Muhanga: Abasenye urukuta batakambiye urukiko barusaba kubarekura by’agateganyo
Amakuru

Muhanga: Abasenye urukuta batakambiye urukiko barusaba kubarekura by’agateganyo

AKIMANA JEAN DE DIEU

March 14, 2024

Urukiko Rwisumbuye rwa Muhanga rwaburanishije  abantu 9 bakurikiranyweho gusenya urukuta, batakamba barusaba kurekurwa bakaburana bari hanze.

Aba bose bahamijwe icyaha cyo gusenya cyangwa konona inyubako ku bushake utari nyirayo n’ubufatanyacyaha n’urukiko rw’Ibanze rwa Gacurabwenge, banakatirwa gufungwa no gutanga ihazabu ndetse n’indishyi z’akababaro.

Icyaha bakurikiranyweho bagikoze  mu kwezi k’Ukuboza 2023  mu Murenge wa Runda, Akarere ka Kamonyi, bafatwa tariki ya 19 na 22 Ukuboza 2023.

Bashinjwa gusenya urukuta rw’urugo rwa Nizeyimana Jean n’umugore we baguze uyu mutungo mu cyamunara.  

Mbere yo gutangira kuburana abaregwa bafungiye mu igororero rya Muhanga n’Igororero rya Nyamagabe bakaba bari bitabye Urukiko Rwisumbuye rwa Muhanga mu kubura ubujurire ku byaha bahamijwe n’Urukiko rw’Ibanze rwa Gacurabwenge.

Me Zitoni Pierre Claver na Me Christophe Niyomugabo basabye inteko yaburanishaga ubujurire bw’abantu babiri bakurikiranyweho icyaha cyo gusenya cyangwa inyubako ku bushake utari nyirayo n’abandi 5 bakurikiranweho ubufatanyacyaha mu gusenya cyangwa konona inyubako ku bushake utari nyirayo ko bakwiye gufungurwa bakaburana ubujurire bari hanze kuko bo bemeza ko bafunzwe mu buryo butemewe n’amategeko.

Me Niyomugabo yagize ati: “Tugendeye ku ngingo ebyiri ziri mu itegeko No 027/2019 ryo ku wa 19/09/2019 ryerekeye imiburanishirize y’Imanza z’Inshinjabyaha mu ngingo ya 143 ivuga ku ifungwa rinyuranyije n’amategeko ndetse n’ingingo y’188 ivuga ku inkurikizi z’ubujurire, turifuza ko abakiriya bacu barekurwa duhereye kuri izi ngingo kuko bigaragara ko abo twunganira bafunzwe mu buryo bunyuranyije n’amategeko tugasaba urukiko kubarekura bakuburana ubujirire bwabo bari hanze.”

Perezida w’Iburanisha amaze kumva inzitizi zitangwa n’abaregwa ndetse n’ababunganira bagendeye ku itegeko ryavuzwe yemeje ko bagiye kwiga ku nzitizi zatanzwe n’abaregwa ndetse n’ababunganira mu mategeko kigira ngo hazatangwe ubutabera bunogeye ababuranyi.

Mu iburana rya mbere, Urukiko rw’Ibanze rwa Gacurabwenge rwari rwahahamije Mutangana Eric na Mukakarangwa Lea icyaha cyo gusenya cyangwa konona inyubako ku bushake utari nyirayo igihano cy’igifungo cy’imyaka itanu n’ihazabu ya miliyoni 5 z’amafaranga y’u Rwanda kuri buri umwe.

Rwemeje ko Maniraguha Damien, Masengesho Leonard, Mukashyaka Jacqueline, Nambazimana Charles, Nsanzimana Pierre, Ntakirutimana Aloys, Niyomugabo Xavier bahanirwa icyaha cy’ubufatanya bahanishwa gufungwa imyaka itatu no gutanga ihazabu ya miliyoni 3 z’amafaranga y’u Rwanda kuri buri wese.

Urukiko kandi rwari rwategetse ko aba bose bagomba kwishyura indishyi zigera kuri miliyoni 8 z’amafaranga y’u Rwanda kubera basenyewe urukuta rwa metero 100.

Hagendewe ku busabe bw’ababuranyi bivugwa ko iyo umuntu asaba kurekurwa by’agateganyo mbere y’uko aburana mu bujurire, umucamanza asuzuma iyi nzitizi akayifatira icyemezo mu minsi itanu.

Biteganyijwe ko umwanzuro ku nzitizi zatanzwe n’ababuranyi n’ababunganira uzasomwa tariki ya 20 Werurwe 2024 saa yine zuzuye (10:00am) za mugitondo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA