Minisitiri w’Intebe yafunguye BPR Bank Rwanda ashimira KCB Group
Amakuru

Minisitiri w’Intebe yafunguye BPR Bank Rwanda ashimira KCB Group

NTAWITONDA JEAN CLAUDE

May 4, 2022

Kuri uyu wa Gatatu taliki ya 4 Gicurasi 2022, Minisitiri w’Intebe Dr. Edouard Ngirente yahagarariye Perezida wa Repubulika y’u Rwanda Paul Kagame, yifatanya n’ubuyobozi bw’Ikigo KCB Group mu muhango wo gufungura ku mugaragaro BPR Bank Rwanda yavutse nyuma yo guhuza iyahoze ari KCB Bank Rwanda na BPR Altas Mara.

Muri Kamena 2021 ni bwo Banki y’Ubucuruzi y’Abanyakenya (KCB) yatangaje ko yamaze kwegukana bidasubirwaho imigabane 62,06%, Ikigo cy’Ishoramari cya Atlas Mara Limited cyari gifite muri Banki y’Abaturage y’u Rwanda (BPR).

Icyo gihe ni na bwo byatangajwe ko izo banki zombi zigiye guhuzwa zikabyara ‘BPR Bank’ bituma hinjizwa abakozi bashya 1,013 bongereye umubare w’abakozi ba KCB Group bageze ku 8,538 mu mashami yayo yose mu Karere mu mpera z’umwaka ushize bavuye ku 7,525.

Dr. Ngirente yafunguye ku Mugaragaro BPR Bank Rwanda afatanyije n’Umuyobozi Mukuru wa KCB Group Andrew Wambai Kairu, mu birori bibereye ijisho byabereye i Kigali.

Muri ibyo birori, Dr. Ngirente yashimye ubuyobozi bwa KCB Group bwiyemeje gukora ishoramari rikomeye mu Rwanda no muri Afurika y’Iburasirazuba, ashimangira ko iryo shoramari rizagira uruhare rukomeye mu iterambere ry’abaturage n’iry’Igihugu muri rusange.

Yagize ati: “Mu mashami 154 n’abakozi barenga 1,300 mu Gihugu, ishoramari KCB Group yakoze mu Rwanda rizongera iterambere ry’ubukungu bw’Abanyarwanda.”

Yakomeje avuga ko ishoramari rihoraho rya KCB Group mu Rwanda guhera mu mwaka wa 2008, ryatanze umusaruro utandukanye urimo no guhugura ba rwiyemezamirimo bato n’abaciriritse basaga 450 binyuze muri gahunda ya Igire yibanda ku rubyiruko.

Guverineri wa Banki Nkuru y’u Rwanda (BNR) John Rwangombwa, na we yongereyeho ko KCB Group yakoze igikorwa gikomeye cyane mu guteza imbere urwego rw’imari rw’Igihuru mu Karere k’Afurika y’Iburasirazuba no ku rwego mpuzamahanga, ashimangira ko batazahwema gushyigikira iyi banki iharanira guteza imbere abaturage b’Afurika y’Iburasirazuba by’umwihariko.

BPR Bank Rwanda Plc ibaye banki ya kabiri nini mu rwego rw’imari mu Rwanda nyuma ya Banki ya Kigali, bikaba biha amahirwe akomeye KCB Group yo kurushaho kwigarurira abakiliya mu Rwanda no kurushaho kwaguka mu Karere.

Imigabane yaguzwe na KCB Group yari isanzwe icungwa n’Ikigo Atlas Mara gifite icyicaro gikuru i London, iyo banki y’Abanyakenya ikaba yaratanze miliyoni 35.85 z’amadolari y’Amerika, miliyari zisaga 36.6 z’amafaranga y’u Rwanda kugira ngo iyegukane.

Iyi banki irateganya kuzegukana BPR burundu kugira ngo ibashe kugera byuzuye ku bakiliya b’iyahoze ari Banque Populaire du Rwanda ifite amateka akomeye mu Gihugu. Mu mwaka ushize BPR yungutse amafaranga y’u Rwanda miliyari 4.2 ataravamo umusoro, akaba ari mu yagize uruhare mu nyungu zinjijwe na KCB Group.

BNR yamaze kwemerera KCB Group guhuza serivisi kugira ngo abakiliya bajye babasha kubona serivisi zimwe aho baba bari hose mu Gihugu no mu Karere, ari na ko babona inyungu z’ikoranabuhanga rigezweho ryimakajwe na KCB Group, ikaba ikomeje kwaguka ku muvuduko udasanzwe mu bihugu byo mu Karere.

Kuri ubu iki Kigo cy’imari kiri mu bikomeye mu Karere, kirateganya kwinjira no ku isoko rya Repubulika Iharanira Demokarasi ya Congo (RDC) nyuma yo kureka kurambagiza banki yo muri Tanzania yitwa “BancABC Tanzania” na yo ifitwe na Atlas Mara.

Gahunda yo kuyigura yajemo ingorane nyinshi bituma uwo mushinga usubikwa.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA