Leta y’u Rwanda yagennye hegitari 134 zo guhingaho urumogi
Amakuru

Leta y’u Rwanda yagennye hegitari 134 zo guhingaho urumogi

NTAWITONDA JEAN CLAUDE

March 21, 2022

Leta y’u Rwanda yagennye hegitari 134 zo gukoreraho ubuhinzi bw’urumogi rugenewe koherezwa mu mahanga, rugakoreshwa mu gukora imiti yifashishwa mu buvuzi gusa.

Ubuhinzi bw’urumogi rwifashishwa mu buvuzi bwumvikanye bwa mbere mu Rwanda guhera mu mpera z’umwaka wa 2020, u Rwanda rukaba rwariyunze ku bindi bihugu by’Afurika birimo Afurika y’epfo, Ghana, Malawi, Zambia, Zimbabwe na Lesotho byemera guhinga no kugurisha urumogi ku mpamvu z’ubuvuzi.

Mu rwego rwo gushimangira iyi ntambwe yatewe yitezweho kugira uruhare rukomeye mu buvuzi bwo mu Rwanda rwiteguye kubona uruganda rukora imiti n’inkingo no kwagura ubushakashatsi ku buzima n’ubuvuzi, mu Igazeti ya Leta yo muri Kamena 2021 hasohotse Iteka rya Minisitiri No 003/MoH/2021 ryo ku wa 25/06/2021 ryerekeye urumogi n’ibikomoka ku rumogi.

Kuva icyo gihe kugeza uyu munsi, hari izindi ntambwe zagiye ziterwa muri uru rugendo zirimo gushakisha abashoramari batangira gukora ubwo buhinzi bushya mu Rwanda, gutegura ubutaka bwizewe kandi burinzwe buzajya bukorwaho ubwo buhinzi.

Ubuyobozi bw’Urwego rw’Igihugu rw’Iterambere (RDB) bwatangarije itangazamakuru ko Leta y’u Rwanda yamaze kugena ubuso bwihariye bungana na hegitari 134 buzahingwaho urumogi ndetse iyo site yatangiye gutegurwa mu buryo bujyanye n’ubuhinzi bwizewe bw’icyo gihingwa.

Mu jtangazo yashyize ahagaragara,  RDB ivuga ko hamaze kuboneka umubare munini w’ibigo byagaragaje ko bishaka guhinga urumogi mu Rwanda, kurutunganya no kurwohereza mu mahanga.

Iryo tangazo rigira riti: “RDB imaze iminsi ikorana n’abafatanyabikorwa mu gusuzuma ubusabe bwakiriwe. Leta y’u Rwanda yashyizeho ingamba zikarishye zo guhitamo ibigo bifite ubunararibonye bwizewe mu guhinga urumogi ku mpamvu z’ubuvuzi. Urugendo rwo kubatoranya runyura mu nzego zitandukanye. Kugeza ubu ibigo bitanu ni byo bigeze ku ntambwe ishimishije itanga icyizere cyo gutoranywa.”

Kugeza ubu nta cyangombwa kirahabwa umuntu uwo ari we wese cyangwa ikigo cyemerewe guhinga no gucuruza urumogi mu Rwanda, cyane ko umuntu uzahabwa icyangombwa ari uzaba amaze kuzuza ibyangombwa byose bikenewe birimo kubahiriza ibisabwa mu mutekano w’ahahingwa urumogi ndetse n’ibikorwa remezo biri mu murima warwo.

Urumogi rushobora kuzakuba inshuro enye amafaranga u Rwanda rwinjiza mu ndabo rwohohereza mu mahanga

Umuyobozi Mukuru wa RDB Clare Akamanzi, mu mwaka ushize yabwiye itangazamakuru ko umutekanano uzajya ukazwa cyane mu gihe cyo gusarura.

Yagize ati: “Nuramuka ubonye icyangombwa cyo guhinga iki gihingwa cyifashishwa mu buvuzi, uzasabwa kuba ufite gahunda ihamye y’umutekano igomba kwemezwa n’inzego z’umutekano zibifitiye ububasha, kandi iyo gahunda yo gucunga umutekano igomba gushyirwa mu bikorwa nk’uko yateguwe,”

Yakomeje avuga ko nta cyuho na kimwe kizaba kigomba kubaho cyatuma urumogi ruva aho ruhingwa rugatangira gukwira mu baturage bacuruza cyangwa bagakoresha ibiyobyabwenge kuko aho ruzahingwa hagomba guteguurwa byimbitse kandi hagashyirwa ikoranabuhanga ryo gucunga umutekano nka za CCTV camera, iminara y’abarinzi, amatara yo mu tuyira two mu murima no mu nkengero ndetse n’abarinzi babihuguriwe.

Ikindi kandi ni uko urumogi rusanzwe kandi rukiri ku rutonde rw’ibiyobyabwenge bitemewe mu Rwanda, kurufatanwa cyangwa kurukoresha bihanwa n’amategeko. Ufashwe anywa cyangwa acuruza urumogi ahanishwa igifungo kitari munsi y’imyaka itatu n’itanu n’ihazabu iri hagati y’amafaranga y’u rwanda 500,000 na miliyoni eshanu.

Biteganyijwe ko ubuhinzi bw’urumogi mu Rwanda buzakorwa ku mpamvu zo koherezwa ku isoko ry’amahanga nko muri Leta Zunze Ubumwe z’Amerika, Canada n’u Burayi.

Akamanzi yashimangiye ko impamvu nyamukuru yo kuba u Rwanda rwarahisemo guhinga urumogi ari ukugira ngo rugire uruhare mu bushakashatsi ku buzima n’ubuvuzi bikorwa ku Isi yose hagamijwe kurinda ubuzima bw’abaturage no guharanira imibereho myiza yabo.

Gusa nanone yanatangaje ko ari inyungu nshya ku bukungu bw’u Rwanda kuko urumogi ruri mu bihingwa bigura akayabo ku isoko mpuzamahanga kuko hegitari imwe ishobora kwinjiriza u Rwanda amafaranga asaga miliyari 10 (miliyoni 10 z’amadolari y’Amerika) mu gihe hegitari y’indabo zinjiza miliyoni 300 z’amafaranga y’u Rwanda.

Ibigo byasabye gukora ubuhinzi bw’urumogi mu Rwanda nk’uko RDB ibivuga, bituruka mu bice bitandukanye by’Isi ariko ngo harimo n’ibigo byo mu Rwanda byemeje ko byifuza kuruhinga.

Ntiharamenyekana igihe nyirizina ubwo buhinzi buzatangira gukorerwa, ariko biracyari gukorwaho kugira ngo igihe ibikorwa remezo bizaba byamaze kubakwa n’ibigo byamaze kwemezwa ubwo buhinzi buzahite butangira.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA