Muhanga: Abatuye i Jurwe umuriro ubanyura hejuru bo batawufite

Muhanga: Abatuye i Jurwe umuriro ubanyura hejuru bo batawufite

Imvaho Nshya

October 4, 2023

Abaturage batuye mu Kagali ka Jurwe mu Murenge wa Kibangu barasaba ubuyobozi bw’Akarere ka Muhanga n’Ikigo gikwirakwiza amashanyarazi (REG) kwibuka ko umuriro udakwiye kubanyuraho werekeza ahandi bo batawufite kuko bituma basigara inyuma mu kwiteza imbere mu gihe batawuhawe.

Abo baturage batangarije Imvaho Nshya ko bababazwa no kubona Utugali dukikije akabo twose twarahawe umuriro ukomoka ku ngufu z’amashanyarazi.

Twagiramungu Emmanuel avuga ko hashize imyaka 3 basabye ko bahabwa umuriro ariko bahora batubwira ko tuzawuhabwa mu mwaka uzakurikiraho ariko tugategereza tugaheba ndetse twari dufite uwaduhaga umuriro none yakuyeho ibikoresho bye dusigara mu kizima.

Yagize ati: “Tumaze imyaka ishobora kuba irenga 3 dusaba umuriro bakatubwira ko bazabitekerezaho mu mwaka uzakurikiraho ariko twarategereje turaheba, kugera naho utundi Tugari duturanye natwe dufite amashanyarazi ku buryo twebwe ntawo dufite kandi twahoranye umuntu waduhaga umuriro nawe yaje kwigendera ubu Televiziyo twarazibitse kuko nta kundi twabigenza”.

Rukundo Esdras ni umuturage unacururiza muri aka Kagali avuga ko bibabaje kubona Utugari tundi duturanye twose dufite amashanyarazi akomoka ku muyoboro mugari ariko twebwe twasigaye hagati kandi bitugiraho ingaruka kuko nta mushinga ufatika twakora.

Ati: “Njyewe nsanzwe nkorera aha ubucuruzi ariko kuva umushoramari yatwara amapoto ye n’ibikoresho bye twasigaye ntacyo twakora, tubaza Akarere kati mwebwe mugomba gukoresha amashanyarazi y’imirasire y’izuba. Ubu se ni nde muturage wayibasha kuyigura, ubu se njye nabasha kuyikoresha ku cyuma gikonjesha nagura koko rwose twasanze nta mushinga ufatika twakorera hano, uyagwije arigendera akajya mu mujyi”.

Mukamfizi Martha yatangarije Imvaho Nshya ko kutagira umuriro bibagiraho ingaruka, kuko nta cyuma gisya wahashyira, biragoye ko abana basubira mu masomo cyangwa ngo bakore umukoro mu ijoro.

Ati: “Kutagira umuriro hano bitugiraho ingaruka kuko ntabwo wazana icyuma gisya amasaka cyangwa imyumbati n’ibindi ngo kibone umuriro cyakoresha, kandi abana bacu ntabwo babasha kuba bakora umukoro bahawe na mwarimu kuko haba habaye mu gicuku bityo rero turasaba ko baduha umuriro, tugatekereza byagutse imishinga twakora yaduteza imbere kuko nk’ubu umwana yiyogoshesha akoze urugendo rw’isaha yose”.

Umuyobozi w’Akarere ka Muhanga Wungirije Ushinzwe Iterambere ry’Ubukungu, Bizimana Eric avuga ko iki kibazo cy’abaturage kizwi ariko ubushobozi butaraboneka ariko bateganya kubaha umuriro nibura mu mwaka utaha bishoboka cyane, ariko abafite ubushobozi bashobora gukoresha amatara akomoka ku mirasire y’izuba mu gihe bataragerwaho n’umuyoboro mugari w’amashanyarazi.

Yagize ati: “Ikibazo cy’abaturage batuye i Jurwe kirazwi ariko ntabwo turabasha kubona ubushobozi bwo kubagezaho umuriro, ariko twabonye ko dushobora kubakangurira ko ufite ubushobozi ashobora kugura imirasire y’izuba mu gihe natwe turimo gukusanya ubushobozi bwo kubaha umuyoboro mugari w’amashanyarazi, nibihangane kuko hari n’utundi Tugari natwo turimo gutekerezwa nubwo mu ngengo y’imari y’uyu mwaka bitateganyijwe”.

Akomeza yemeza ko hahoze umushoramari wagiraga uruganda ruto gusa yaje kuvanaho ibikorwa bye ariko kugeza ubu aka Kagali kari muri gahunda y’izindi ngufu. Agasenteri ka Jurwe twatekereje ko twazagashyiramo umuriro kugira ngo abafite ibitekerezo babyagura bakiteza imbere kandi tuzareba niba bishoboka.

Kugeza ubu Akarere ka Muhanga kageze kuri 58.98% bihwanye n’ingo ibihumbi 54,997 mu kwegereza abaturage ingufu harimo ingo ibuhumbi 35,038 bingana na 37.5% bakoresha umuyoboro rusange w’Amashanyarazi.

Ingo ibihumbi 19,959 zingana na 21.4% bakoresha ingufu zikomoka ku mirasire y’Izuba mu gihe muri Gahunda ya Leta y’imyaka 7 ya Guverinoma (NST1) biteganyijwe ko mu 2024 abaturage bazaba bafite mashanyarazi 100%.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA