Muhanga: WASAC yashyikirije abarokotse Jenoside amazi meza
Amakuru

Muhanga: WASAC yashyikirije abarokotse Jenoside amazi meza

NTAWITONDA JEAN CLAUDE

July 2, 2022

Mu rwego rwo kwita ku barokotse Jenoside yakorewe Abatutsi mu 1994 no kubaba hafi, WASAC yashyikirije abatuye mu Murenge wa Shyogwe amazi meza, yubatse umuyoboro w’amazi wa metero 500 n’amavomo rusange 2, ndetse inishyurira mituweli abarokotse Jenoside batishoboye 80.

Mu muhango wabaye ku gicamunsi cyo kuri uyu wa 1 Nyakanga 2022, Umuyobozi w’agateganyo wa WASAC, Umuhumuza Gisele n’ Umuyobozi wungirije w’Akarere ka Muhanga ushinzwe ubukungu n’iterambere Bizimana Eric bashyikirije amazi meza abarokotse Jenoside yakorewe Abatutsi batujwe mu Mudugudu wa Rubugurizo, mu Kagali ka Mbare, mu Murenge wa Shyogwe, aho WASAC yabubakiye umuyoboro w’amazi wa metero 500 n’amavomo rusange 2.

Umuyobozi w’agateganyo wa WASAC yavuze ko bazanywe n’igikorwa cyiza cy’urukundo, gusura imiryango y’abarokotse Jenoside yakorewe Abatutsi mu 1994 ngo babagezeho amazi meza.

Umuyobozi mukuru w’agateganyo wa WASAC Umuhumuza Gisele ari kumwe n’Ubuyobozi bw’Akarere ka Muhanga yafunguye ku mugaragaro amavomo y’amazi meza (Foto Nyiraneza j.)

Ati: “Ni igikorwa cyiza cy’urukundo, cy’ubufatanye cyo gushyira hamwe, kumva mugenzi wawe no kumutega amatwi, kugira ngo ibi tubigereho habayeho kubinoza ndetse n’iki gitekerezo tukigaho. Amazi meza ni ubuzima, atuma ucya ku mutima no mu mutwe”.

Umuhumuza yasabye abahawe ayo mazi kubungabunga ibyo bikorwa remezo bakamenya ko ari ibyabo. Yavuze ko hari urubyiruko rwinshi arusaba gukomeza amashuri rukiga.

Yanavuze ko mu ntangiriro za 2023 bazaza kubaka uruganda rushya rw’amazi mu Karere ka Muhanga, kugira ngo umubare w’ababona amazi meza uzazamuke.

Visi Meya Bizimana yashimiye WASAC ibyo bikorwa byiza igejeje ku baturage hagamijwe kubafasha kugera ku mibereho myiza.

Visi Meya Bizimana Eric yashimiye WASAC ibyo bikorwa byiza igejeje ku baturage (Foto Nyiraneza j.)

Yasabye WASAC kuzakora ibishoboka byose kugira ngo Gahunda ya Guverinoma y’imyaka 7 (NST1) mu 2024, ibe igeze ku 100% aho buri muturage azaba afite amazi meza. Bityo yanasabye ko WASAC yafasha Imirenge ikiri hasi mu birebana n’amazi meza ikazamuka.

Uhagarariye Ibuka mu Karere ka Muhanga, Rudasingwa Jean Bosco yashimiye WASAC igikorwa cyo kwegereza abarokotse Jenoside yakorewe Abatutsi mu 1994, amazi meza ndetse no kubishyurira ubwisungane mu kwivuza, ahishyuriwe imiryango 80 mu Murenge wa Shyogwe.

Sibomana Celestin utuye muri uwo Mudugudu wa Rubugurizo wavuze mu izina rya bagenzi be, yashimiye WASAC n’Ubuyobozi bw’Akarere n’Umurenge na IBUKA uburyo babitaho mu buzima bwa buri munsi, bakaba babagejejeho amazi meza.

Ati: “Turabashima cyane ko mwakomeje kutuzirikana, mukaba mutugejejeho amazi meza. Twajyaga tuvoma mu kabande amazi atari meza, mu gihe cy’imvura bwo ugasanga kujyayo byari ikibazo. By’umwihariko noneho ku muntu ukuze bikamugora”.

Yongeyeho ko umuyoboro w’amazi wari waraje ugarukira kuri metero 500 y’aho uwo Mudugudu w’aho batuye, bikaba byasabaga yuko haboneka uwakomeza uwo muyoboro w’amazi ukabageraho.

Sibomana yavuze ko ibyo bikorwa remezo bazakomeza kubibungabunga.

Iki gikorwa cy’umuyoboro wa metero 500 cyuzuye gitwaye amafaranga y’u Rwanda 5,300,000 kandi ayo mavomero abiri azanavomwaho n’abantu bose batuye muri ako gace.

Ibi ni ibikorwa WASAC ikora buri mwaka mu minsi 100 yo Kwibuka Jenoside yakorewe Abatutsi mu 1994. Iki gikorwa cyabanjirijwe no gusura Urwibutso rwa Jenoside yakorewe Abatutsi rwa Kabgayi.

Abaturage bishimiye kwegerezwa amazi kandi bitabiriye ku bwinshi (Foto Nyiraneza J.)
Bacinye akadiho (Nyiraneza J.)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA