Minisitiri Mbabazi asaba urubyiruko kwitandukanya n’ababyeyi bafite ingengabitekerezo
Amakuru

Minisitiri Mbabazi asaba urubyiruko kwitandukanya n’ababyeyi bafite ingengabitekerezo

NTAWITONDA JEAN CLAUDE

March 22, 2022

Mu gihe u Rwanda rwitegura kwibuka ku nshuro ya 28 Jenoside yakorewe Abatutsi mu 1994, Minisitiri w’Urubyiruko n’Umuco Mbabazi Rosemary arasaba urubyiruko kwitandukanya n’ababyeyi babo bakirangwa n’ingengabitekerezo ya Jenoside.

Mu kiganiro kihariye yagiranye n’Imvaho Nshya, Minisitiri Mbabazi yagaragaje ko hari abana bari mu nzira nziza ariko hakaba n’abayobye agashimangira ko badakwiye kuba ingwate z’ababyeyi babo.

Yagize ati: “Turashishikariza cyane abana ko batagomba kuba ingwate y’ababyeyi babo.

Nk’abana bayobye bafite ababyeyi bagize uruhare muri aya mateka yose tuvuga yashenye igihugu cyacu, ugasanga banze kwitandukanya na bo ariko icyaha ni gatozi.

Icyaha kizakurikira umubyeyi ariko umwana nta ruhare, nta rubanza afite ni yo mpamvu twifuza ko urubyiruko rwitandukanya n’iyo mitekerereze isenya ahubwo rwishyire hamwe mu kubaka u Rwanda rwacu twese duhuriyeho”.

Minisiteri y’Urubyiruko n’Umuco isaba urubyiruko kutifata ku ngingo ijyanye no kugaragaza ukuri ku Rwanda no kunyomoza abarusebya.

Mbabazi ati: “Nagira ngo mbasabe be kwifata, iyo wifashe hari umurongo uba uganamo, ntibifate kuko amakuru arahari bahere no kuri ibiri iwabo, ibyo babona, batangaze ibintu byiza kuko gutangaza ibishimisha igihugu cyacu bidutera ishema kuri twese”.

Iyi Minisiteri isaba urubyiruko rwose gukorera hamwe nk’abitsamuye bityo bagafatanya ku mbuga nkoranyambaga mu rwego rwo kugaragaza isura nziza y’igihugu.  

Urubyiruko rusabwa kwitabira gahunda zo kwibuka

Minisiteri y’Urubyiruko n’Umuco igaragaza ko hari ibikorwa byinshi birimo gukorwa mu rwego rwo kwitegura kwibuka ku nshuro ya 28 Jenoside yakorewe Abatutsi.

Bimwe mu bimaze gukorwa ni ukuba urubyiruko hirya no hino mu gihugu ruherutse gukora isuku ku nzibutso ziruhukiyemo abazize Jenoside.

Minisitiri Mbabazi ati: “Urubyiruko ruzatanga ubufasha bwose bushoboka, tuzajya kubakira abatishoboye, gusukura inzibutso, kwitabira ibiganiro, kwirinda ingengabitekerezo ya Jenoside yakorewe Abatutsi no kujya ku mbuga nkoranyambaga bagatangaza amakuru nyayo kuko ukuri kurahari, kurazwi.

Ntabwo twakwemera ko abatugorekera amateka bakomeza kubikora kandi urubyiruko ruhari”.

Avuga kandi ko hari n’urubyiruko ruke ababyeyi bagifite ingengabitekerezo ya Jenoside bayobeje baba bari kuri izo mbuga nkoranyambaga bakwirakwiza ibihuha bidakwiye, bisenya igihugu, bisenya ubumwe bw’Abanyarwanda.

Minisiteri igaragaza ko ku mbuga nkoranyambaga hari urubyiruko ruri mu nzira nziza ko rukwiye kubanyomoza bityo bakabwiza ukuri Abanyarwanda na bagenzi babo b’urubyiruko.

Ku bufatanye bwa Minisiteri y’Ububanyi n’Amahanga, na Minisiteri y’Urubyiruko n’Umuco batangiye guhuza abahagarariye urubyiruko n’abakomiseri b’imiryango ihagarariye abanyarwanda mu mahanga kugira ngo bahabwe amakuru ku batayazi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA