Maroc: Umwana wari umaze iminsi ine mu mwobo yakuwemo yapfuye
Mu Mahanga

Maroc: Umwana wari umaze iminsi ine mu mwobo yakuwemo yapfuye

NTAWITONDA JEAN CLAUDE

February 6, 2022

Umwana w’umuhungu w’imyaka itanu wo muri Maroc wari waheze mu kinogo cy’iriba akamaramo iminsi ine ubu yapfuye, nubwo hakozwe ibikorwa birimo kwigengesera kwinshi byo kugerageza kumurokora.

Itangazo ry’Ubwami bwa Maroc ryatangaje urupfu rwe nyuma gato y’uko akuwe muri icyo kinogo.

Kugerageza kurokora uwo muhungu, witwa Rayan, kwari kwahagaritse umutima iki gihugu cyo muri Afurika y’amajyaruguru. Abantu babarirwa mu magana bari bateraniye kuri icyo kinogo bashungereye, naho abandi babarirwa mu bihumbi bakurikiranira ku mbuga za internet.

Uwo muhungu yageze muri metero 32 mu bujyakuzimu (uburebure), arohamiye hejuru aho ikinogo gitangirira. Ibikorwa byo kugerageza kumurokora byagiye bihura n’inzitizi zuko bari bafite ubwoba ko igitaka gishobora kumuridukiraho.

BBC ivuga ko nyuma ari bwo abakora ibikorwa by’ubutabazi baje gukura uwo muhungu muri icyo kinogo ku wa Gatandatu nimugoroba.

Icyo gihe nta kintu cyari cyatangajwe ku kuntu yasanzwe ameze, ndetse icyasaga nko kumutabara mbere cyari cyakiranywe ibyishimo n’imbaga yari ihari.

Ku mbuga nkoranyambaga, abantu bakoresha intero (hashtag) #SauveRayan (rokora Rayan), yakoreshejwe cyane mu gihugu no hanze yacyo, bari babanje kugaragaza ibyishimo byinshi nyuma yuko akuwe muri icyo kinogo.

Ariko nyuma y’iminota bahise bashengurwa n’agahinda, nyuma yuko itangazo risohotse ribika urupfu rwa Rayan.

Abakoresha Twitter bahise batangira guha icyubahiro Rayan ndetse bagaragaza akababaro kabo bakoresheje iyo ntero.

Itangazo ry’ubwami bwa Maroc rigira riti: “Nyuma y’impanuka yavuyemo urupfu yatwaye ubuzima bw’umwana Rayan Oram, Nyiricyubahiro Umwami Mohammed VI yahamagaye ababyeyi b’umuhungu wapfuye nyuma yo kugwa mu kinogo”.

Iryo tangazo ryongeyeho ko Umwami yifatanyije kandi yihanganishije uwo muryango.

Se wa Rayan yari arimo gusana icyo kinogo cy’iriba ubwo iyo mpanuka yabaga ku wa Kabiri. Ku wa Gatatu, yabwiye urubuga rw’amakuru Le360 rwo muri Maroc ati: “Muri ako kanya kamwe namukuyeho amaso, umwana yaguye mu kinogo. Sindasinzira na gato”.

Ibikorwa by’ubutabazi – byari biyobowe n’urwego rwa Maroc rw’ubutabazi bwa gisivile – byari byatangiye ku wa Kabiri nimugoroba, hakoreshejwe amatara abonesha ahantu hanini kugira ngo bashobore gukora mu mwijima.

Byabereye mu mujyi muto wo mu majyaruguru wa Tamorot, uri mu ntera ya kilometero 100 uvuye mu mujyi wa Chefchaouen.

Abantu babarirwa mu magana bari bahateraniye bareba uko icyo gikorwa kigenda, baririmba indirimbo z’idini, basenga ari na ko batera hejuru bagira bati: “Allahu Akbar” (“Imana ni yo Nkuru”). Bamwe muri bo bari baranakoze inkambi aho ngaho ari ho baba.

Hafid El-Azzouz, umwe mu baturage baho, yabwiye ibiro ntaramakuru AFP ko yari ari aho mu kwerekana “kwifatanya n’uyu mwana, ukunzwe cyane na Maroc n’isi yose”.

Ibyabaye byibukije ibindi byago nk’ibyo byabereye muri Espagne mu 2019, ubwo Julen, umwana w’umuhungu wari ufite imyaka ibiri, yapfaga aguye mu kinogo cy’isoko y’amazi, hafi y’umujyi wa Málaga.

BBC

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA