Muhanga: Umugabo n’umugore bikekwa ko bicanye bashyinguwe

Muhanga: Umugabo n’umugore bikekwa ko bicanye bashyinguwe

Imvaho Nshya

October 24, 2023

Nyuma yaho umugabo witwa Minani Theogene w’imyaka 48 bikekwa ko yishe umugore we witwa Mujawamaliya Seraphina w’Imyaka 46 mu rukerera rw’itariki ya 22 Ukwakira 2023 na we akiyahura, bombi bashyinguwe mu irimbi rimwe, imiryango isabwa kugabana inshingano ku bana basigaye.

Iyi nkuru yamenyakanye bikekwa ko umugabo yishe umugore we mu ma saa yine n’iminota 20 ku itariki ya 23 Ukwakira 2023 icyo gihe imirambo y’umugabo n’umugore yari yagejejwe  ku bitaro bya Kabgayi itegereje isuzuma.

Bamwe mu batabaye bavuga ko bababajwe n’urupfu rw’abari bagize umuryango bakavuga ko nta kindi kibazo bari bazi bagiranye.

Gahunde Landuard, ni umuturanyi w’abashyinguwe avuga ko batari bazi ikibazo bafitanye kuko bombi batigeze batubwira ikibazo cyabo ko bafitanye ikibazo cy’imibanire”.

Yagize ati: “Njye ndi umuturage uturanye n’aba babyeyi bicanye ariko ntabwo twigeze tumenya amakuru y’urwango rwari hagati yabo kuko bari abantu bacecetse pe”.

Niwemufasha Marie Josee avuga ko byabatunguye kubona inshuti zabo zivutsanya ubuzima batazi ibyo bapfuye, kandi bagiye kurera abana b’umuvandimwe wabo bakundaga bakaba bicanye mu buryo batavuga.

Yagize ati: “Twebwe abaturanyi b’uyu muryango byadutunguye kuko ntabwo twatekerezaga ko izi nshuti zacu zakwamburana ubuzima, ubu dusigaranye inshingano zo kureberera aba bana basigaye kuko bose twabakundaga kandi na bo bakundanaga pe nta kibazo tuzi bagiranaga”.

Umunyamabanga Nshingwabikorwa w’Umurenge wa Muhanga wari uhagarariye ubuyobozi bw’akarere, Nteziyaremye Germain yasabye abaturage baturanye n’imiryango yombi kurenga ibyabaye bakareba neza ibikwiye kubaho bagafasha mu kureberera abana basigaye.

Ati: “Uyu si umwanya mwiza wo kwitana bamwana ku miryango yombi, kuko mugomba gufatanya kureberera abana basigaye kandi tukabafasha kuva muri ibi bibazo”.

Akomeza yibutsa abaturage ko mu gihe babonye ibibazo byatuma habaho kwamburana ubuzima bajya bihutira kubimenyesha inzego zigashaka ibisubizo ku bibazo bigaragara bikwiye kubona ibisubizo.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA