Kwibuka29: Depite Mukabagwiza yasabye abafite amakuru kuyatanga
Amakuru

Kwibuka29: Depite Mukabagwiza yasabye abafite amakuru kuyatanga

NTAWITONDA JEAN CLAUDE

June 15, 2023

Hon Edda Mukabagwiza, Visi Perezida w’Inteko Ishinga Amategeko umutwe w’Abadepite, yasabye abafite amakuru y’ahari imibiri itarashyingurwa mu cyubahiro ko batanga amakuru kugira ngo ishyungurwe mu cyubahiro.

Yabigarutseho ubwo hibukwaga ku nshura ya 29 Jenoside yakorewe Abatutsi mu Murenge wa Rwezamenyo mu Karere ka Nyarugenge mu Mujyi wa Kigali, mu cyumweru gishize. 

Asaba ababitse amakuru kuyatanga kugira ngo na babandi biciwe ababo bumve baruhutse ku mutima.

Yagize ati: “Iyo ushyinguye umubiri w’uwawe, nubwo n’uburemere busanzwe budahagarara bw’ibyakubayeho ariko hari igice gitoya uruhuka”.

Yihanganisha abarokotse Jenoside yakorewe Abatutsi akabibutsa ko bafite ubuyobozi bwiza kandi ko nta Jenoside izongera kuba muri iki gihugu.

Ibi ngo bikwiye kubaha icyizere cyo kubaho no kugira intego yo kurwanya ingengabitekerezo ya Jenoside aho yagaragara hose.

Yavuze ko ingengabitekerezo ya Jenoside igomba kurandurwa, akomeza ashima ingabo za RPF zahagaritse Jenoside yakorewe Abatutsi. 

Mu buhamya bwatanzwe na Murorunkwere Zaudjia wavukiye mu Murenge wa Rwezamenyo, ari naho yarokokeye, yavuze ko Jenoside yabaye atuye ku Ntaraga mu Murenge wa Kimisagara, imutwara uwo bashakanye. 

Avuga ko bahishwe n’utarahigwaga ariko ikibabaje ngo ni uko yabasigaga mu nzu akajya kwica abandi Batutsi.

Ashimira FPR yabatabaye. Ati: “Ndashimira FPR yadutabaye kuko tuba twarazimiye. Ndashimira FARG yaduhaye uburyo bwo kwiga, utwana twasigaye twashoboye kwiga twubaka ingo, ubuzima burakomeza”.

Umuyobozi Nshingwabikorwa w’Akarere ka Nyarugenge, Ngabonziza Emmy, avuga ko abagize uruhare muri Jenoside yakorewe Abatutsi kimwe mu bibabaza kikanabatera ipfunwe, ni gahunda zo kwibuka abo bavukije ubuzima babaziza ko ari Abatutsi.

Akomeza avuga ati: “Uyu ni umunsi ukomeye kuri twe ariko bihora iteka ryose ari bishya kwibuka Jenoside yakorewe Abatutsi kuko si ibintu tumenyera mu mitima yacu nta nubwo duteze kubimenyera ukundi kuko ni inshingano yacu no kwibuka abacu”.

Ubuyobozi bw’Akarere ka Nyarugenge busaba abaturage gukomeza amahitamo yabo yo kubaka u Rwanda ruzira amacakubiri.

Umuryango uharanira inyungu z’abarokotse Jenoside (IBUKA) mu Karere ka Nyarugenge, ushima gahunda za Leta zirimo kuba yarasubije mu ishuri abari barabujijwe amahirwe yo kwiga, bakongera gusubira mu ishuri.

Ugaragaza ko hari abaheranywe n’ihungabana bigatuma badashobora kwiga kandi ngo kutiga bituma batabaho ubuzima bwiza nk’abandi.

IBUKA mu Karere ka Nyarugenge ishima ko abarokotse Jenoside yakorewe Abatutsi bahawe amacumbi abandi bagasanirwa ayasenyutse.

Anashimira Umuryango FPR Inkotanyi wahagaritse Jenoside yakorewe Abatutsi kuko ngo iyo utayihagarika, ntawari kuba yibuka, nta n’uwari kuba abara inkuru.

Ati: “Turayishimira kuba yaraduhaye umwanya wo kwibuka, tukanashimira Perezida wa Repubulika Paul Kagame wayoboye urugamba rwo guhagarika Jenoside”.

Hashyinguwe imibiri 20 yabonetse mu Mirenge ya Kanyinya, Kimisagara, Mageragere, Nyamirambo ndetse no mu Murenge wa Nyarugenge.

Imibiri yashyinguwe mu cyubahiro mu Rwibutso rwa Nyanza ya Kicukiro mu Karere ka Kicukiro mu Mujyi wa Kigali.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA