Mu cyumweru kimwe, abasaga 72,000 bahunze intambara ya FARDC na M23
Amakuru

Mu cyumweru kimwe, abasaga 72,000 bahunze intambara ya FARDC na M23

Imvaho Nshya

May 29, 2022

Imirwano yubuye hagati y’inyeshyamba za M23 n’Ingabo za Repubulika Iharanira Demokarasi ya Congo (FARDC) mu Ntara ya Kivu y’Amajyaruguru, imaze gukura mu byabo abasivili basaga 72,000 mu gihe cy’icyumweru kimwe gusa.

Iyo mibare yagaragajwe muri raporo y’Ishami ry’Umuryango w’Abibumbye ryita ku Mpunzi (UNHCR), yerekana ubukana bw’imirwano yongeye gukaza umurego, nyuma y’aho abarwanyi ba M23 baboneye ko Leta ya Repubulika Iharanira Demokarasi ya Congo (RDC) itifuza guha uburenganzira Abanyekongo bakoresha ururimi rw’Ikinyarwanda.

M23 yongeye kugaba ibitero nyuma y’ibindi yaherukaga kugaba hagati y’umwaka wa 2012-2013 aho yafashe byo mu Burasirazuba bw’icyo gihugu ariko bikarangira imeneshejwe abo muri uwo mutwe bagashakira ubuhungiro mu bihugu by’abaturanyi. Umubare munini wabo wahungiye muri Uganda, abandi bahungira mu Rwanda.

Bivugwa ko ingabo za FARDC zanesheje urwo rugamba nyuma yo kwifatanya n’imitwe yitwaje intwaro irimo n’inyeshyamba za FDLR zimaze imyaka 28 zishakisha uburyo bunyuranye bwo guhungabanya umutekano w’u Rwanda.

Muri iki cyumweru iyo mirwano yabereye mu bice bitandukanye uvuye mu majyaruguru y’Umujyi wa Goma ukageza i Bunagana muri kivu y’Amajyaruguru, M23 iravugwaho kuba yarigaruriye ibirindiro bitandukanye bya FARDC yongeye kwifatanya n’umutwe wa FDLR muri urwo rugamba.

Mu baturge basaga 72,000 bamaze guhunga ibyabo, harimo abagera ku 7000 bambutse berekeza muri Uganda nk’uko bitangazwa na UNHCR.

Abandi berekeje mu Mujyi wa Goma aho bacumbikiwe mu nzu zubakiwe gucumbikira abari bakuwe mu byabo n’iruka ry’Ikirunga cya Nyiragongo mu mwaka ushize.

U Burasirazuba bwa Congo ntibwigeze bubona agahenge k’umutekano kuva mu myaka 30 ishize, bitewe n’imitwe yitwaje intwaro ivuka cyangwa igahungira muri ako gace gakungahaye ku mabuye y’agaciro n’indi mitungo kamere.

Ibibazo bya Congo bivuzwe mu gihe n’ubusanzwe muri icyo gihugu habarurwaga n’ubundi abasaga miliyoni 5.6 z’abaturage bahunze ibyabo kubera imitwe yitwaje intwaro n’ibindi bibazo by’umutekano muke.

Muri izo mpunzi harimo abarenga miliyoni 1.9 babarizwa mu Ntara ya Kivu y’Amajyaruguru ahari kubera intambara yongeye guteza ubundi buhunzi ku buryo bwagutse.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA