“Mama Yaranyishe”, ubuhamya bwa Nsengimana ufite nyina wihekuye muri Jenoside
Amakuru

“Mama Yaranyishe”, ubuhamya bwa Nsengimana ufite nyina wihekuye muri Jenoside

NTAWITONDA JEAN CLAUDE

April 15, 2022

Nsengimana Albert wari ufite imyaka 7 mu gihe cya Jenoside yakorewe Abatutsi mu 1994; avuka ku babyeyi batari bahuje ubwoko kuko Se yari Umututsi na ho nyina ari Umuhutukazi.

Nsengimana uyu yari umwana wa 7 mu bana icyenda akaba ari we wenyine warokotse mu gihe cya Jenoside yakorewe Abatutsi.

Jenoside yakorewe Abatutsi imaze guhagarikwa n’Inkotanyi, nyina umubyara yarafashwe ahamwa n’ibyaha bya Jenoside afungwa imyaka 8 nyuma arafungurwa, apfa mu 2006.

Nsengimana avuka i Kibungo mu yahoze ari Komini Kabarondo ubu ni mu Karere ka Kayonza mu Ntara y’Iburasirazuba.

Mu buhamya bwa Nsengimana, avuga ko nyina yafashe abavandimwe be akabashyira musaza we wari Interahamwe akabica ndetse na we yajyanywe na babyara be inshuro eshatu, iya kane ni nyina wamwijyaniye amushyiriye musaza we ngo amwice.  

Ubwo yatangaga ubuhamya mu kiganiro giherutse guhuza abakozi ba RRA, NEC na OAG ku Kimihurura tariki 12 Mata 2022, muri gahunda zo kwibuka ku nshuro ya 28 Jenoside yakorewe Abatutsi, Nsengimana yavuze ko Se yari Umututsi naho nyina yari Umuhutukazi.

Avuga ko yari azi ko muri Jenoside harimo kwicwa abantu bakuru gusa, nyuma abona ko n’abana barimo kwicwa.

Abavandimwe be bishwe batemwe na basaza ba nyina hamwe na babyara be, bajugunywa mu musarani.

Ati: “Nararize ariko ndavuga nti nanjye baribunyice kuko bamaze kwica bakuru banjye, nasigaye njyenyine ngira amahirwe imvura iragwa.

Yagerageje gusubira kwa nyirakuru ubyara nyina kubabwira ko abavandimwe be babishe, ati: “Njyewe nagerageje kureba uko nagerayo numvaga ntawundi naririra kuko sinarinzi aho Papa ari, abo nari nzi ni ba bandi nabonye bica. Icyo ntari nzi ni uko bamaraga kwica abavandimwe ba mama bagahita bamushyira raporo y’abamaze gupfa mu muryango wacu”.

Yumvaga barumuna be bariho atasigaye wenyine. Akomeza agira ati: “Nahungiye kwa murumuna wa mama bambonye bamvugiriza induru, na bwo nsohoka mu nzu nirukanka ngira amahirwe ntibamfata ngo banyice.”

Akomoza kuri Nshimiye n’uwitwa Kananura bose bakaba babyara ba Nsengimana. Na bo baramutwaye ngo bajye kumwica, umugore wa Kananura aravuga ngo bashake ahandi bamwicira kuko batamujugunya muri tuwalete kuko yazabanukira. Byarangiye bamujyanye ku cyobo rusange ari na yo nshuro ya mbere yari agiye aho yagejejwe inshuro enye ariko akarokoka.

Ati: “Umugore wa Kananura yahise ababaza ati, nimumwica muramujugunya he ko dufite umusarani umwe? Yasabaga ko najyanwa ku cyobo rusange nkicirwayo, banga ko nzabanukira”.

Yakubiswe ibibatira by’imihoro ageze aho yemera ko bagenda bakamwica ariko akagenda ababwira ko atari Umututsi.

Icyatumye Kananura amureka yabonye igitero kigiye yumva ko bagiye kumutanga gusahura, amusaba kuguma aho, ko aza kumwica agarutse.

Ati “Nategereje ko banyica hanyuma bazana Abatutsi benshi barimo abana, abagore n’abagabo barabica;  imvura yaranyagiye nsigara meze nk’uwapfuye…

Umwana utajya umva mu mutwe, ni umwana w’inshuti yanjye witwa Masabo twicaranaga mu ishuri, bishe bakuru be 6 areba hanyuma we abasaba ko batamutema ahubwo akiroha mu rwobo rwa metero zigera kuri 15 ari muzima.

Masabo yasabye ko batamwica areba ati mumbabarire nijyanemo, hanyuma yijyana mu cyobo.

Uko bicaga, bamurundagaho imirambo agasaba amazi yo kunywa, apfa gutyo n’abandi benshi”.

Nsengimana yaje gusubira kwa nyina yumva ko ari bubone uwo abwira ibyabaye, aza guhura na murumuna wa Kananura witwa Butera ati subirayo bakwice.

Rutwitsi, wishe abantu benshi akaba ari n’umwe mu bari abo mu Muryango wa Nsengimana, bamusabye ko amwica avuga ko yananiwe ahubwo bazamuzane amwice ejo.

Ati: “Bamaraga kwica bakihemba, bakanywa za kanyanga nyuma avuga ko agiye kunywa ‘lisansi’ ngo aranyica agarutse”.

Nsengimana yarabacitse anyura mu rutoki ahura n’uwitwa Bugingo wajyaga agirana ibibazo n’iwabo…

Yari afite umuheto amubonye ahita amurasa umwambi umukomeretsa mu bitugu araza aramufata amusubizayo ngo bamwice nanone.

Nyuma y’aho ni bwo Nsengimana yongeye gucika asubira ka nyirakuru ubyara nyina, ahagera ananiwe, ashonje, asa nabi n’aho yari yakomeretse bamujyana kumwica ibisebe byari bikiri bibisi.

Igitabo cya Nsengimana kiri mu bigaragariza amahanga ubukana bwa Jenoside yakorewe Abatutsi mu Rwanda

Ati: “Nagize amahirwe ngera kwa nyogokuru ubyara mama mpagera naniwe, nshonje, nsa nabi, mpageze nicara ku ibuye ryari rihari ntegereza uwampa ibyo kurya.

Kuko nari nananiwe mubyara wanjye aje mubaza barumuna be aho bari ati babishe, nibutse uko bishe bakuru banjye agahinda karanyica ndavuga nti nta kundi.

Ati: nyoko yabashyiriye Mukurarinda arabica ndetse ambwira amasaha babiciyeho, numvaga ko ambeshya ku mutima nkavuga nti Mama wanjye ashobora kuba yabajyanye muri bene wabo akabahisha, ni ho bari.

Mu minota 30 mama yaraje, yari muremure afite n’imbaraga. Hari ukuntu ubona umubyeyi yakenyeye nk’umuntu wambariye urugamba, ni ko yari ameze.

Yahise ambwira ngo ngwino nkagira ngo agiye kumpa ibyo kurya, abwira mubyara wanjye ngo mperekeza na we mujyane bamwice […] Mu gihe natekereza ko mama ashobora kuba anshyiriye abahishe barumuna banjye numvaga ko atabicisha, yarantwaye na we mbona angejeje kuri cya cyobo rusange. Yabajije abari bari aho ati: “Abica bari hehe ngo n’uyu bamwice?”

Kuva ubwo ni bwo Nsengimana yahise abona ko mama we atari agiye kumukiza ahubwo ko na we yari amujyanye ngo bamwice nk’uko bishe barumuna be.

Umugambi wari uwo kumara Abatutsi ntihagire usigara. Barambwiraga ngo genda bakwice, uri inyenzi, uri inzoka. Nageze aho nti ariko ushobora gusanga Data ari we wahemukiye aba bantu kuko numvaga ntacyo nzira.

Niba ari ibihe bibi nagize, ni igihe uwo mubyeyi wanjye yantwaye. Ni ho nahereye nandika nti Mama yaranyishe mu gitabo ‘Ma mère m’a tué’ kuko nageze aho nti reka nemere gupfa.

Baravugaga ngo Abatutsi Imana yabanze kugeza n’aho umubyeyi anyijyanira? Hari igihe umuntu afata umubyeyi we nk’Imana kuko ni we uba waramwibyariye, nemeye gupfa ariko nkababazwa n’ikintu kimwe ariko sinjye gupfa umubyeyi wanjye ari we unyijyaniye.

Nabwiye Imana nti niba ari umubyeyi wanjye ugiye kunyica uzamuhane, ntuzamubabarire… ubwo twari mu nzira tugenda.”

Bageze aho biciraga abandi Batutsi, nyina yarabajije ati: Abica bari he? Ni bwo yahise abona igisubizo, aribwira ati: “Ubwo Mama anyizaniye nibanyice!”

Segatare murumuna wa Mukururinda wari Pasiteri ati: “Uramuzanye ngo bamwice?” Nyina na we ati: “Yego”.

Nsengimana yababwiye ko ari abagome kandi ko Imana itazababarira.

Yarirutse ageze mu rutoki ahasanga abantu nka 5 bafite ibikomere ariko ubwo yirukaga mu mutwe bitameze neza, yumva ko ari bwicwe.

Yahise abona Mukurarinda (Interahamwe) bamuteye icumu yapfuye kubera kurwanira ibyo basahuraga.

Yaraje abwira nyina ko Mukurarinda yapfuye nyina ahita aririra musaza we w’umuhutu, agiye kwiruka ahita amufata akaboko asaba mu byara we kumutwara ngo bamwice (nyina ni ko yavugaga).

Ati: “Mubyara wanjye namuteye ubwoba ndamubwira nti nunjyana nawe barakwica, akavuza induru ngo baze banyice ariko nkamwitendekaho induru ntigere kure […].

Nsengimana ashishikariza Abanyarwanda kuzasoma igitabo yanditse ‘Ma mère m’a tué’, akizeza ko azagishyira no mu Cyongereza kugira ngo ubuhamya bwe bugere kure.

Ashimira Inkotanyi zageze i Kibungo hakiri kare nubwo Interahamwe zabishe vuba kugira ngo Inkotanyi ntizizagire uwo zirokora.

Igitabo yanditse gikubiyemo ubuhamya bwa Nsengimana Albert

Interahamwe zumvishe amasasu y’Inkotanyi zigira ubwoba zitangira kuvuga ko zitagisohoje umugambi wo gutsemba Abatutsi, ziti: “Bene wabo baje ntitukibamaze.”

“[…] Nta muntu narinzi mu nkotanyi ariko narishimye maze kumva hari abaje barwanya Interahamwe. Inkotanyi zansanganye n’abana 3 baradutwara batujyana mu gasantere aho bari bafashe.

Abatugezeho bwa mbere bari bafite molare nkumva namutwaza ku mbunda ariko numvaga nshaka ko ayinyigisha kugira ngo ndase abatwishe.

Numvaga nzahera kuri mama, babyara banjye na basaza be. Ariko ubu narabababariye, ndetse na Mama yitahiye twaramaze kuganira

Izo nkotanyi zaradutwaye dusanga abandi bari barahungiye Rwinkwavu, abahahungiye barimo n’Abahutu ariko nkababara mbabonyemo nti aba Bahutu ni bo batwishe.

RPF yarwaniye ko Abanyarwanda bongera kubana tukubaka Igihugu, ariko nkuko nabivuze ‘Imfura ishenjagira ishira’.

Ndashimira ko Leta yandihiriye amashuri, imfata nk’umwana, niga amashuri abanza, ayisumbuye… iyo Leta itaza kuturihirira tuba turi imbwa, ibyihebe, iyo batandihirira sinari kugira icyo nyibaza kuko ntacyo nari kuyiburanya kuko si yo yatwishe.

Ndashimira Leta yatumye mbana n’abanyiciye, iyo itaba iyi Leta nanjye narikubica na bo bakumva ko bampemukiye, gukura ndi imfubyi, ntagira abavandimwe banjye […].

Abahutu ngo barapfuye? Ni ukubeshya iyo Inkotanyi zibica ntabwo baba bafunze, ntibakajye badukina ku mubyimba, niba na bo barabafite babasura muri gereza, twe tubasura mu nzibutso”.

Yishimira ko yubatswe n’Igihugu, yarashatse afite umugore n’umwana kandi yishimira ko ari umukozi wa Minisiteri kandi yizeza ko azakomeza gukorera Igihugu.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA