Kwibuka28: PSP irasaba urubyiruko kwima amatwi abahakana Jenoside
Imibereho

Kwibuka28: PSP irasaba urubyiruko kwima amatwi abahakana Jenoside

NTAWITONDA JEAN CLAUDE

April 8, 2022

Kuva kuri uyu wa Kane taliki 07 Mata mu Rwanda no ku Isi hatangiye icyunamo cyo kwibuka ku nshuro ya 28 Jenoside yakorewe Abatutsi mu 1994.

Abagize uruhare muri Jenoside bakora ibishoboka byose kugira ngo ibyo bakoze bitavugwa.

Kuri bo n’ibimenyetso bya Jenoside ntibifuza ko byabaho.

Aha niho ubuyobozi bw’Ishyaka ry’Ubwisungane bugamije iterambere (PSP) busaba Abanyarwanda n’abatuye mu mahanga by’umwihariko urubyiruko, kwima amatwi abahakana Jenoside yakorewe Abatutsi.

Mu kiganiro kigufi, Perezida wa PSP Nkubana Alphonse yahaye Imvaho Nshya, yavuze ko urubyiruko rukwiye gukurikira ibiganiro bitangwa hirya no hino mu midugudu no ku bitangazamakuru.

Yavuze kandi ko rwirinda imbuga nkoranyambaga zikoreshwa n’abagize uruhare muri Jenoside cyangwa n’izindi zikoreshwa n’abashyigikiye ihakana n’ipfobya.

Yibutsa ko guhakana no gupfobya Jenoside yakorewe Abatutsi ari icyaha gihanwa n’amategeko kandi ko n’icyaha cya Jenoside ari icyaha kidasaza.

Yagize ati: “Icyo dusaba urubyiruko ruri mu Rwanda n’urutuye mu mahanga, ni ukwima amatwi abahakana Jenoside yakorewe Abatutsi.

Nirukurikire ibiganiro bitangwa ku bitangazamakuru byo mu Rwanda runitabire gahunda zo kwibuka ni bwo ruzamenya amateka nyakuri, ruyashingireho rwubaka ejo heza hazaza”.

Ubuyobozi bw’Ishyaka PSP bwakomoje ku ngabo zari iza RPA zahagaritse Jenoside yakorewe Abatutsi.

Asobanura ko Inkotanyi ari ubuzima kuko zahagaritse Jenoside abantu bakongera kubaho nta guhangayika.

Nubwo abarokotse Jenoside yakorewe Abatutsi bahuye n’ibikomere bitoroshye, Nkubana avuga ko Leta y’Ubumwe ikora uko ishoboye kugira ngo babonerwe amacumbi n’ibindi.

Ati: “Abarokotse Jenoside bahuye n’ibikomere byo ku mubiri ndetse no ku mutima. Dushimira ubuyobozi bwiza bw’igihugu bwashoboye kubabonera amacumbi, baravuzwa, abato bakomeza amashuri bashobora kwiyubakamo icyizere cyo kongera kubaho”.

Ubuyobozi bwa PSP burihanganisha Abarokotse Jenoside yakorewe Abatutsi, bukibutsa ko ‘Kwibuka Twiyubaka’ ari wo musingi wo gukomera no kubaho.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA