MINAGRI yasabye abagoronome n’abaveterineri kunoza imikorere
Amakuru

MINAGRI yasabye abagoronome n’abaveterineri kunoza imikorere

Sedar Sagamba

February 10, 2022

Minisitiri w’Ubuhinzi n’Ubworozi Dr. Mukeshimana Gerardine yasuye Akarere ka Kamonyi mu rwego rwo kugenzura ibikorwa by’ubuhinzi n’ubworozi, asaba abagoronome n’abaveterineri kunoza imikorere.

Ari kumwe na Guverineri w’Intara y’Amajyepfo Kayitesi Alice babanje kugirana inama n’abagoronome n’abaveterineri ku kunoza imikorere. Basuye ibikorwa bitandukanye bifite aho bihuriye n’ubuhinzi ndetse n’ubworozi.

Minisitiri Dr.Mukeshimana yasuye ikusanyirizo ry’amata rya Rugobagoba rifite ubushobozi bwo kwakira litiro 6000 z’amata ku munsi. Yasabye abayobozi b’iri kusanyirizo kwegera aborozi, guha aborozi serivisi nziza, kongera umukamo, no kurushaho kwita ku buziranenge bw’amata.

Dr. Mukeshimana yasuye uruganda rutunganya ifu y’ibigori rwa IPB-PFO/CEFAPEK Ltd rukorera mu Karere ka Kamonyi, Umurenge wa Gacurabwenge, Umudugudu wa Nkingo. Uru ruganda rufite ubushobozi bwo gutunganya toni ebyiri z’ibigori ku munsi.

Minisitiri kandi yasuye ‘Rumbuka Seeds’ ikigo gitubura kikanatunganya imbuto nziza y’ibigori. Yagiranye ibiganiro n’abayobozi bayo, aba koperative zikorana na Rumbuka mu Karere ka Kamonyi ndetse n’abagoronome, yabasabye gukomeza gukora cyane no kongera umusaruro kuri hegitari.

Mu gusoza uruzinduko rwe mu Karere ka Kamonyi, Minisitiri w’Ubuhinzi n’Ubuhinzi Dr. Mukeshimana yasuye uruganda rwa INGUFU GIN rukora inzoga. Uretse gukora inzoga, uru ruganda rubyaza umusaruro amakarito avamo ibikoresho byarwo n’atwarwamo inzoga, rugakoramo amatereyi atwarwaho amagi “Egg trays”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA