Muhanga: Inzererezi zibangamiye umutekano mu mujyi

Muhanga: Inzererezi zibangamiye umutekano mu mujyi

Imvaho Nshya

October 26, 2023

Bamwe mu bakorera mu mujyi wa Muhanga barasaba inzego bireba ko hakwiye kugira igikorwa bagashaka igisubizo kirambye ku bana b’inzererezi bakomeje kwiyongera mu mujyi, bakaba babangamira umutekano kuko muri bo harimo n’abiba.

 Mu kiganiro n’Imvaho Nshya bavuga ko abo bana barangwa no kwirirwa basaba abahisi n’abagenzi haba mu gihe cyo kwiga cyangwa mu minsi isanzwe batiga, rimwe na rimwe bakagaragara bafite amacupa ya kore ari nako bashobora gukuza ingeso yo kwiba.

Rukundo Parfait avuga ko bibabaje kubona abana bari mu kigero cy’imyaka 5 kuzamura birirwa bagenda mu mujyi basabiriza ku bahisi n’abagenzi bigatuma twibaza ngo ejo h’iki gihugu haragana he ko hakwiye gutegurirwa muri aba bana.

Yagize ati: “Hano mu mujyi dufite abana b’ikigero cy’imyaka 5 kuzamuka birirwa basaba mu mujyi bakagaragara banywa ibiyobyabwenge bikadutera impungenge kuri ejo hazaza h’Igihugu kuko ntaho turimo kugana kuko aba ni bo bakwiye kuhategurirwa”.

Utetiwabo Francine avuga ko abo bana benshi barara mu mateme ndetse bamwe muri bo banafite ingezo yo kwiba.

Yagize ati: “Aba bana benshi muri bo barara muri aya mateme yo mu mujyi nubwo batangiye kuhatwikira, bafite imyitarire yo kubona amafaranga babahaye bakajya kugura kore ikoreshwa mu gutunganya inkweto bagahita batangira kuyinywa, turembejwe na bo kuko bamwe muri bo baranatwiba, bamwe ni udusambo twiba abahisi n’abagenzi”.

Rugwiza Theogene avuga ko atabona impamvu abo bana bakomeje kwiyongera, Akarere kagombye gushaka umuti urambye.

Ati: “Twebwe ntabwo tuzi impamvu aba bana bakomeje kwiyongera hano mu mujyi ariko ababishinzwe bakwiriye gushaka umuti urambye ntibakomeze kurebera abana b’Igihigu bangirika kandi bakwiye kuba bari ku ishuri, noneho ahubwo bakaza kwiga amayeri y’ubujura bwambura abaturage ku manywa y’ihangu”.

Bamwe muri abo bana babashije kuganira n’Imvaho Nshya bavuga ko baza mu mujyi bahunze amakimbirane yo mu muryango naho abandi bakavuga ko imiryango yabo itababoneye ibikoresho n’imyenda y’ishuri bakarivamo.

Tuyishime na Iradukunda bavuga ko bafite imyaka 11 bemeza ko bavuye iwabo mu murenge wa Shyogwe kubera amakimbirane yarangwaga hagati y’ababyeyi babo bagahora barwana ntibabone ibyo kurya bibahaza.

Yagize ati: “Twebwe twavuye iwacu duhunga amakimbirane y’ababyeyi bacu ntabwo tuva mu muryango umwe twisanze hano mu mujyi tugendana ariko aha n’iyo twaburara bataraye baturwanira hejuru kuko binyweraga inzoga bagasinda ntibamenye ko twanaburaye tubona bidashoboka twiyizira aha gusyaga (gusabiriza no gushaka ibyo barya)”.

Mugisha avuga ko bakomoka mu Murenge wa Muhanga, ajya kuza kuba mu mujyi yabitewe nuko yigaga iwabo bamukura mu ishuri kuko batashoboraga kumubonera ibikoresho.

Yagize ati: “Njyewe mbonye aho kuba hampa amahoro nasubira ku ishuri none se ko iwacu bambwiye ko ntabona amakaye ngo barakennye nari kubigenza nte? Nahisemo kuhava ndagenda niyizira mu mujyi”.

Icyakorwa ngo ubuzererezi buvanweho mu mujyi wa Muhanga

Umuyobozi w’Akarere ka Muhanga wungjrije ushinzwe imibereho myiza y’Abaturage Mugabo Gilbert, avuga ko iki kibazo bagerageje gushaka uburyo bwo kugikemura bagafata abo bana bakaganirizwa ndetse babona ababyeyi babo bagasinyishwa ko bagiye kwita ku bana babo ntibagaruke ariko bidateye kabiri bakagaruka.

Ati: “Nk’umujyi utera imbere uhurirwamo n’abantu benshi ndetse hakaziramo n’abana bo mu Turere dukikije uyu Mujyi wa Muhanga nk’umujyi ukura kandi twebwe iyo dufashe abana tubageza mu miryango ikanaganirizwa ndetse hari n’abo dufasha kubonera ibikoresho bibafasha gusubira mu ishuri bagakurikira amasomo yabo”.

Yibukije ababyeyi ko bakwiye kurera neza abana babo kuko bazaba batanze umusanzu mu kubaka Igihugu cy’ejo hazaza kuko ni bo bazasigarana iki gihugu cyacu dukwiye kubabungabunga neza.

Mu bihe bitandukanye abagize urwego rwunganira Akarere mu mutekano (Dasso) bakunze gufata abana bakajyanwa mu kigo cy’inzererezi kugira ngo bashakirwe imiryango yabo basubizweyo, ariko bidatinze kabiri bakagaruka.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA