MINALOC yakomoje kuri sosiyete z’itumanaho zitishyura amahoro
Amakuru

MINALOC yakomoje kuri sosiyete z’itumanaho zitishyura amahoro

NTAWITONDA JEAN CLAUDE

April 3, 2022

Biragoye ko wagenda hirya no hino mu Mujyi wa Kigali ndetse no mu mijyi yunganira Umujyi wa Kigali ntuhabone ibyapa byamamaza sosiyete z’itumanaho MTN na Airtel.

Bivugwa ko ibi byapa izo sosiyete zibishyira ku mapoto y’amashanyarazi y’Ikigo cy’Igihugu gishinzwe Ingufu (REG) ariko ntibyishyure amahoro y’Uturere.

Minisitiri Gatabazi JMV yabigarutseho kuri twita (Twitter) ubwo yerekezaga mu Ntara y’Iburasirazuba muri Kayonza akahabona ibyapa byinshi byamamaza sositeye z’itumanaho mu Rwanda.

Ubusanzwe kugira ngo ubyumve neza, iyo ufite inzu y’ubucuruzi mu Karere ka Kicukiro ukayishyiraho icyapa cyamamaza ibyo ucuruza, icyo cyapa hari amahoro agenwa n’Inama Njyanama y’Akarere kiba kigomba kwishyura.

Minisiteri y’Ubutegetsi bw’Igihugu (MINALOC), yagaragaje impungenge zuko ibyapa byamamaza bishyirwa ku mapoto y’amashanyarazi bitishyurirwa.

Minisitiri Gatabazi Jean Marie Vianney, mu kiganiro kigufi yahaye Imvaho Nshya yavuze ko buri cyapa cyose kigomba gusabirwa uburenganzira.

Yongeraho ati: “Iyo nyiri cyapa agishyize ku ipoto aba agomba kuba afite amahoro yishyura Akarere”.

Amakuru Imvaho Nshya itaragenzura neza ni uko izi sosiyete z’itumanaho nta mafaranga zigira zishyura ikigo cya REG mu gihe cyose zishyira ibyapa byamamaza ku mapoto y’amashanyarazi ari ku mihanda.

Minisitiri Gatabazi agaragaza ko uko nta burenganzira umuntu afite bwo gushyira icyapa cyamamaza ku modoka y’umuntu ngo ni nako byagombye kugenda ku bashyira ibyapa ku mapoto ari ku muhanda.

Akomeza agaragaza ko ibyapa bingana kuriya bishyirwa ku mihanda, ba nyiri sosiyete baba barimo gucuruza mu gihe uturere two ntacyo twinjiza.

Ati: “Nibakore ibyo bacuruza ariko ntibakoreshe iby’abandi. Twese turahamagara kuri telefoni sosiyete zikinjiza, nibishyure uturere kugira ngo natwo dushyire mu bikorwa imishinga yatwo”.

Iteka rya Perezida N°25/01 ryo kuwa 09/07/2012, rishyiraho urutonde kandi rigena ibipimo ntarengwa by’amahoro n’andi mafaranga yakirwa n’Inzego z’ibanze.

Amahoro ku byapa byamamaza iminara, itumanahona na banderole mu karere ka Kicukiro nka kamwe mu turere gafatiweho urugero.

Icyapa cyishyuzwa amafaranga atarenze ibihumbi 20 kuri metero kare ku mwaka, gushinga icyapa cyamamaza, Umunara cyangwa banderole babisabira uburenganzira ku buyobozi bw’Akarere.

Umunara wishyuzwa amafaranga ibihumbi bibiri kuri metero y’uburerebure.

Banderole yishyuzwa amafaranga atarenze 10,000 Frw ku munsi, ibyapa byamamaza ku buryo bwa elekitoroniki byishyura amafaranga 60,000 frw ku mwaka.

Mu gihe ibyapa byamamaza bishyirwa ku mapoto y’amashanyarazi byaba byishyurirwa, amahoro yinjizwa n’Inzego z’ibanze yakwiyongera bityo imihigo akarere kahize kakayesa.

Sosiyete y’Itumanaho ya MTN yatunzwe agatoki na MINALOC
Sosiyete ya Airtel nayo yatunzwe agatoki kukutinjiriza akarere kubera kwamamariza ubuntu ku mapoto ya REG

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA