Ikipe ya Leicester City yigeze gutwara Igikombe cya Shampiyona y’Icyiciro cya Mbere mu Bwongereza muri 2016 yamanutse mu Cyiciro cya gatatu, nyuma yo kunganya na Hull City ibitego 2-2 mu mukino w’Umunsi wa 44 wa Shampiyona y’Icyiciro cya Kabiri, byatumye isoza shampiyona iri ku mwanya wa 23 n’amanota 42.

Shampiyona y’Icyiciro cya Kabiri mu Bwongereza ikinwa n’amakipe 24, atatu ya nyuma akaba ari yo amanuka mu Cyiciro cya Gatatu. Muri uyu mwaka hamanutse amakipe nka Oxford United yabaye iya 22, Leicester City yabaye iya 23 na Sheffield Wednesday yabaye iya nyuma.

Bidasubirwaho, iyi kipe yamanutse mu ijoro ryo ku wa Kabiri, tariki ya 21 Mata 2026. Iyi nkuru yatangaje abakurikira umupira w’amaguru kuko Leicester yatwaye Igikombe cya Shampiyona y’Icyiciro cya Mbere mu Bwongereza “Premier League” ku nshuro ya mbere mu mwaka wa 2016.

Muri rusange, Coventry City itozwa na Frank Lampard ni yo yegukanye Igikombe cya Shampiyona n’amanota 89 ndetse ihita izamuka mu cyiciro cya mbere yaherukagamo mu myaka 25.

Iyi kipe yazamukanye na Millwal yasoreje ku mwanya wa kabiri n’amanota 79. Amakipe arimo Ipswish, Southampton, Middlesbourgh na Wrexham agomba gukina imikino ya kamarampaka yo guhatanira umwanya umwe wo kuzamuka mu Cyiciro cya mbere.

Ba uwa mbere mu kumenya amakuru agezweho!!!