MINICOM yatangaje igiciro fatizo cy’umuceri udatonoye
Amakuru

MINICOM yatangaje igiciro fatizo cy’umuceri udatonoye

NTAWITONDA JEAN CLAUDE

June 21, 2022

Minisiteri y’Ubucuruzi n’Inganda (MINICOM) yatangaje igiciro fatizo cy’umuceri udatonoye aho uw’intete ngufi (Short grain) ari amafaranga y’u Rwanda 330 ku kilo; uw’intete ziringaniye (Medium grain) ni 320 ku kilo, na ho  umuceri w’intete ndende (Long grain) ni 340 ku kilo.

Ni icyemezo cyafashwe hashingiwe ku mabwiriza No 22 yo ku wa 03/04/2014 yuzuza amabwiriza ya Minisitiri No19 yo ku wa 3/11/2012 yerekeye itunganywa n’icuruzwa ry’umuceri mu Rwanda, aho ingingo ya 4 ivuga ko ibiciro by’umuceri udatonoye bigenwa buri gihembwe cy’ihinga ku bwumvikane hagati y’abafatanyabikorwa ku rwego rw’Igihugu hakurikijwe uko isoko ry’umuceri rihagaze.

Hanashingiwe  kandi ku myanzuro y’inama yabaye ku italiki 20 Kamena 2022, hifashishijwe ikoranabuhanga, mu rwego rwo kubahiriza amabwiriza yo kwirinda icyorezo cya COVID-19 ikaba yari igamije kwemeza ibiciro fatizo, hashingiwe ku gishoro cy’umuhinzi w’umuceri n’icy’inganda ziwutunganya byasesenguwe n’itsinda tekinike mu kugena icyo giciro  kizashingirwaho mu kugura no gucuruza umusaruro w’umuceri w’igihembwe cy’ihinga cya 2022 B.

Ibinyujije mu itangazo yasohoye uyu munsi ku wa 21 Kamena 2022, Minisiteri y’Ubucuruzi n’Inganda yibukije  ko uruganda rwemewe rugura umuceri w’abahinzi rusabwa kubanza kwishyura abahinzi mbere yo gutwara umuceri.

Abahinzi na bo baributswa ko bibujijwe kugurisha umuceri udatonoye ku nganda zitemewe. Uzafatirwa mu bikorwa by’ubumamyi azahanwa hakurikije amategeko.

Koperative z’abahinzi ziributswa gusinyana amasezerano n’inganda zigura umuceri agaragaza igiciro n’ingano y’umusaruro ndetse na konti zizishyurirwaho amafaranga muri banki. Buri ruganda rwemewe rurasabwa gutangaza igiciro kuri buri bwoko bw’umuceri utonoye kandi rukabimenyesha iyi Minisiteri  mbere y’uko utangira gucuruzwa mu rwego rwo korohereza abazakora igenzura.

Inzego z’uturere nk’uko zabimenyeshejwe mu nama yo ku italiki ya 14 Kamena 2022 yahuje MINICOM, abayobozi b’Uterere, Minisiteri y’Ubutegetsi bw’Igihugu (MINALOC) ziributswa gushyira mu bikorwa umwanzuro wafashwe wo gukuraho imashini zitonora umuceri mu buryo butemewe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA