Mu isoko rya Kinkware, ahacururizwa ibiribwa hararangaye ah’imyenda harasakaye
Imibereho

Mu isoko rya Kinkware, ahacururizwa ibiribwa hararangaye ah’imyenda harasakaye

Imvaho Nshya

October 15, 2023

Abarema n’abacururiza imboga, imbuto n’ibindi biribwa mu isoko rya Kinkware, riherereye mu Murenge wa Nkotsi, Akarere ka Musanze, barinubira ko  igice bakoreramo kidasakaye mu gihe ahacururizwa imyenda ho hasakaye.

Bavuga ko kuba aho bacururiza harangaye bituma ibiribwa  bacuruza  bitakaza ubuziranenge,   bakaba  basaba ko iki gice na cyo cyasakarwa  nk’uko igice gicururizwamo  imyenda gisakaye.

Manirakiza Daphrose, umucuruzi w’imboga n’imbuto muri iri soko, yagize ati: “Ubundi iri soko iyo urireba rigizwe n’ibice 2, hari icyo bacururizamo imyenda n’ibindi bikoresho, iki gice kirasakaye, ariko urabona iki gice gicururizwamo ibiribwa ntigisakaye, mu mvura usanga ibiribwa byabaye ibyondo, urabona ko nta n’ubutanda buhubatse. Ku zuba imbuto zirangirika, ivumbi rikahuzura na twe kandi ntabwo riba ryaturetse.”

Mpozembizi Eliab ybwiye Imvaho Nshya ko iyo imvura iguye abacururiza hanze bahita barekerera aho gukora bakajya kugama mu nzu z’abaturanyi ugasanga hari akavuyo mu ngo nyinshi.

Yagize ati: “Abo muri za resitora na bo babura aho bicaza abakiriya bacu, abandi na bo kubera ko baba batanditse mu nzira y’imodoka ubona ko biteza umutekano muke, nibadufashe badusakarire iri soko natwe imbaraga bazadusaba tuzababa hafi”.

Umunyamabanga Nshingwabikorwa w’Umurenge wa Nkotsi Kabera Canisius, nawe ashimangira ko iri soko usanga rigenda rigira abantu benshi bakenera kurikoreramo no gukuramo serivisi, kuri ubu ngo hari ikigiye gukorwa ngo ritunganywe.

Yagize ati: “Kinkware yubatswe mu bihe byashize kubera ko umubare w’abaturage wari ukiri muke, ariko ubu hari gahunda y’uko amasoko yose yunganira isoko rya Musanze yubakwa. Ibi biri muri ghunda y’ingengo y’imari y’imyaka itaha, bityo   abacuruza ibiribwa na bo bagakorera  ahantu hatunganye nk’uko twabiganiriye n’Ubuyobozi bw’Akarere ka Musanze”.

Akomeza avuga ko mu biganiro bagiranye n’Akarere basanze kandi iryo soko rikwiye kwagurwa bikaba, bisaba ko haboneka ingurane z’abahaturiye n’abahafite imitungo.

Kubera ko abaturage   benshi bo muri aka gace  batunzwe n’imirimo y’ubuhinzi, usanga   umusaruro wabo  mwinshi  wiganjemo imboga n’imbuto, imyumbati, ibisheke, ibitoki n’ibindi.

NI isoko   riherereye  mu gace gahuriweho n’uturere dutatu  aritwo Musanze na Gakenke two mu Ntara  y’Amajyaruguru ndetse  n’Akarere ka Nyabihu ko mu Ntara y’Iburengerazuba.

Iri soko rirema ku wa Kabiri no ku wa Kane wa buri cyumweru, rikaba rihuriramo abantu basaga ibihumbi 15.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA