Kwibuka 30: Ubuhamya bwa Ayinkamiye: Imyaka 30 irashize twongeye kubona ubuzima
Amakuru

Kwibuka 30: Ubuhamya bwa Ayinkamiye: Imyaka 30 irashize twongeye kubona ubuzima

NYIRANEZA JUDITH

April 7, 2024

Marie Louise Ayinkamiye watanze ubuhamya bw’ibyamubayeho mu gihe cya Jenoside yakorewe Abatutsi mu 1994, ubwo yari afite imyaka 11 y’amavuko, yavuze ko hashize imyaka 30 bongeye kubona ubuzima.

Ni ubuhamya yatambukije kuri iki Cyumweru tariki ya 7 Mata 2024, mu muhango wo gutangiza icyumweru cy’icyunamo n’iminsi 100 yo kwibuka ku nshuro ya 30 Jenoside yakorewe Abatutsi mu 1994.

Ayinkamiye yavukiye mu Ntara y’Iburengerazuba mu Karere ka Ngororero mu Murenge wa Nyange, avuga ko hari byinshi yabonye ariko ko uko yagiye akura hari n’ibindi yagiye asobanukirwa.

Yavuze ko babagaho mu buzima bwo kutagira umutekano wuzuye kuko bari Abatutsi. Mu 1990 hagati y’amatariki 11-15, umubyeyi we, wavukaga muri Kibirira hishwe Abatutsi barenga 350, ari bwo umuryango we wose washize, atangira kubona ko babayeho ubuzima tudafitiye uburenganzira.

Yagarutse ku buzima bw’inzitane babayemo, kuko na mbere ya Jenoside babagaho batotezwa.

Ati: “Ni kenshi cyane mu rugo amajoro menshi numvaga amafirimbi avuga nkabona ababyeyi baratubyukije bakajya kuducumbikisha mu baturanyi cyangwa ku Kiliziya cyangwa mu Babikira. Ikindi ni  uko ishuri nigagaho twari Abatutsi babiri, tugakunda gukorerwaho umwitozo wo kuduhagurutsa ngo Abatutsi bahaguruke n’Abahutu bahaguruke.

Icyanteraga igikomere gikomeye ni uko nabonaga mu rugo turi abantu twifashije tutagombye kuba turi abantu bameze gutyo, najyaga ntekerezako bibaye  ari ibigurwa  bari bube barabiguze ngo natwe twibone mu muryango nabonaga abandi benshi babarizwamo kandi bikadutera ipfunwe mu bandi.”

Mu 1994 muri Mata ku itariki ya 7 ubwo bari mu rugo mu muryango, ntiyamenye ko gupfa k’uwari Perezida Habyarimana bibagiraho ingaruka, ariko akabona abandi barijimye, harimo ikintu kidasanzwe. Ati: “Mu rugo iwacu twari duhari turi abana 5 muri 7, ku ya 8 mama yari yagiye i Gitarama kureba umwisengeneza we wari urwaye, byaje kumuviramo amahirwe yo kurokokera I Kabgayi. Musaza wanjye mukuru w’imfura nawe yafashe urugendo mu ijoro ajya i Kabgayi, nawe yaje kurokokerayo, Nari mfite mukuru wanjye mukuru yari yaragiye kwiha Imana ahitwa i Mukarange.

Ibihe bidasanzwe ku bahigwaga, ntaho babonaga ubuhungiro

Ku itariki ya 8 [….] mu gitondo papa abwira mukuru wanjye ati jyana murumuna wawe na musaza wawe muto mujye ku Kiliziya (Nyange), natwe nimugoroba  turaza kubasangayo.”

Yagize ati: “Njye nahise mbabwira ngo mwanyemereye nkajya ku mubyeyi wanjye wa batisimu, nari maze iminsi mike mbatijwe nari mpaharaye sinari nzi ko naharokokera. Barambwira bati n’ubundi ntituzi aho umuntu azakirira, nibakureke wigendere. Nazamukanye na musaza wanjye muto, abandi basaza banjye 2 bakuru bari bagiye kwahura amatungo.

Hanyuma tugeze haruguru aho twagombaga gutandukanira nkomereza i Ngobagoba nabo bagiye ku Kiliziya. Mukuru wanjye arambwira ngo ngaho genda, Imana nikugirira neza tugashobora kurokoka ytuzongera tubonane. Ariko ntibyashobotse, Mukutru wanjye ntabwoi nongeye kumubona ukundi.”

Avuga ko nubwo atari ku Kiliziya amakuru yaho umuntu yayamenyaga, kuko akenshi bamenyaga amakuru mabi y’abapfuye, ndetse amenya ko ba bavandimwe be bageze ku kiliziya, mukuru we akajyana na gasaza ke gato mu kibikira akakarya urwara ngo katamukurikira bavayo.

Mukuru wanjye yasubiye ku Kiliziya, hariyo papa, basaza bacu 2 bakuru. Babaye mu Kiliziya birwanaho uko bari bashoboye, gusa nyuma byaje kuba bibi.

Ati: “Ku itariki ya 16 Mata 1994, Padiri Seromba wari ukuriye Kiliziya ya Nyange, yatanze itegeko abasirikare bari aho batangira kurasa aho Abatutsi bari bahungiye mu Kiliziya nyuma barayihiritse,  abacu barashira.”

Aho guhungira hari habaye ingume

Yakomeje asobanura uburyo uwo muryango yari arimo hahoraga ibitero bije guhiga umugore wo muri urwo rugo.

Ati: “Kuko urugo rwari rurimo uwo mubyeyi hahoraga ibitero, bakadusohora twese bakaduhagarika hanze. Umugabo wo muri urwo rugo arambwira ngo nibambaza uwo ndi we mbabwire ko ndi umwana wa mukuru we wabaga i Kigali ngo njye mbabwira ko nahaje mu kiruhuko, bakomeje kuza bakaduhagarika hanze bafite amacumu, intwaro bakinjira mu rugo bagasahura ibintu bashaka uwo mudamu, bakamubura, bakagenda.”

Ni urugo rwageragezaga guhisha umubyeyi,iyo bamenyaga ko hari ibitero bajyaga kumuhisha  ibitero byagenda bakamugarura. Ubwo buzima twabubayemo noneho nyuma umugabo ambwira ko yamenye ko ejo hazaza ibitero biturutse iwacu biyobowe n’umugabo witwa Ndungutse.

Akomeza avuga ko bamuhaye umwana wabo bari mu kigero kimwe aramuherekeza  nko mu ma saa kumi bamubwira ahantu amujyana bakora urigendo nk’urw’amasaha 2, ngo amujyane kumuhisha ku wundi mubyeyi, bugiye gucya bahura n’uwo mubyeyi bari bamujyanyeho yikoreye amaboko ati  nanjye abana banjye bamaze kubica, ko ntaho yabajyana.

Ati: “Ntaho mbajyana nanjye abana banjye bamaze kubica, ubwo turakata tugaruka mu rugo, twageze mu rugo mbisikana n’ibitero bivuye gusaka mu rugoi bisohoka nanjye nijirira mu yandi marembo, ibitero by’uwo munsi mbikira gutyo.”

Ayinkamiye yakomeje avuga ko mu kwa 6 ari bwo atangiye kumva bavuga ngo Inkotanyi ziri hafi kandi bati umurambo w’uyu mugore twarawubuze, ubwo bahaguruka mu rugo baragenda. Umugabo abwira Ayinkamiye kwikorera ikirago gisa n’ikimuhishe imbere n’inyuma bakomeza urugendo, ariko ababyeyi bo baje ku munsi ukurikiyeho, bageze ku Rufungo, bahasanga bariyeri umugabo n’iumugore barabica, ubwo bo bari bageze i Rubengera.

Ashimira Inkotanyi zarokoye Abatutsi, bazikesha ubuzima

Ku bw’amahirwe umubikira yaramufashe amujyana ku mudoka y’abazungu b’Abafaransa, babajyana ku ishuri rya Rwimpiri hari zone Turqoise babashyira mu modoka ngo abona abayeho mu Isi atazi, […..] Hari ahantu hari impunzi nyinshi, Abatutsi kuri iryo shuri twari dufite aho tudashobora kurenga.

Abantu bati inkotanyi zifashe igihugu bati turatashye numwa umutima urongeye urandiye numvaga ari njye njyenyine iwacu.

Ati: “Buracya batwuriza imodoka z’Abafaransa turagenda noneho ntibari badutwikiriye, tugera ahantu badukuramo ngo dukomeze imbere, tubona imodoka y’abasirikare b’Inkotanyi ariko naje kwinjiramo baratujyana hari habayeho ubwumvikane hagati y’Abafaransa  n’abasirikare ngo barekure Abatutsi bari bafashe.

Inkotanyi zatugejeje I Nyabisundu i Gitarama dusa n’abatangiye ubuzima mpamenyera amakuru ko mama yarokotse ndanamubona, musaza wanjye muto ndamubona, umukuru yaragiye mu gisirikre dutangira ubuzima bukomeye bwo kwiyubaka.

Ayinkamiye ashima ingabo z’Inkotanyi zabarokoye ndetse akavuga ko imyaka 30 ishize ari bwo bongeye kubona ubuzima. Aho umuntu abaho atekanye, ari Umunyarwanda ufite uburenganzira busesuye, agashima umurongo mwiza w’Ubuyobozi Bukuru bw’Igihugu wo kubaho neza nk’Abanyarwanda, by’umwihariko nk’abarokotse bafite imbaraga nyinshi n’umwete mwinshi wo kurinda ibyagezweho.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA