MINEMA: Gukumira ibiza biza mbere y’ubutabazi
Amakuru

MINEMA: Gukumira ibiza biza mbere y’ubutabazi

NTAWITONDA JEAN CLAUDE

March 22, 2022

Minisitiri ushinzwe Ibikorwa by’Ubutabazi Kayisire Marie Solange yagiriye urugendo mu Karere ka Ruhango ndetse ku gicamunsi cyo kuri uyu wa Mbere taliki ya 21 Werurwe 2022 akomereza mu Karere ka Muhanga, yibutsa Inzego z’ibanze ko gukumira ibiza bigomba kuza mbere naho ubutabazi bugakorwa nyuma.

Minisitiri Kayisire yaganiriye n’Ubuyobozi bw’utu Turere n’Imirenge ndetse na Komite z’imicungire y’ibiza ku ngingo zitandukanye zijyanye no kongera imbaraga mu gukumira no kugabanya ingaruka z’ibiza biteza ibihombo bitandukanye.

Yagize ati: “Kugabanya ingaruka ziterwa n’ibiza, kuburira abaturage no kwitegura ibiza bigomba gukorwa mbere, kuko usanga ubutabazi ari bwo bukorwa kandi hangiritse byinshi bitari guhitanwa n’ibiza iyo hajya kubaho ubukangurambaga.”

Minisitiri Kayisire kandi yasabye ko hashyirwa imbaraga mu bukangurambaga n’igenamigambi bisobanutse bigamije ko buri wese amenya akanakora uruhare rwe mu gukumira ibiza.

Aha hari mu Karere ka Ruhango (Foto Akarere ka Ruhango)

Ati “Gukumira no kugabanya ingaruka ziterwa n’ibiza ni inshingano ya buri wese, twese biratureba”.

Haganiriwe ku igenamigambi ry’ibikorwa byubaka ubudahangarwa ku biza mu buhinzi, mu myubakire y’ibikorwa remezo no kubirinda, gukumira imiturire itemewe, kurwanya isuri haterwa ibiti, gusibura inzira z’amazi, guca imirwanyasuri, kuzirika ibisenge no kwirinda gukubitwa n’inkuba.

By’umwihariko yasabye abashinzwe imiturire kutemerera uwo ari we wese kubaka mu manegeka, asaba abubaka gukora umusingi ukomeye, kuzirika ibisenge neza, guhoma inkuta neza, gufata amazi ava ku bisenge, gutunganya inzira z’amazi.

Minisitiri ushinzwe ibikorwa by’ubutabazi mu Karere ka Muhanga yagaragarijwe ishusho y’uko ibiza bihagaze muri aka Karere, ibikorwa mu rwego rwo kugabanya no gukumira ingaruka zabyo n’imbogamizi zihari.

Bimwe mu byagaragajwe ni uko kuva muri Nzeri 2021 kugeza muri Werurwe 2022 ibiza bimaze guhitana ubuzima bw’abantu 2, byashenye inzu 112 hirya no hino mu Mirenge inyuranye igize ako Karere.

Ibiza byahitanye amatungo magufi 1600, byangiza amashuri, ikigo Nderabuzima cya Gitega mu Murenge wa Kibangu bisenya ibiraro n’imihanda bihuza Imirenge itandukanye ndetse harimo n’iyahuzaga Akarere ka Muhanga n’utundi Turere.

Aba ni abari mu nama baganira ku byerekeranye no kwirinda ibiza (Foto Akarere ka Muhanga)

Umuyobozi w’Akarere ka Muhanga Kayitare Jacqueline yavuze ko imiterere y’Akarere itiza umurindi ibiza, kuko igice kinini cyaho ari imisozi, bityo imiturire hakaba hagishakishwa uko yanozwa ndetse n’ubucukuzi bw’amabuye y’agaciro bukorwa mu buryo butanoze bigahitana ubuzima bw’abantu.

Yagize ati: “Dufite abarenga ibihumbi 4 batuye mu manegeka, kubimura bisaba ingengo y’imari itubutse Akarere katabona.”

Kayitare yavuze ko muri iyi myaka 2 ikurikirana bishatsemo ubushobozi babasha kubakira abarenga 500 basenyewe n’ibiza.

Minisitiri w’Ibikorwa by’Ubutabazi yibukije ubuyobozi ko bugomba gukaza ubukangurambaga, abaturage bakigishwa uko bakumira ibiza, bazirika ibisenge by’inzu batuyemo, batunganya inzira z’amazi bakanahoma inzu batuyemo, abaturage bakirinda kureka amazi y’imvura, no gukoresha telefoni cyangwa ibindi bikoresho mu mvura kuko bikurura inkuba.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA