MINEDUC yibutse abari abakozi ba MINEPRISEC na MINESUPRES bazize Jenoside
Amakuru

MINEDUC yibutse abari abakozi ba MINEPRISEC na MINESUPRES bazize Jenoside

NTAWITONDA JEAN CLAUDE

April 30, 2022

Kuri uyu wa Gatanu taliki ya 29 Mata 2022, hibutswe abari abakozi ba Minisiteri y’Amashuri abanza n’Ayisumbuye MINEPRISEC, Minisiteri y’Amashuri Makuru, Ubushakashatsi n’Umuco MINESUPRES ndetse n’Ibigo byari bizishamikiyeho bazize Jenoside yakorewe Abatutsi mu 1994.

Uyu muhango witabiriye n’Inzego zitandukanye, harimo Abayobozi mu nzego za Leta, Abahagarariye Amadini n’Amatorero, Abafatanyabikorwa mu burezi, abahagarariye imiryango y’abibukwa n’abandi bifatanyije mu muhango wo  kwibuka abari abakozi bakoreraga Minisiteri y’Uburezi n’Ibigo byari bizishamikiyeho.

Ni umuhango wabanjirijwe no gushyira indabo ku rwibutso rwa MINEDUC rugaragaraho amazina 77 y’abakozi bakoreraga muri MINEPRISEC na MINESUPRES n’ibigo byari bizishamikiyeho bamenyekanye ko bazize Jenoside yakorewe Abatutsi mu 1994, ndetse no gucana urumuri rw’icyizere.

Minisitiri w’Uburezi, Dr. Uwamariya Valentine yihanganishije imiryango yabuze abayo bakoraga muri Minisiteri y’Uburezi n’ibigo byari bizishamikiyeho.

Yagaragaje uburyo Jenoside yakorewe Abatutsi yateguwe.

Minisitiri w’Uburezi Dr. Uwamariya Valentine

Yagize ati: “Uyu munsi, twongeye gusobanukirwa neza ko Jenoside yakorewe Abatutsi yateguranywe ubukana, twasobanukiwe kandi umuco w’ivangura wari warahawe intebe mu burezi bizanywe n’Abakoloni basenye ubumwe bw’Abanyarwanda bahoranye”.

Dr. Uwamariya yakomeje asobanura ukuntu kuri Repubulika ya  mbere  n’iya kabiri aho gukosora ivangura mu mashuri ryazanywe n’abakoloni, ahubwo yashyizeho politiki y’ivangura n’itonesha mu burezi yiswe iy’iringaniza ry’amoko n’Uturere.

Twibutse ko abize barimo injijuke zikomeye u Rwanda rwari rufite mu mashami yose ari bo batangije ingengabitekerezo ya jenoside, bigashimangirwa kandi bigaterwa imbaraga n’ubuyobozi bubi burangajwe imbere n’abitwaga intiti z’igihugu.

Yavuze ko kuri ubu abana b’u Rwanda bagomba gusobanurirwa impamvu yo kwibuka.

Ati: “Dufite uruhare rukomeye mu kwigisha abana b’Abanyarwanda kwitandukanya n’ingengabitekerezo ya Jenoside, kubasobanurira impamvu yo kwibuka no guha icyubahiro abazize Jenoside yakorewe Abatutsi, bazirikana ubutwari bw’Ingabo zari RPF-Inkotanyi zahagaritse Jenoside”.

Yongeyeho ati: “Minisiteri y’Uburezi n’Abafatanyabikorwa bacu, dufite inshingano zikomeye zo kurera, no kwigisha ubumenyi bujyanye n’indangagaciro z’Umuco nyarwanda zirimo gukunda igihugu, kugiteza imbere no kukirinda”.

Minisitiri w’Uburezi kandi yavuze ko harimo kwibukwa  77 bari ku rutonde ariko ko hari andi mazina 4 atarandikwa ku rutonde.

Umunyamabanga wa Leta muri Minisiteri y’Uburezi Ushinzwe Ikoranabuhanga, Imyuga n’Ubumenyi, Ngiro Irere Claudette mu ijambo ry’ikaze yagize ati: “Mbifurije gukomera muri ibi bihe, kandi ndabashimira ko mwaje kwifatanya natwe kwibuka ku  nshuro ya 28 abari abakozi ba MINEPRISEC na MINESUPRES n’Ibigo byari bizishamikiyeho bazize Jenoside yakorewe Abatutsi mu 1994.”

Yihanganishije by’umwihariko imiryango yari ifite ababo bakoraga muri MINEPRISEC na MINESUPRES n’Ibigo byazo bazize Jenoside yakorewe Abatutsi mu 1994; iyo miryango yabuze abavandimwe, uburezi bubura abakozi, basize icyuho gikomeye, ati: “Tuzahora tubibuka iteka”.

Ubumwe bugomba guhera mu mashuri

Mu kiganiro gifite insanganyamatsiko igira iti “Twahisemo kuba umwe” cyatanzwe n’umushakashatsi Tom Ndahiro yasobanuye uruhare rwagizwe n’uburezi mu kubiba urwango n’amacakubiri, aboneraho kwibutsa ko kuba umwe, bigomba guhera mu mashuri.

 Ati: “Twahisemo kuba umwe, ariko ubwo bumwe bugomba guharanirwa kandi bugomba guhera mu mashuri.”

Yatanze urugero rw’uburyo ubumwe bwagiye busenyuka bitewe na disikuru z’uwahoze ari perezida icyo gihe Habyarimana Juvenal zari zuzuyemo urwango, amacakubiri aho Umututsi yaburabuzwaga akitwa amazina amutesha agaciro, akitwa icyitso….

Ibinyamakuru na byo byabaye imbarutso yo gucengeza urwango mu Banyarwanda, kimwe n’indirimbo zabaga zuzuyemo amagambo abiba amacakubiri.

Umushakashatsi Tom Ndahiro yavuze ko uburezi bukwiye kwigisha abana bagakura basesengura, barangwa n’ubumwe hirindwa ingengabitekerezo ya Jenoside.

Umushakashatsi Tom Ndahiro (iburyo)

Yagaragaje kandi kuri ubu buri Munyarwanda afite uburenganzira bwo kwiga ntawugize aho ahezwa.

Ati: “Ntawubura ishuri kubera icyo ari cyo”.

Senateri Prof. Dusingizemungu Jean Pierre we yagarutse ku kamaro ko kwibuka, avuga ko ari umuti ukomeye Leta iha abacitse ku icumu rya Jenoside kuko bumva bafite Igihugu kibitayeho, kibaha agaciro.

Yanagarutse ku bihe bitandukanye, Abatutsi batotejwe, bagatuzwa ahashyira ubuzima bwabo mu kaga nko mu Bugesera hagamijwe ko bazicwa na tse-tse.

Senateri Prof. Dusingizemungu Jean Pierre (ibumoso) n’Umunyamabanga wa Leta muri MINEDUC,Twagirayezu Gaspard (iburyo)

Ikindi cy’umwihariko ni uko abanyeshuri mu mashuri basabwaga guhaguruka hakurikijwe ubwoko bwabo, ugasanga byari uburyo bwo gutesha agaciro Abatutsi, harimo ivangura n’ibindi.

Kwiga mu yisumbuye ntibyari ugutsinda byari ukwemererwa

Mukankuranga Therese watanze ubuhamya wahoze ari umukozi wa Minisiteri y’Uburezi yavuze ubuzima bugoye Abatutsi bahakoraga banyuzemo, uko batotezwaga kuko hari ibiro batari bemerewe kugeramo. Ikindi kandi hatigaga ababaga batsinze ahubwo higaga uwemerewe.

Ati: “Kugira ngo umwana ajye kwiga mu mashuri yisumbuye ntihabagaho gutsinda, ahubwo habagaho kwemererwa.

Ku kazi hari abakoreraga muri Minisiteri n’abakoreraga kuri Minisiteri. Habaga ibikorwa byo kuburabuza Umututsi kuko  atari yemerewe kugera mu igorofa rya kane (ahakoreraga Minisitiri)”.

Yakomeje asobanura ukuntu n’umunyeshuri w’Umutusi iyo yajyaga mu mashuri yisumbuye yatotezwaga mu buryo butandukanye, ari mu ishuri, aho barara, aho barira n’ibindi.

Mukankuranga yasabye ko urutonde rw’abazize Jenoside muri iyo Minisiteri nibura buri wese yakwandikwaho amateka ye arimo icyo yakundaga, icyo yakoraga, hakandikwa igitabo cy’amateka kuri bo.

Yashimye Inkotanyi zahagaritse Jenoside zikarokora ubuzima bw’abacitse ku icumu rya Jenoside anashimira Leta uburyo ibitaho.

Uwavuze ahagarariye IBUKA, Bizimana Christian yashimiye abitabiriye uwo muhango wo kwibuka abahoze bakora muri Minisiteri y’Uburezi, Inkotanyi zarokoye abicwaga, avuga ko kwibuka ri umwanya wo gusubiza amaso inyuma ngo hakumirwe icyo ari cyo cyose cyahungabanya ubumwe bw’Abanyarwanda

 Yanavuze uburyo abari intiti, abanyabwenge bagize uruhare mu itegurwa n’ishyirwa mu bikorwa Jenoside yakorewe Abatutsi mu 1994.

Bizimana yasabye abarokotse kwihangana no gukomeza gutwazanya bakigirira icyizere.

Ati: “Muri gihe nk’iki,  kuri Ibuka  ni umwanya wo kubabwira ngo mukomere, mutwaze, icyizere cyo kubaho kirahari”.

Uhagarariye imiryango y’abafite ababo bazize Jenoside bakoraga muri Minisiteri y’Uburezi, Karemera Emmanuel yashimye Leta y’Ubumwe bw’Abanyarwanda by’umwihariko Perezida Paul Kagame n’ingabo za FPR Inkotanyi zarokoye Abatutsi.

Yanashimye ko ubu hashyizwe imbere ubumwe bw’Abanyarwanda, ashima ko ibiganiro bitangwa biganisha ku kubaka u Rwanda ruzira amacakubiri.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA