Leta iri mu nyigo yo kongera imishahara y’abarimu n’abakora mu Tugari
Amakuru

Leta iri mu nyigo yo kongera imishahara y’abarimu n’abakora mu Tugari

NTAWITONDA JEAN CLAUDE

May 18, 2022

Muri ibi bihe Isi ihanganye n’ihungabana ry’ubukungu ryatewe n’impamvu zitandukanye zirimo intambara yo muri Ukraine yakurikiye icyorezo cya COVID-19, ibihugu bitandukanye byo mu Karere u Rwanda ruherereyemo byihutiye kuvugurura imishahara y’abakozi no kongera Umushahara Fatizo.

Bamwe mu batanze ibitekerezo ku birimo kuba mu bindi bihugu harimo abagaragaje ko n’u Rwanda rukwiye kwihutisha icyo gikorwa mu rwego rwo kurengera abakozi bagowe no guhuza imishahara yabo n’izamuka ry’ibiciro ridasanzwe ku biciro bitandukanye.

Minisitiri w’Intebe Edouard Ngirente yakomoje ku mpamvu u Rwanda rutihutiye guhindura imishahara y’abakozi muri rusange, ariko anavuga ku mishinga ihari yo kuvugurura iy’abarezi ndetse n’abakozi bo mu Tugari.

Yavuze ko Guverinoma y’u Rwanda yirinze guhita ifata umwanzuro ku kongera imishahara kubera ko ihugiye mu gushaka umuti w’ibibazo by’ubukungu by’igihe gito bigaragara ko bitazamara imyaka myinshi.

Yavuze ko ariko ikibazo cy’umushahara wa mwarimu n’uw’abakora mu tugari cyihariye kuko Guverinoma yari yatangiye kugishakira umuti urambye na mbere y’umwaduko w’icyorezo cya COVID-19.

Minisitiri w’Intebe Dr. Ngirente Edouard atangiza icyiciro cya kabiri cy’Ikigega Nzahurabukungu

Yavuze ko hari haramaze gufatwa gahunda yo kujya hongerwa 10% ku mushahara wa mwarimu buri mwaka, ikaba ari gahunda imaze imyaka itatu ikorwa.

Ati: “Ikibazo cyahaba ni uko umushahara wo hasi, nk’umwarimu wo mu mashuri abanza we ubu yongererwa 10% ku mushahara uri hasi cyane. Nko mu mashuri yisumbuye ho 10% riba rifite icyo ryongeyeho kuko riba rihereye ku mushahara uri hejuru gatoya.”

Yakomeje agira ati: “Ariko hejuru y’iryo 10% ryiyongera kandi tugikomeje kongeraho, hari n’ibindi bikorwa turimo guteganya byiza mu gihe kiri imbere. Ni igikorwa kirimo gutegurwa, duteganya ko kizagira impinduka nziza ku mushahara wa mwarimu.”

Yashimangiye ko umushahara wa Mwarimu n’uw’abakozi bo mu Tugari ari  umushinga Leta irimo gutegura ikazawutangaza igihe gikwiye kigeze. Ati : “Ni inzego tuzirikana cyane nka Leta ariko nanone ku bushobozi bwa Leta hari ibyo tutahita dukora tubanza kuganira tukabitunganya. Ariko nagira ngo izo nzego ebyiri mvuge ko zitandukanye n’izindi.”

Dr. Ngirente yagiranye ikiganiro n’abanyamakuru nyuma yo gutangiza icyiciro cya kabiri cy’Ikigega Nzahurabukungu, aho yemeje ko Leta yashyizemo miliyari zisaga 250 z’amafaranga y’u Rwanda, mu rwego rwo gushyigikira abikorera bafite imishinga y’ishoramari mishya cyangwa abashaka kwagura ishoramari basanganywe.

Mu muhango wo gutangiza icyo cyiciro, yashimangiye ko Guverinoma y’u Rwanda itazahwema gushyiraho ingamba zitandukanye zigamije gushyigikira iterambere ry’abaturage n’ubukungu bw’Igihugu muri rusange.   

TANGA IGITECYEREZO

  • Mutsinzi
    May 19, 2022 at 5:43 am Musubize

    Abaganga bakora bataruhuka bo mutabatekereza ho? Barbara amajoro,ni bakeya hari n’aho bakora ijoro n’amanywa.

  • Marcellin Bimenyimana
    May 19, 2022 at 8:35 am Musubize

    Mukomereze aho ni byiza kugerango natwe dishonored kujya ku isoko.

  • Mpanonziza Dina
    May 19, 2022 at 5:20 pm Musubize

    Oya rwose abarimu bo shingiro ry’ibirenze ku banyarwanda baraharenganiye ukurikije salary n’ibiciro bihanitse biriho ubu.

  • Clarisse
    May 19, 2022 at 5:34 pm Musubize

    Mwarimu wa primary we Ndumva bitazamusanga kuko nta kirya

  • Pascal
    May 19, 2022 at 6:02 pm Musubize

    Ahari abarimu cyane abo mu mashuri abanza bagira ubushobozi bwo kugera ku isoko nk’abandi bakozi.Ibyiciro by’abarimu ni 3:A2,A1 na A0 nibongezwa ku buryo butatu :A2 30%,A1:20% naho A0 15% icyo gihe A2 ahita yumva ko yongejwe.

  • Nshimiyimana Ferdinand
    May 20, 2022 at 7:37 am Musubize

    Ni byiza kuzirikana Aho twavanye ubumenyi bwose dufite.Mwarimu.

  • Clementine Muhawenimana
    May 20, 2022 at 1:55 pm Musubize

    Nukuri rwose mwarimu we foundation yabyinshi nazamuke,mukomerezaho babyeyi 🙏🙏

  • JMV
    May 21, 2022 at 6:08 pm Musubize

    Nibyo koko abarimu kubongeza birakwiye no ku isoko ibintu byarazamutse cyane.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA