Kwigirira icyizere no guhitamo neza ni inzira yo kwikura mu bukene- LODA
Amakuru

Kwigirira icyizere no guhitamo neza ni inzira yo kwikura mu bukene- LODA

NTAWITONDA JEAN CLAUDE

February 27, 2022

Abafatanyabikorwa batishoboye bagerwaho na gahunda zitandukanye hagamijwe kubakura mu bukene, by’umwihariko binyuze muri VUP, bishoboka kandi bikoroha iyo umuntu yifitiye icyizere kandi akagira amahitamo meza amufasha kwikura mu bukene.

Ubu ni ubutumwa Umuyobozi ushinzwe gahunda zo kurengera abatishoboye muri LODA, Bwana Gatsinzi Justine yagejeje ku bakozi bo mu Turere, n’Imirenge ubwo basozaga amahugurwa y’iminsi 5 yaberaga mu Karere ka Muhanga.

Abahuguwe bahawe ubumenyi ngo na bo bazajye guhugura Abajyanama b’Imibereho n’Iterambere mu Midugudu n’Abashinzwe Iterambere ry’ubukungu mu Tugari, bo begereye abaturage ngo bazarusheho kubaba hafi, kubagira inama no kubakurikirana hagamijwe ko bikura mu bukene.

Gatsinzi yagize ati: “Abahugurwa ni mu rwego rwo guteza imbere imibereho y’abaturage bafashwa kuko harimo abakene, badashobora kugera kuri serivisi z’ibanze akenshi usanga bihebye batifitiye icyizere. Hari abantu usanga batifitiye icyizere cyangwa bazi ko ubuzima babayeho ejo n’ejobundi, uko ababyeyi babo babayeho ari ko bwaguma.

Ariko amahitamo yabacisha mu nzira y’iterambere usanga ubwizigame bwabo ari buke kandi bafashwa nta n’imitungo bafite, uko bawukoresha kenshi na kenshi bisaba ubushishozi, kububakamo icyizere ni yo nzira yabafasha kwikura mu bukene, bakigira”.

Gatsinzi yanagarutse ku kamaro ko kuba inzego zitandukanye zihuje imbaraga zizahugura abandi, kuko igishoro muntu ari cyo gikomeye.

Ati: “Aya mahugurwa yabaye umwanya wo kumenya ko kuzamura abaturage bitareba urwego rumwe. Umuturage si uwa VUP, hari ba goronome, abashinzwe ibikorwa by’umurimo n’iterambere mu Karere, abashinzwe amakoperative n’abashinzwe imibereho myiza, aho hose hakorerwa ibintu bitandukanye ibyo byose bitanga inzira yaho umuturage aca ava mu bukene.”

Umuyobozi w’Ishami ry’Imibereho myiza mu Karere ka Nyaruguru Ndayiragije Simon yavuze ko amahugurwa bahawe agamije gufasha abaturage kwivana mu bukene.

Ati: “Aya mahugurwa agamije gufasha abaturage dufite bakiri mu bukene kwikura mu bukene, hakemurwa ibibazo bijyanye n’imicungire bacunga nabi ibyo bahabwa n’abagitegereje guhora bafashwa. Kubegera bizabafasha kwigirira icyizere.”

Umuyobozi w’imibereho myiza mu Murenge wa Gashari mu Karere ka Karongi, Uwayisaba Clothilde yavuze ko bungutse ubumenyi bugiye kubafasha kurushaho kwita ku batishoboye bababa hafi babatoza kwizigama.

Umuyobozi ushinzwe gahunda zo kurengera abatishoboye muri LODA, Bwana Gatsinzi Justine asoza amahugurwa (Foto Nyiraneza J.)

Ati: “Nyuma y’aya mahugurwa twungutse ubumenyi bwinshi, twahaboneye uburyo umuntu ashobora kwizigama, uburyo umuntu ashobora gucunga neza amafaranga afite, uko umuntu azigama atari uko hari ibyo yasaguye ahubwo ari uko yabitekereje neza.”

Uwayisaba yavuze kandi ko bize ku kintu kijyanye n’iterambere, basobanukirwa neza ko ari ngombwa guhera ku kwigisha abo batishoboye imyumvire bafite igahinduka.

Umukozi ushinzwe iterambere ry’amakoperative n’ishoramari ry’umurimo mu Murenge wa Nyabimata mu Karere ka Nyaruguru, Mukamana Theodette we yavuze ko nyuma y’aya mahugurwa, mu iterambere rya bariya bantu bagenerwa inkunga na VUP, hari impinduka igiye kubaho kuko mu nshingano bafite bagiye kurushaho gufatanya, n’Abajyanama gukurikirana, gukorana n’Abajyanama b’Imibereho n’Iterambere bashinzwe kubegera cyane ko ari bo babana na bo umunsi ku munsi.

Abahuguwe bahawe ibikoresho bazifashisha mu guhugura abajyanama b’imibereho n’iterambere ndetse n’Abashinzwe Iterambere ry’ubukungu mu Tugari.

Ku ikubitiro amahugurwa yateguwe yabereye ku masite atatu, iya Rwamagana, Musanze na Muhanga, ahahuguwe Uturere 7. Ni amahugurwa yagizwemo uruhare na MINALOC, LODA, UNICEF na World Relief batekereje ikindi cyakorwa ngo Abanyarwanda bave mu guhabwa ingoboka, guhabwa akazi gusa, ahubwo bareba icyakorwa kindi ku buryo mu gihe kizaza bagomba kuba bateye intambwe bava mu bukene.

Aba ni bamwe mu bagenewe impano (Foto Nyiraneza J.)
Abahuguwe bahawe ibikoresho bazifashisha mu guhugura Abajyanama b’Imibereho n’Iterambere ndetse n’Abashinzwe Iterambere ry’ubukungu mu Tugari (Foto Nyiraneza J.)
Umuyobozi ushinzwe imibereho myiza mu Murenge wa Gashari mu Karere ka Karongi, Uwayisaba Clothilde
Umuyobozi w’Ishami ry’Imibereho myiza mu Karere ka Nyaruguru Ndayiragije Simon

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA