MINEDUC yatangiye gusura amashuri isuzuma ibibangamiye ireme ry’uburezi
Amakuru

MINEDUC yatangiye gusura amashuri isuzuma ibibangamiye ireme ry’uburezi

NTAWITONDA JEAN CLAUDE

March 23, 2022

 Guhera kuri uyu wa 23 kugeza 31 Werurwe 2022, abayobozi ba Minisiteri y’Uburezi (MINEDUC) n’ibigo biyishamikiyeho batangiye  gusura amashuri atandukanye mu Gihugu hose banagirana inama n’Ubuyobozi bw’Uturere n’abafatanyabikorwa barebera hamwe imbogamizi zibangamiye ireme ry’uburezi no kuzishakira ibisubizo.

Minisitiri Dr Uwamariya Valentine akaba yasuye  amashuri yo mu Karere ka Bugesera, rimwe mu yo yasuye ryitwa Nelson Mandela TVET School riherereye mu Murenge wa Ntarama areba  imyigire n’imyigishirize, ndetse aganira n’abanyeshuri abasaba gukora ibizamini neza, bakita ku murimo wo kwiga Igihugu cyabashinze batibagiwe no gukomera ku ndangagaciro na kirazira by’umuco nyarwanda. 

Mu kiganiro n’itangazamakuru, Minisitiri w’Uburezi Dr Uwamariya yasobanuye ko iki gikorwa cyo gusura amashuri kigamije gutuma ibibazo bibangamiye uburezi bimenyekana kurushaho; ingano yabyo, uburemere bwabyo, nyuma y’isuzuma bikazafasha mu gutegura uburyo bwo kubikemura.

Yagaragaje ko mu mashuri yasuwe ibibazo bigiye bitandukanye ariko nyuma hazagaragazwa ishusho rusange yabyo.

Ati: “Nyuma yo gukusanya amakuru yose azava muri izi ngendo  tuzagaragaza ishusho rusange yabyo, ariko icyiza kirimo ni uko ibyo tubona byinshi ntibiri kudutungura, nk’ibyumba by’amashuri aho biri ari bikeya twari tubizi, buriya n’ibikoni ntabwo twari twabyongereye ku mashuri yose. Hari nk’ishuri rigaragaza ko abanyeshuri ari benshi ukurikije uko bagomba kubatekera no kubagaburira, amashuri yo kwigiramo hari aho bikenewe ko yongerwa n’ubwo twubatse ibyumba byinshi mu myaka yashize”.

Yakomeje agira ati: “Ibyo byose iyo umuntu abifite azi n’uburemere bwabyo ku ishuri runaka bifasha mu gutegura gahunda yo kubikemura”.

Ikindi Minisitiri w’Uburezi yagarutseho ni ikijyanye n’ubucucike, avuga ko  bwagabanyutse, kandi n’abarimu bashyizwe mu myanya ni benshi ni ubwo hari ahakigaragara icyuho. Hongewemo 1/3 kirenga  cy’abarimu bari basanzwe.

Ku birebana no gufatira ifunguro  ku ishuri na byo yagaragaje ko  ari igikorwa cyiza cyagezweho n’ubwo  na ho hakirimo imbogamizi ariko zishobora kuzakemuka mu minsi ya vuba binyuze mu bufatanye.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA