Kwibuka28: Ishyaka rya UDPR rirasaba Abanyarwanda kurangwa n’ubupfura
Imibereho

Kwibuka28: Ishyaka rya UDPR rirasaba Abanyarwanda kurangwa n’ubupfura

NTAWITONDA JEAN CLAUDE

April 7, 2022

Ubuyobozi bw’Ishyaka Riharanira Ubumwe bw’Abanyarwanda na Demokarasi (UDPR), muri iki gihe Abanyarwanda n’inshuti z’u Rwanda bibuka ku nshuro ya 28 Jenoside yakorewe Abatutsi mu 1994, burakangurira abayoboke n’Abanyarwanda kurangwa n’ubupfura mu bikorwa bijyanye no kwibuka.

Mu itangazo rigenewe abanyamakuru UDPR yashyize hanze kuri uyu wa 07 Mata 2022, igaragaza ko Abatutsi bishwe muri Jenoside basaga miliyoni.

Abatutsi bishwe urw’agashinyaguro bazira uko bavutse.

Perezida wa UDPR, Depite Nizeyimana Pie yagize ati “Turakangurira abayoboke ba UDPR n’Abanyarwanda muri rusange, kurangwa n’indangagaciro z’ubumuntu n’ubupfura mu bikorwa byose bijyanye no kwibuka, kunamira, guha agaciro n’icyubahiro Abazize Jenoside yakorewe Abatutsi”.

UDPR itangaza ko Jenoside yakorewe Abatutsi yashegeshe umuryango nyarwanda, mu nzego zose z’ubuzima bw’Igihugu.

Yasize ibibazo byinshi by’ihungabana, imfubyi, abapfakazi n’inshike basigaye iheruheru, hasenyuka ibikorwa remezo byinshi.

Ishyaka UDPR rirashimira by’umwihariko Perezida wa Repubulika Paul Kagame, wagaruye ubumwe bw’Abanyarwanda nyuma yo guhagarika Jenoside, bityo u Rwanda rukaba rugeze ku kigero gishimishije cy’ubwiyunge.

Ati: “Yatumye imfubyi n’abapfakazi bongera kubona imibereho, bigaruramo icyizere cyo kubaho, ubu bafite ishyaka ryo kwigira no kuba ab’agaciro aho kuguma mu bwigunge”.

Umutekano n’ihumure mu banyarwanda bikomoka kuri politiki nziza, birwanya ivangura aho riva rikagera.

Aha ni ho ubuyobozi bw’Ishyaka UDPR buhera buvuga ko Perezida Kagame yakuyeho umuco wo kudahana, hagashyirwaho amategeko ahana icyaha cyo kurwanya ingengabitekerezo ya Jenoside, icy’ihakana n’ipfobya byaryo, n’ibindi byaha bifitanye isano na Jenoside.

Ishyaka UDPR ryifurije Nyakubahwa Perezida wa Repubulika n’umuryango we n’inzego zose bafatanyije kuyobora igihugu n’Abanyarwanda bose, gukomera muri ibi bihe bikomereye Igihugu, hibukwa Abatutsi bazize Jenoside muri 1994.

Asaba abayoboke b’Ishyaka UDPR, kuzakomeza kurangwa n’ubupfura bitabira gufasha abagizweho ingaruka za Jenoside.

Ati: “Muzirinde ibikorwa cyangwa imvugo zose z’urwango n’ibyaha bifitanye isano n’ingengabitekerezo ya Jenoside.

Mukomeze kubumbatira, indangagaciro z’ubumwe n’ubwiyunge, kugira ishyaka n’urukundo muharanira ishema ry’igihugu, mukomeze mutoze urubyiruko kumenya ko gushyira ubunyarwanda ku isonga, ari ryo pfundo ry’ubusugire bw’igihugu cyacu”.

Depite Nizeyimana yihanganisha abacitse ku icumu rya Jenoside akabasaba gukomera no guharanira iterambere.

Ati: “Komera, wacitse ku icumu rya Jenoside yakorewe Abatutsi, ntukababare mpari kandi Jenoside ntizongere kubaho ukundi, humura, haranira iterambere ubeho neza”.

Insanganyamatsiko y’uyu mwaka iragira iti ‘Twibuke Twiyubaka’.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA