Miliyari zisaga 4 Frw amaze gukoreshwa mu myiteguro ya CHOGM2022
Amakuru

Miliyari zisaga 4 Frw amaze gukoreshwa mu myiteguro ya CHOGM2022

Imvaho Nshya

May 11, 2022

Harabura iminsi ikabakaba 40 ngo u Rwanda rwakire Inama y’Abakuru b’Ibihugu na Guverinoma bo mu Muryango w’Ibihugu bikoresha Ururimi rw’Icyongereza (CHOGM 2022) yasubitswe inshuro ebyiri kubera icyorezo cya COVID-19 cyibasiye Isi mu buryo butunguranye.

Kuva mu myaka ibiri ishize, u Rwanda ntirwahwemye kugaragaza ubushake budasanzwe bwo kwakira iyi nama iri mu zikomeye cyane ku rwego mpuzamahanga, binyuze mu myiteguro ihambaye ikoranwa ubushishozi n’ubunyamwuga.

Impamvu z’iyo myiteguro ihambaye ni uko iyo nama yitezweho kuba amahirwe y’Igihugu yo kugaragaza intambwe cyateye mu myaka 28 ishize nyuma ya Jenoside yakorewe Abatutsi, cyane ko amaso yose y’abatuye Isi azaba yerekeye i Kigali mu cyumweru kizahera taliki ya 20 Kamena uyu mwaka.

Mu Kiganiro Umunyamabanga wa Leta muri Minisiteri y’Ibikorwa Remezo (MININFRA) Eng, Patricie Uwase yagiranye n’itangazamakuru, yavuze ko mu mwaka wa 2020 ari bwo u Rwanda rwatangiye kwitegura CHOGM.

Icyo gihe Guverinoma y’u Rwanda yari yateguye amafaranga y’u Rwanda asaga  miliyari 10 na miliyoni 500, ariko kugeza ubu Eng Uwase avuga ko hamaze gukoreshwa miliyari zirenga enye z’Amafaranga y’u Rwanda.

Eng Uwase yasobanuye ko u Rwanda rukomeje gukora iyo bwabaga ngo imyiteguro irusheho kugenda neza. Avuga ko kuri ubu hakomeje umushinga wo kubaka no kwagura umuhanda wa Sonatubes-Gahanga-Akagera w’ibilometero 13.8, ndetse ko uzaba wuzuye mbere y’uko iyi nama iterana.

Ni umuhanda ufite agaciro ka miliyoni 65 z’amafaranga y’u Rwanda. Eng. Uwase ashimangira ko hari indi mihanda icyenda irimo n’Ikiraro cya Kicukiro igomba kuba yuzuye mbere y’uko CHOGM iterana.

Yagize ati: “Imihanda mishya umunani ireshya n’ibilometero birenga 12 ubu yarangije gukorwa, ariko hari n’indi icyenda minini irimo uwa Sonatubes-Gahanga ubu ugeze kuri 96% wuzura, hari n’indi igeze kuri 70% yubakwa.  Turi ku rwego rushimishije”.

Yakomeje anakomoza no ku kuba muri iyi myiteguro Ikibuga Mpuzamahanga cya Kigali na cyo cyaraguwe cyongererwa ubushobozi bwo kuba cyakwakira indege 50 ziguye ku kibuga cy’indege icyarimwe, mu gihe ubushobozi bwa mbere ya 2020 bwari ubwo kwakira indege 26 gusa.

MINIFRA ivuga ko imyiteguro yakozwe ikora ku nzego zose z’ubuzima bw’Igihugu.

Nko mu rwego rw’amahoteli no kwakira abashyitsi, bivugwa ko mu Gihugu hose habarurwa hoteli zisaga 128 zamaze kwitegura mu buryo bwuzuye, zikaba zibarurwamo ibyumba bisaga 8000 byiteguye gucumbikira abashyitsi bagera ku 6000 bitezwe muri iyo nama.

Umuyobozi w’Ishami ry’Ubukerarugendo mu Rugaga Nyarwanda rw’Abikorera (PSF) Frank Gisha Mugisha, yavuze ko hari ibindi birori n’ibikorwa bizakirwa i Kigali muri uyu mwaka birimo Amarushanwa Nyafurika y’umukino wa Basketball (BAL).

Mugisha ashimangira ko PSF ikomeje guhugura abakozi ba hoteli mu bijyanye n’imitangire ya serivisi nziza no kwita ku bakiliya mu rwego rwo kwitegura abo bashyitsi bitezwe mu Rwanda mu bihe bitandukanye.

Biteganyijwe ko n’indi mijyi yunganira uwa Kigali ari yo uwa Musanze, Rubavu, Rusizi, Nyagatare, Rwamagana na Muhanga ndetse na Nyanza na yo yateguriwe kwakira bamwe mu bashyitsi bazitabira iyi nama ya CHOGM.  

Ku bijyanye n’aho abitabiriye iyo nama bazakorera imyitozo bakanidagadura, hateguwe ku bibuga bya Kigali Golf , Sitade ya Cricket ya Gahanga, Kigali Car Free Zone na Intare Arena.

Amafoto ya Kigali Today agaragaza aho iyubakwa ry’umuhanda Sonatubes-Gahanga-Akagera ugeze.

Amafoto ya Kigali Today

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA