Loni yifatanyije n’u Rwanda na Senegal mu kwibuka Capt. Mbaye Diagne
Amakuru

Loni yifatanyije n’u Rwanda na Senegal mu kwibuka Capt. Mbaye Diagne

NTAWITONDA JEAN CLAUDE

May 31, 2022

Kuri uyu wa Kabiri taliki ya 31 Gicurasi 2022, Umuryango w’Abibumbye (Loni) wifatanyije n’u Rwanda ndetse n’Ambasade ya Senegal mu Rwanda mu kwibuka no guha icyubahiro Captain Mbaye Diagne ukomoka muri Senegali warokoye amagana y’abahigwaga muri Jenoside yakorewe Abatutsi ngo bicwe.

Ni umuhango wabereye i Kigali ahakomeje kuzirikanwa ubutwari bw’uyu musirikare wari akiri muto wemeye guhara ubuzima bwe agerageza kurokora Abatutsi, nubwo byari bihabanye n’amabwiriza yagengaga ingabo zari mu butumwa bwo kubungabunga amahoro mu Rwanda (MINUAR/UNAMIR) yakoreragamo.

Bivugwa ko Capt. Mbaye Diagne yarokoye Abatusti basaga 600 abakura mu memyo ya rubamba abageza mu bice byari birinzwe n’Inkotanyi mu Mujyi wa Kigali.

Capt. Mbaye Diagne , yishwe ku ya 31 Gicurasi ubwo yageragezaga gutabara Abatutsi bari bihishe muri Hotel de Milles Collines ngo abageze aho bafite umutekano.

Uyu musirikare wishwe ageze ku myaka 36 agasiga umugore n’abana 2 bakiri bato, yageze mu Rwanda aje mu butumwa bwa Loni nk’indorerezi ishinzwe kugenzura imigendekere y’ishyirwa mu bikorwa ry’amasezerano y’Arusha, maze acumbikirwa muri Hotel des Milles Collines.

Ubwo Jenoside yatangiraga, na we yahise atangira kurokora abantu ahereye ku bana ba Uwilingiyimana Agatha wari Minisitiri w’Intebe wari umaze kwicwa ahowe kuba atarashyigikiye umugambi wa Jenoside yategurwaga.

N’ubwo hari amabwiriza ya Loni yabuzaga indorerezi kujya gutabara abasivile, Capt. Mbaye ntiyayubahirije maze atangira gutangirwa raporo nk’umuntu warenze ku mabwiriza agatabara kandi bitari byemewe, nyamara bikagaragara ko ibyo yakoraga kwari ugufasha ikiremwamuntu cyari cyugarijwe.

Kuri ubu Capt. Mbaye Diagne ari mu bo Perezida wa Repubulika y’u Rwanda Paul Kagame yageneye igihembo cyiswe “Umurinzi” kigenerwa abantu bagaragaje ubutwari budasanzwe n’ubumuntu mu kurokora abantu muri Jenoside yakorewe Abatutsi.

Ni mu gihe kandi n’uwari Umunyamabanga Mukuru w’Umuryango w’Abibumbye mu 2016 Ban Ki-Moon yamugeneye umudali w’ishimwe. Ibyo bihembo byose byagiye byakirwa n’umugore ndetse n’abana yasize.

Mu 2014 kandi, akanama gashinzwe amahoro ku Isi kari kashyizeho umudali wamwitiriwe mu rwego rwo kumuha icyubahiro no guha agaciro umurava w’abasirikari n’abandi bose bajya mu butumwa bw’amahoro ahantu bashobora no gusiga ubuzima.

I Dakar muri Senegal na ho hubatswe Urwibutso rwamwitiriwe mu rwego rwo gukomeza gushimangira umurava n’ubutwari byamuranze ubwo yangaga kurebera inzirakarengane z’abasivili zicwa urw’agashinyaguro kandi ari mu bashinzwe amahoro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA