MINALOC: Leta ntiyishimira gusenya inzu y’umuturage

MINALOC: Leta ntiyishimira gusenya inzu y’umuturage

Imvaho Nshya

August 21, 2023

Minisitiri w’Ubutegetsi bw’Igihugu MINALOC Jean Claude Musabyimana atangaza ko Leta idashimishwa no gusenyera umuturage ahubwo ko kwimura abaturage ibikorera kurengera ubuzima bwabo ibukura mu kaga, ibakura mu manegeka..

Ubu ni ubutumwa yatanze mu kiganiro cyibanze ku mpamvu zo kuba abaturage bashobora kwimurwa aho bari bari kubera ko ari mu manegeka, hashyira ubuzima bwabo mu kaga.

Yagize ati: “Leta ntiyishimira gusenya inzu y’umuturage, [….] ariko hari igihe biba ngombwa ko isenywa kuko ubona ko nutayisenya ejo uzaza noneho kumukuramo byabaye ibindi bibazo udashoboye no kuhagera”.

Yakomeje agaragaza ko kurengera ubuzima bw’abantu ari inshingano ya Leta, kuba hari igihe ibimura biba atari ukuvogera uburenganzira bwabo, ahubwo biba ari ugutabara ubuzima bwabo.

Ati: “Kurengera ubuzima bw’abantu ni inshingano ya Leta, kwimura abari ahashyira ubuzima bwabo mu kaga ntabwo ari ukuvogera uburenganzira bwabo. Rwose biriya bikorwa byo kurengera ubuzima bw’abantu ni inshingano Leta ifite, Itegeko Nshinga rirabiteganya nko mu ngingo ya 12 yerekeranye n’uburenganzira bw’umuntu, mu ya 11 kurinda umuryango, iya 22 kuba umuntu afite inshingano yo kuba ahantu hatunganye n’izindi, iya 53 itanga inshingano zo kurengera ibidukikije iha umuntu wese, iha Leta hari n’itegeko ribigena”.

Minisitiri Musabyimana yavuze kandi ko mu bufatanye no koroherana ibibazo bizabonerwa igisubizo.

Yagize ati: “Natwe turi abantu, nta wishimira gusenya inzu y’umuturage […..] Turi abantu natwe, tuvuka mu miryango, twaranahavukiye, twarahakuriye, turahaba, twese ntabwo twavukiye aho dutuye uyu munsi, icyo dusaba abantu ni ukoroherana, hari ibifatika bihari bivuga ko aho hantu ari habi hadakwiye guturwa  cyangwa se haturwa gutya, tubyubahe. Ibyiza ni uko twakumvikana, ahari ikibazo tukakiganiraho, tugafatanya ngo dukemure ibibazo bihari nubwo bikomeye, birakomeye kubera imibereho”.

Yongeyeho ko ubuyobozi bubereyeho gushaka ibisubizo bibereye abaturage.

Ati: “Turi hano ngo dushake ibisubizo biboneye abaturage bacu tunabafashe kugira ngo tubaherekeze mu rugendo rwo kuva ahantu habi batuye wenda bagiye gutura batanabizi, cyangwa bahavukiye atari bo babishatse ariko dufatanye kugira ngo turebe ko imiturire ejo ejobundi yaba myiza kurushaho”.

Abaturage bashishikarizwa kwirinda kubaka mu kajagari kuko ari bimwe mu bigira uruhare mu gutwara ubuzima bw’abantu ndetse no guhindura imyumvire ku kijyanye no kumva ko kwimura abantu ahashyira ubuzima bwabo mu kaga ari inyungu.

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA