Kwibuka28: Urubyiruko rwibutse bagenzi barwo bazize Jenoside 
Amakuru

Kwibuka28: Urubyiruko rwibutse bagenzi barwo bazize Jenoside 

NTAWITONDA JEAN CLAUDE

May 20, 2022

Uyu munsi ku wa 20 Gicurasi 2022, hirya no hino mu Gihugu habereye Ihuriro ry’urubyiruko ryiswe Igihango cy’Urungano mu rwego rwo kwibuka urubyiruko rwishwe muri Jenoside yakorewe Abatutsi mu 1994. 

Ni  igikorwa cyateguwe na Minisiteri y’Urubyiruko n’Umuco ku bufatanye n’Imbuto Foundation, ku nsanganyamatsiko igira iti: “Urubyiruko twahisemo kuba umwe -Igihango cyacu”.

Ku rwego rw’Umujyi wa Kigali, urubyiruko rusaga 400 rwaturutse mu Turere 3 tugize uyu mujyi n’Akarere ka Bugesera rwateraniye ku Rwibutso rwa Jenoside rwa Kigali ruri ku Gisozi. Urundi rugera kuri 200 ruri mu mahanga rwitabiriye iki gikorwa rwifashishije ikoranabuhanga.

Minisitiri w’Ubumwe bw’Abanyarwanda n’ Inshingano Mboneragihugu Dr Bizimana Jean Damascène yahaye ikiganiro uru rubyiruko, arusaba kwihatira kumenya amateka Igihugu cyanyuzemo rukayakuramo isomo no kumva ko rufite inshingano yo kurwanya ingengabitekerezo ya Jenoside.

Yasobanuriye urubyiruko ko Jenoside itarangwa no kwica gusa, kwica biza bisoza umugambi wo gukomeretsa abantu mu bitekerezo byabo, mu mibereho yabo, kubambura ubumuntu.

Ati: “N’iyo waba utarabica, amategeko abisobaruna atyo Jenoside iba yatangiye, no mu byaha bihanirwa icyo kirimo.  Ingengabitekerezo ya Jenoside akenshi igaragarira mu mitekerereze, mu myumvire, mu myemerere, icyo rero ni ikintu tugomba kurwanya, ni inshingano y’Igihugu, ni inshingano cyane cyane y’urubyiruko kuko uko imibare ibigaragaza, abantu bari hejuru ya 70% by’Abanyarwanda ni abafite munsi y’imyaka 30. Ibi birerekana ko ari mwe mufite inshingano cyane cyane yo kumenya aya mateka no kurinda Igihugu kuko ni mwe benshi, ni mwe mbaraga z’igihugu”.

Minisitiri Dr. Bizimana yavuze ko abakoze Jenoside yakorewe Abatutsi bakoze ishyano, barenze kuri nyirantarengwa y’u Rwanda.

Ati: “Mu muco nyarwanda habagamo kwifurizanya ubuzima kandi n’ubu ni ko bimeze n’ikibibereka cyoroshye; iyo uhuye n’umuntu mugitondo ijambo rya mbere umubwira ni waramutse, wiriwe, uraho, wajya kumusezeraho ukamubwira ngo wirirwe, uramuke, urabeho… Icyo Umunyarwanda yifuriza undi muri kamere, mu mibereho yacu ya buri munsi ni ukubaho”.

Yakomeje agira ati: “Abakoze Jenoside barenze kuri iyo nyirantarengwa y’u Rwanda, nyirantarengwa y’u Rwanda ni wirirwe, uramuke, urote Imana ntabwo ari ukwica. Buriya bakoze ishyano, mujye mubimenya muvuge muti twebwe tuzarinda u Rwanda ko rukorerwamo ishyano”.

Umuyobozi w’Umujyi wa Kigali wungirije Urujeni Martine yabwiye urubyiruko ko iki gikorwa cyo kwibuka kirufasha kumenya amateka ya Jenoside yakorewe Abatutsi no kurwanya ingengabitekerezo ya Jenoside, hakabaho gufata ingamba zo kubaka u Rwanda.

Yasabye urubyiruko kugaya bagenzi barwo babaye ibigwari bakishora muri Jenoside yakorewe Abatutsi mu 1994.

Ati: “Nta mpamvu n’imwe bari bafite yo gukora ubwicanyi ariko byarabaye kuko hari urubyiruko ruri mu myaka nk’iyanyu rwishe abana, rwashinyaguriye abagore. Ariko kandi turashimira n’urubyiruko rwatanze ubuzima bwarwo, rwatanze amaraso yarwo kugira ngo ruhagarike ubwicanyi bwari mu Rwanda muri icyo gihe, turavuga urubyiruko rwari muri RPF, bari bato ariko batanze ubuzima. Ni umwanya wo kubibuka na bo no kuzirikana ubwitange bwabo”.

Yasabye urubyiruko guharanira kwiyubaka no kwigirira icyizere cyo kubaho kandi rukabaho neza, rugaharanira ko Jenoside itazongera kubaho ukundi.

Urubyiruko rwahawe ikiganiro ku mateka yaranze u Rwanda, rugaragaza ko rwifuza ko rwarushaho kubona amakuru ajyanye na yo; rukagira uburyo bwo kubona ibitabo byayo n’ururi mu mahanga rukabasha kujya ruyasoma.

Minisitiri w’Ubumwe bw’Abanyarwanda n’ Inshingano Mboneragihugu Dr Bizimana Jean Damascène
Umuyobozi w’Umujyi wa Kigali wungirije Urujeni Martine

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA