Miliyari 65 Frw zashowe mu gukemura ibibazo by’ubuzima n’imibereho y’abaturage
Amakuru

Miliyari 65 Frw zashowe mu gukemura ibibazo by’ubuzima n’imibereho y’abaturage

NTAWITONDA JEAN CLAUDE

March 18, 2022

Leta y’u Rwanda ifatanyije na Leta Zunze Ubumwe z’Amerika byatangije imishinga ibiri (Gikuriro kuri Bose n’uw’Isoko y’Ubuzima) izamara imyaka 5 igamije guteza imbere imirire, ubuzima n’imibereho myiza no guteza imbere isuku n’isukura mu Turere 10  tw’u Rwanda.

Ni imishinga y’imyaka 5 izatwara amafaranga y’u Rwanda akabakaba miliyari 65 yitezweho inyongera zifatika ku ngamba u Rwanda rusanganywe zo kurwanya igwingira mu bana ndetse no kurwanya indwara zituruka ku mwanda binyuze mu kugeza amazi meza ku baturage.

Umushinga witwa ‘Gikuriro kuri Bose’ ugamije guteza imbere imirire myiza, ubuzima n’imibereho myiza y’abagore bari mu kigero cy’uburumbuke n’abana bari munsi y’imyaka itandatu. Ni mu gihe umushinga w”Isoko y’Ubuzima’ wo ugamije guteza imbere isuku n’isukura mu Rwanda.

Bamwe mu baturage bavuga ko iyi mishinga ije ari igisubizo kuko ije kunganira iyari ihasanzwe na yo yabafashije kwiteza imbere.

Abana birirwaga bonyine twagiye gupagasa ugasanga nta mirire myiza bafite, ariko ubu nta bwaki tukirwaza mu Mudugudu wacu kubera iri shuri. Basigaye baza kwiga twaza tugasanga abana bacu bameze neza nta kibazo bafite.

Ni imishinga yatewe inkunga n’Ikigega cy’Abanyamerika gishinzwe Iterambere Mpuzamahanga (USAID) izashyirwa mu bikorwa mu Turere twa Rwamagana, Kayonza, Ngoma, Nyabihu, Nyanza, Kicukiro, Nyarugenge, Burera, Rulindo na Nyamasheke.

Minisitiri w’Ubuzima Dr Ngamije Daniel avuga ko iyo mishanga uko ari ibiri izagira uruhare rukomeye mu kwigisha abaturage no kubongerera ubushobozi bwo guhangana n’ibibazo bibangamiye imibereho yabo. Yavuze ko muri iyo mishinga hakubiyemo ibikorwa byo kwigisha abaturage, kubafasha no kwishakamo igisubizo.

Ati: “Kuko usanga hazamo n’ikibazo cy’amikoro, abaturage bazigishwa gahunda yo kwizigama mu matsinda, bakabona ubushobozi bwo kugura ibikenewe mu bikorwa by’isuku n’isukura kwaba ari ukubaka ubwiherero bukwiriye, ndetse no kugura ibindi bikoresho byakwifashishwa mu isuku n’isukura.”

Yavuze ko iyo mishinga izanoza neza ibikorwa by’igenamigambi bishingiye ku mibare nyakuri y’abana bafite munsi y’imyaka 5 itandatu bakunda kugaragaraho ikibazo cy’igwingira, ubushakashatsi bugaragaze ikibitera n’icyakorwa ndetse no guhuriza hamwe ibikorwa bizaba byagaragaye nk’ibisubizo mu kurwanya imirire mibi.

Ikindi kandi iyo mishinga izanoza gahunda zisanzweho zo guhangana n’ikibazo cy’igwingira mu Rwanda binyuze mu kwimakaza gahunda y’ingo mbonezamikurire zikurikirana imikurire y’abana bari munsi y’imyaka itandatu bataratangira amashuri abanza.

Muri izo ngo mbonezamikurire baboneramo serivisi z’imirire, uburezi bujyana no gukangura ubwonko bwabo ndetse n’iz’isuku n’isukura.

Deb MacLean, ushinzwe ibikorwa by’Ambasade y’Amerika mu Rwanda,  yavuze ko gutera inkunga iyi mishinga bishimangira imbaraga zishyirwa mu kubaka umubano w’ibihugu byombi ndetse n’abaturage babyo.

Ati: “Aya ni amahirwe ari hano kandi ni ubufatanye bwiza ku bihugu byombi. Byose bigamije kubaka umubano w’abaturage b’ibihugu byacu byombi.”

Yakomeje ashimangira ko ubufatanye bwa Leta Zunze Ubumwe z’Amerika n’u Rwanda busanzwe buhari mu ngeri zitandukanye haba mu bikorwa by’isuku n’isukura, uburezi, kurwanya igwingira, iterambere ry’ubucuruzi, kurwanya COVID-19 n’izindi nzego zitandukanye.

Bamwe mu baturage bazungukira muri iyi mishinga bayihaye  ikaze bagaragaza ko biteguye guhindura imibereho yabo no guhangana n’ibibazo by’ubuzima n’imibereho bituma batihuta mu iterambere.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA