Meteo Rwanda irasaba abaturarwanda gukumira no kwirinda Ibiza
Uncategorized

Meteo Rwanda irasaba abaturarwanda gukumira no kwirinda Ibiza

Imvaho Nshya

September 22, 2023

Ikigo cy’Igihugu gishinzwe Ubumenyi bw’Ikirere (MeteoRwanda) kirasaba abaturarwanda gukumira no kwirinda ibiza kuko cyatangaje ko mu gice cya gatatu cy’ukwezi kwa Nzeri 2023 (kuva taliki ya 21 kugeza taliki ya 30), mu Rwanda hateganyijwe iri hejuru y’ikigero cy’impuzandengo y’imvura isanzwe igwa muri iki gihe.

Bitewe nuko ubutaka bumaze gusoma, hateganyijwe ingaruka ziterwa n’imvura iringaniye ndetse n’imvura igwa iminsi yikurikiranya. Izo ngaruka ziteganyijwe ni imyuzure ahantu hegereye imigezi no mu bishanga cyangwa hafi y’imigezi ahakorerwa ubuhinzi n’ubworozi, kunyerera kw’imihanda no kutabona neza umuhanda bitewe n’ibihu, inkangu ahantu hahanamye hatarwanyije isuri n’izindi mpanuka zaterwa n’imirabyo n’inkuba zishobora kugaragara ahantu hatandukanye mu gihugu.

Meteo Rwanda iragira inama Abanyarwanda n’inzego bireba gukomeza ingamba zo gukumira no kwirinda ibiza.

Hateganyijwe imvura iri hagati ya milimetero 20 na 120.

Imvura iteganyijwe muri rusange izaba iri hejuru y’ikigero cy’impuzandengo y’imvura isanzwe igwa henshi mu gihugu muri iki gice cya gatatu cya Nzeri (ikigero cy’impuzandengo y’imvura isanzwe igwa kiri hagati ya milimetero 0 na 70).

Iminsi iteganyijwemo imvura izaba iri hagati y’iminsi ibiri (2) n’iminsi itandutu (6) bitewe n’ahantu, ikaba ari tariki ya 21, 22, 23, 26, 27 na 28.

Imvura iteganyijwe izaba irimo inkuba ikazaterwa n’isangano ry’imiyaga riherereye mu majyaruguru y’akarere u Rwanda ruherereyemo rimanuka risatira u Rwanda, rikongerera imbaraga imvura ituruka ku miterere ya buri hantu nk’imisozi miremire n’amashyamba.

Imvura iteganyijwe

Imvura iri hagati ya milimetero 100 na 120 ni yo nyinshi iteganyijwe henshi mu Karere ka Rubavu, amajyaruguru y’Uturere twa Rutsiro, Burera na Musanze no mu burengerazuba bw’Akarere ka Nyabihu, igice gito cyo mu burengerazuba bw’Akarere ka Ngororero ndetse no hagati mu Karere ka Nyamasheke.

Imvura iri hagati ya milimetero 80 na 100 iteganyijwe mu bice byinshi by’Uturere twa Karongi, Rusizi, Rutsiro, Ngororero, Gakenke na Rulindo, uburengerazuba bw’Akarere ka Nyamagabe n’agace gato k’Akarere ka Nyaruguru ndetse n’ibice bisigaye by’Uturere twa Nyamasheke na Nyabihu.

Imvura iri hagati ya milimetero 60 na 80 iteganyijwe henshi mu bice by’Akarere ka Gicumbi, Muhanga, Ruhango, Kamonyi na Nyamagabe, amajyaruguru y’uburasirazuba bw’Uturere twa Gasabo na Nyarugenge mu Mujyi wa Kigali, Uburengerazuba bw’Uturere twa Nyaruguru, Huye, Nyanza na Nyagatare, amajyepfo y’uburengerazuba bw’Akarere ka Rusizi, amajyaruguru y’iburasirazuba bw’Akarere ka Gakenke, amajyepfo y’iburasirazuba bw’Akarere ka Musanze na Bugesera ndetse no mu majyepfo y’Uturere twa Burera, Kirehe na Ngoma.

Imvura iri hagati ya milimetero 40 na 60 iteganyijwe henshi mu mu Ntara y’Iburasirazuba, mu Karere ka Gisagara na Kicukiro, ndetse nahasigaye mu Turere twa Huye, Nyanza, Nyaruguru, Gasabo na Nyarugenge.

Imvura iri hagati ya milimetero 20 na 40 ni yo nke iteganyijwe mu burasirazuba bw’Uturere twa Kirehe, Kayonza na Nyagatare no mu majyaruguru y’Akarere ka Gatsibo.

Umuyaga uteganyijwe

Hateganyijwe umuyaga uri hagati ya metero 4 na metero 10 ku isegonda.

Umuyaga ushyira kuba mwinshi ufite umuvuduko uri hagati ya metero 8 na metero 10 ku isegonda uteganyijwe henshi mu Karere ka Karongi, mu burasirazuba bw’Akarere ka Nyamasheke, amajyepfo y’Akarere ka Rutsiro, ibice bike byo mu Turere twa Rusizi na Rubavu, ndetse no mu burengerazuba bw’Akarere ka Nyamagabe.

Umuyaga mwinshi ufite umuvuduko uri hagati metero 6 na metero 8 ku isegonda uteganyijwe mu bice bisigaye by’igihugu uretse mu burengerazuba bwo mu Mujyi wa Kigali, mu majyaruguru, uburengerazuba no mu majyepfo by’Akarere ka Bugesera, mu gice cy’Amayaga, mu bice bike by’iburasirazuba by’Akarere ka Rwamagana, mu burengerazuba bw’Akarere ka Ngoma no mu majyepfo y’Akarere ka Musanze, hateganyijwe umuyaga uringaniye ufite umuvuduko uri hagati ya milimetero 4 na 6 ku isegonda.

Ubushyuhe buteganyijwe

Mu gice cya gatatu cy’ukwezi kwa Nzeri 2023, hateganyijwe ko ubushyuhe bwinshi buzaba buri hagati ya dogere Selisiyusi 20 na 32 mu Rwanda.

Umujyi wa Kigali, Akarere ka Bugesera, uburengerazuba bw’Akarere ka Ngoma, iburasirazuba bw’Akarere ka Kamonyi, igice cy’Amayaga, no mu kibaya cya Bugarama ni ho hateganyijwe ubushyuhe bwinshi buri hagati ya dogere Selisiyusi 30 na 32.

Mu Burasirazuba bw’Akarere ka Rubavu, Amajyaruguru y’uburengerazuba bw’Akarere ka Nyabihu na Musanze ni ho hateganyijwe ubushyuhe buke ugereranyije n’ahandi buri ku gipimo kiri hagati ya dogere Selisiyusi 20 na 22.

Ubushyuhe buteganyijwe buzaba buri hejuru gato y’ikigero cy’impuzandengo y’ubushyuhe busanzwe buboneka hagati y’itariki ya 21 niya 30 Nzeri mu Rwanda.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA