Minisitiri w’Intebe yahagarariye Perezida Kagame mu nama ya AfDB
Aamakuru Agezweho

Minisitiri w’Intebe yahagarariye Perezida Kagame mu nama ya AfDB

Imvaho Nshya

May 24, 2022

Minisitiri w’Intebe Dr Edouard Ngirente, ari i Accra muri Ghana aho yahagariye Perezida wa Repubulika y’u Rwanda Paul Kagame, mu nama ya 57 ya Banki Nyafurika Itsura Amajyambere (AfDB) ibera muri icyo gihugu kuva tarlki 23 Gicurasi kugeza ku ya 27 Gicurasi 2022.

Dr. Ngirente yitabiriye ikiganiro cyahuje Abakuru b’Ibihugu na Guverinoma kivuga ku mahirwe n’imbogamizi mu terambere ry’Afurika ari kumwe na Perezida wa Ghana Nana Akufo-Addo, Perezida wa Tanzania Samia Suluhu Hassan na Perezida wa AfDB Akinwumi Adesina.

Iyi ni yo nama ibaye imbonankubone nyuma y’imyaka ibiri yitabirwa hifashishijwe ikoranabuhanga kubera icyorezo cya COVID-19 cyahungabanyije ubukungu bw’Isi n’Afurika by’umwihariko.

Ni inama iragaruka ku ruhare rw’Abanyafurika mu guhangana n’ibibazo birimo imihindagurikire y’ikirere, mu bukungu ndetse no muri sosiyete ku mugabane w’Afurika.

Iyi nama ije mu gihe Afurika ihanganye n’ibibazo by’ubukungu byihariye byasizwe n’ingaruka z’icyorezo cya COVID-19 cyasanze hari imbaraga nke mu rwego rw’ubuzima, ubukungu na bwo bukaba butari buhagaze neza ku buryo bwabashaga gukemura ibibazo byiyongeraga uko bukeye n’uko bwije mu gutabara ubuzima bw’abaturage.

Ibyo byatumye imyenda y’ibihugu by’Afurika yo munsi y’ubutayu bwa Sahara yiyongera, ari na ko imibereho ya bamwe irushaho kugorana nk’uko byagiye bitangazwa muri raporo zitandukanye.

Ku rundi ruhande, abashakashatsi bavuga ko ubwiyongere bw’ubushyuhe bw’Isi bukomeje kugira ingaruka ku mugabane w’Afurika kuko ahari hasigaye urubura ruzaba rwashonze mu myaka mike iri imbere, ari na ko umutungo kamere w’amazi ugenda ukama bikazagira ingaruka zikomeye ku musaruro w’ubuhinzi ufatiye runini Abanyafurika muri rusange.

Ikigo “Foreign Policy Institute” kivuga ko igabanyuka ry’amazi ku mugabane rishobora kuzateza ihungabana mu mutekano w’ibiribwa, ubukene ndetse n’abaturage bakagenda bimuka ahahindutse ubutayu bikongera ibibazo ahakiri amahirwe y’ubuzima.

Iyi nama iteraniye i Accra mu gihe Inama y’Ubutegetsi ya AfDB yamaze kwemeza miliyari 1.5 y’amadolari y’Amerika yo gushyigikira byihuse gutunganya umusaruro w’ibiribwa mu gukemura ibibazo byatewe n’Intambara y’u Burusiya na Ukraine.

Iyo nkunga yitezwe kugezwa ku bahinzi miliyoni 20, ikazabafasha kongera toni 38 ku musaruro wabo w’ubuhinzi mu guhangana n’ubwoba bw’inzara bukomeje kwiyongera ku mugabane w’Afurika.

Abitabiriye iyo nama bitezweho kwerekwa imishinga ya AfDB yafashije mu guhindura ubuzima bw’Abanyafurika basaga miliyoni 335 mu myaka itanu ishize, n’ibindi bikorwa biteganyijwe mu gihe kiri imbere bitanga amahirwe yagutse kurushaho.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA