ya 70% ya miliyoni 300 akenewe kugira ngo biyubakire umuhanda. 

Muri gahunda ya EjoHeza hamaze kwishyura 21% by’abatuye aka Kagari, hakagaragazwa ko umubare ukiri hasi bityo ko hakwiye ubukangurambaga bwisumbuyeho. 

Uwizeyimana agaragaza ko imbogamizi zikirimo ari uko hari abagifite imyumvire yuko gahunda ya EjoHeza ari iy’abantu bafite ubushobozi buke.

Muri gahunda y’Intore Solution hamaze kwandikwa abantu 2,583. Muri gahunda zijyanye n’ubukungu, umwaka urangiye abanyamuryango bamaze kwishyura 98.3%.

Mu Kagari ka Kanserege habarurwa abanyamuryango 1,457 bakoresha ubundi bwishingizi.  

Abanyamuryango ba FPR Inkotanyi bashoboye kwishyurira Mituweli imiryango 56 y’abatishoboye kandi bubatse inzu 11 zubakiwe abatishoboye. 

Akomeza agira ati: “Urugaga rw’abagore rushamikiye ku Muryango FPR Inkotanyi rwatangije gahunda ya ‘Dusasirane’ bityo bakajya bizigama amafaranga 200 buri cyumweru. Bashoboye gukusanya miliyoni isaga 1.5 basasira abatishoboye babagurira matola”.

Mu miyoborere myiza, abagize Urugaga rw’Abagore n’inshuti z’Umuryango bakoze ubukangurambaga hagamijwe kugabanya amakimbirane yo mu ngo.

Kugeza ubu abanyamuryango ba Kanserege bishimira ko bari ku gipimo cyiza cy’ubumwe n’ubwiyunge kuko ngo nta ngengabitekerezo ya Jenoside yigeze igaragara muri aka Kagari mu gihe cy’imyaka ibiri.

Abanyamuryango ba FPR Inkotanyi mu Kagari ka Kanserege basabwe kutaba vuga numve
Abagize Urugaga rw’Abagore mu Muryango FPR Inkotanyi mu Kagari ka Nunga bakoze umukimbagiro

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA