Ku nshuro ya mbere muri Tanzania hatowe Miss World Tanzania ikamba Latricia Ian w’imyaka 24 y’amavuko akaba ari we wegukanye ikamba, aho yitezweho kuzahagararira icyo gihugu mu marushanwa y’ubwiza ya ‘Miss World’ rigiye kuba ku nshuro ya 75.

Ni ikamba Latricia yatsindiye ahigitse abakobwa 19 bari bahatanye, uretse kandi kuzahagararira Tanzania muri Miss World 2026, yanahawe ibihembo bitandukanye birimo imodoka yo mu bwoko bwa Mercedes Benz A Class ifite agaciro ka miliyoni 40TSh (arenga miliyoni 22Frw), miliyoni 10 TSh (arenga miliyoni 5Frw) n’ibindi birimo ubwishingizi.

Umuhango wo gutangaza uwegukanye iryo kamba wabereye mu birori byabaye ku cyumweru, ku nyubako yitwa ‘The Super Dome Tanzania’ iba mu Mujyi wa Dar es Salaam. Abari bahagarariye Miss World bahise batangaza ko Tanzania ari cyo gihugu kizakira irushanwa rya Miss World ubwo rizaba riba ku nshuro ya 76 muri Gicurasi 2027.

Ibizagira icyo gihugu icya kabiri ku mugabane wa Afurika cyakiriye iryo rushanwa kuko ku ikubitiro ryakiriwe na Afurika y’Epfo mu 2001, 2008 no mu 2009. Icyakora mu 2002 byari byitezwe ko iri rushanwa ryagombaga kubera muri Nigeria, birangira rijyanywe mu Bwongereza kubera impamvu z’uko iki gihugu cyagaragazaga ubushake buke mu kunoza imyiteguro yaryo.

Biteganyijwe ko irushanwa rya Miss World 2026 rizabera muri Vietnam kuva ku wa 9 Kanama kugeza ku wa 5 Nzeri 2026, ikaba izaba ibaye ku nshuro ya 76.

Ba uwa mbere mu kumenya amakuru agezweho!!!