Leta irasaba Abanyarwanda kumenyera gutura muri “Apartements”
Amakuru

Leta irasaba Abanyarwanda kumenyera gutura muri “Apartements”

NTAWITONDA JEAN CLAUDE

June 10, 2022

Mu myumvire ya kinyarwanda na kinyafurika muri rusange, nta kibarutira kuba buri wese yatura mu isambu yita gakondo ye cyangwa umurage yasigiwe n’ababyeyi nk’uko byabaye umuco wahererekanyijwe mu bisekuru. Ariko uko imyaka ihita ibyo biragenda bihinduka, cyane ko ubu Isi yabaye Umudugudu aho ntawumenya aho bwira ageze.

Leta y’u Rwanda yatangiye gutegura igenamigambi ritegura uko abaturage biyongera buri munsi bashobora kuzabona aho gutura n’aho gukorera ibikorwa bibatunga bikanabateza imbere nk’ubuhinzi, ubucuruzi, inganda n’ibindi, mu gihe bazaba bamaze kurenga miliyoni 22 bitarenze mu 2050.

Biteganyijwe ko muri iyo myaka igera kuri 27 isigaye, hejuru ya 70% by’abo baturage bazaba batuye mu mijyi ari na yo mpamvu hatangiye gushyirwa mu bikorwa igishushanyombonera cy’imiturire n’icy’imikoreshereze y’ubutaka bw’u Rwanda hagamijwe gukora ibikorwa bizafasha kubaho neza abo baturage bazaba bakubye inshuro ebyiri abariho ubu.

Minisitiri w’Ubutegetsi bw’Igihugu Gatabazi Jean Marie Vianney, yatangaje ko icyo Guverinoma y’u Rwanda ishyize imbere ari ugukomeza gufasha buri wese gutura mu midugudu ndetse hakongerwa n’inyubako zigeretse (apatrments) zo guturamo kugira ngo bafate umwanya muto w’aho bakabaye bubaka ubundi buso babukoreshe mu nyungu z’ibibatunga bibateza imbere.

Yabigarutseho ku wa Kane taliki ya 9 Kamena, ubwo yahagarariraga Minisitiri w’Intebe mu kugeza ku Nteko Rusange ya Sena ibisobanuro mu magambo ku ngamba zo gukemura ibibazo bigenda bigaragara mu midugudu y’icyitegererezo n’isanzwe Leta yatujemo abatishoboye batari bafite aho baba.

Muri iyo midugudu harimo iya kijyambere igeretse, Abasenateri bakaba bagaragaje ko bishoboka ko abenshi mu baturage batamenyereye gutura mu nyubako zubatswe muri ubwo buryo, ari na yo mpamvu usanga bamwe baragiye bibasirwa n’ibibazo by’umwanda, inzu bahawe zikangirika vuba bitewe n’akamenyero k’imiturire bavutse basanga.

Senateri Twahirwa André yavuze ko abantu bashobora kuba badakunda kuba muri Apartment, nyuma y’ubusesenguzi bwakozwe na Komisiyo ya Sena yasuye abamaze gutuzwa mu midugudu ifite inyubako zigeretse. Yibajije niba Guverinoma itashyira imbaraga mu kubaka imidugudu y’inzu zisanzwe.

Minisitiri Gatabazi yamusubije ko impungenge za Leta ari uko kubaka inzu zisanzwe bitwara ubuso bwagutse cyane bwakabaye butanga undi musaruro.

Inyubako zigeretse zifasha gutuza abantu mu buryo bugezweho kandi batwaye ubuso butoya

Yagize ati: “Iyo wubaka inzu zisanzwe, usanga umudugudu urimo inzu 50 ugasanga ufashe hegitari yose, ariko urebe nk’Umudugudu w’Icyitegererezo wa Kinigi wubatswe kuri metero zitarenze 200 ku ijana, harimo imiryango isaga 140. Urebe aho abaturage bari gutuzwa i Busanza bari batuye, uko banganaga n’inzu bari bafite, usanga bitandukanye n’aho barimo gutuzwa ubu.”

Yakomeje agira ati: “Hari na gahunda turimo gukorana n’Umujyi wa Kigali ahagana za Kimisagara na Nyakabanda, aho bari kubaka ugasanga inyubako imwe ituyemo imiryango 90 cyangwa 100 kandi yari ituye mu kajagari. Bisaba amafaranga menshi ariko ni wo murongo n’ubundi kugira ngo abantu nibura bubake bazamuka n’abantu basanzwe banabimenyere.”

Yakomeje avuga ko nubwo abarimo kubakirwa ari abariho uyu munsi, abana bazavuka ejo n’ejobundi bazasanga ubuzima bubategeka kugira imyumvire mishya yo gutura muri apartements, nk’uko byagiye bigenda mu bihugu byateye imbere ku Isi.

Ati: “Abo turi kubakira ni abariho uyu munsi ariko igisekuru kizakurikira, abazaza bashobora kuzasobanukirwa no gutura muri za apartments.”

Minisitiri Gatabazi yavuze ko kuri ubu mu Rwanda igipimo cy’abatuye mu midugudu kugeza kuri 68%, mu gihe Leta yihaye gahunda yo kugera kuri 80% bitarenze mu 2024.

Yavuze ko hakenewe imbaraga nyinshi kugira ngo ibyo bigerweho, gusa ngo Leta yatangiye gufasha abatishoboye batuye mu manegeka aho imiryango isaga 11,000 yateguriwe gukurwa ahashyira ubuzima bw’abayigize mu kaga.

Ati: “Tugenda tureba abafite ibyago byinshi bitewe n’ubushobozi, babakaba ari bo bimurwa bagenda batura mu midugudu igeretse, kurusha uko buri wese yaba atuye mu murima we; ni yo mpamvu muzajya mwumva abaturage rimwe na rimwe bavuga ngo bababuza kubaka. Igishushanyombonera cy’Igihugu n’icy’imikoreshereze y’ubutaka byarabonetse, ubu harimo gukorwa noneho ibishushanyombonera bitanga amakuru arambuye kuri buri santeri y’ubucuruzi, buri Karere, na buri Mujyi w’Akarere. “

Nyuma yo kugaragaza ibishushanyombonera bya buri mujyi n’amasanteri byitezwe ko ari byo bizatanga amabwiriza yimbitse mu bijyanye no kubaka kwa buri muturage aho yashaka kubaka aho ari ho hose mu Gihugu.

Minisitiri Gatabazi yanayavuze ko kugeza kuri ubu ikigero cy’abatuye mu mijyi kigeze kuri 17.3% mu gihe intego ari iyo kugera kuri 35% mu mwaka wa 2024 nk’uko bigaragara muri Gahunda ya Guverinoma yo kwihutisha Iterambere (NST 1).

Leta irashishikariza abantu gutura mu mijyi kurusha uko bakomeza kwizirika mu masambu y’iwabo, kuko umuvuduko w’ubwiyongere bw’abaturage usaba ko batura mu buryo buteguwe neza busiga ubuso buhagije butanga umusaruro ubatunga mu buryo burambye.

Uyu ni Umudugudu w’Icyitegererezo wa Karama wafashije mu gutuza abaturage benshi ku buso buto cyane

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA