Musanze: Abarokotse Jenoside bishimira gahunda y’ubumwe n’ubwiyunge
Amakuru

Musanze: Abarokotse Jenoside bishimira gahunda y’ubumwe n’ubwiyunge

NGABOYABAHIZI PROTAIS

April 11, 2024

Abarokotse Jenoside yakorewe Abatutsi mu mwaka wa 1994, batujwe mu Mudugudu w’Ubumwe n’Ubwiyunge, bavuga ko bishimira gahunda yatekerejwe na Leta y’ubwiyunge na Ndi Umunyarwanda.

Umudugudu w’Ubumwe n’Ubwiyunge wa Susa, Akagari ka Ruhengeri, Umurenge wa Muhoza, Akarere ka Musanze, ugizwe n’abarokotse Jenoside yakorewe Abatutsi mu 1994, abireze bakemera icyaha bakoze muri Jenoside, abahoze ari abacengezi, ndetse n’abahejejwe inyuma n’amateka, bose bavuga ko mu gihe bibuka ku nshuro ya 30, Jenoside yakorewe Abatutsi mu 1994, bishimira ko imibanire mu Banyarwanda igenda irushaho kuba myiza cyane ko ngo bamwe mu barokotse bagiye muri uriya Mudugudu baseta ibirenge.

Bamwe mu barokotse bavuga ko kuri bo ngo gahunda y’ubumwe n’ubwiyunge ari umuti usharira banyoye  mu gihe iyi gahunfda yatangizwaga, ariko ngo baje gusanga ari ngombwa ko bawunywa kandi ngo byatanze umusaruro nk’uko Kabaraza Speciose umwe mu bagize imiryango 20 y’abarokotse wahatujwe ngo yaje yiteguye gupfa

Yagize ati: “Jenoside yaramfakaje, abitwaga Abahutu batwiciye abantu tuba imfubyi n’intwaza, nageze hano numva ko ibyange birangiye, guturana n’abantu baguhigaga, abacengezi, ingabo zahoze ari inzirabwoba zari iza Habyarimana, ahubwo numvaga natura hafi y’umuntu wasezerewe mu ngabo zahoze ari iza RPF Inkotanyi, uko rero bwagiye bucya nagiye nisanzura kuko gahunda y’ubumwe bw’Abanyarwanda yaratubohoye ntanga imbabazi none aya matsinda yose muri Susa tubanye neza.”

Umwe mu bagize uruhare muri  Jenoside yakorewe Abatutsi mu 1994 Habarurema Euphrem avuga ko na we ngo yageze mu Mudugudu w’ubumwe n’ubwiyunge wa Susa, yiteguye guhangana n’abo yiciye.

Yagize ati: “Twese ntihazagire ukubeshya twageze hano mu minsi ya mbere ducengana, nagendaga nigengesereye ntekereza ko bazongera kumfunga, cyangwa se batazihanganira gukomeza kubana nanjye, ariko buhoro buhoro, ubu nakubwira ko abakorewe Jenoside mu 1994, tubanye neza kandi mu gihe cyo kwibuka dukomeza guhozanya no gusabana, ahubwo njye nshimira Perezida Kagame Paul watekereje kongera kubumbira hamwe umuryango nyarwanda, abahemutse n’abahemukiwe tukongera tugaturana.”

Umwe mu bahejejwe inyuma n’amateka Uwimbabazi Chantal nawe avuga ko yumvaga adashaka kuza kubana n’amatsinda yagize uruhare muri Jenoside  ndetse n’abahoze ku rugamba

Yagize ati: “Ni ibintu njyewe numvaga bidashoboka kandi numvaga bidakwiye ko nza kubana n’aba bantu bahiganaga, none se ko twebwe imiryango yacu ntaho yari ibogamiye? Nta bantu twishe ntitwasahuye kudutuza rero na  bo ngo turiyunga byari ibintu bitatworoheye, ariko gahunda ya Ndi Umunyarwanda yaraduhuje bose turasabana, ahubwo twebwe twabyungukiyemo tubigiraho byiza mu bijyanye n’iterambere, turashimira  imiyoborere ya  Perezida Kagame yatekereje iyi gahunda y’ubumwe.”

Umuyobozi w’Akarere ka Musanze Nsengimana Claudien nawe ashimangira ko gahunda y’ubumwe n’ubwiyunge ari kimwe mu byatumye u Rwanda rurushaho kwiyubaka, kandi ngo kuri we Abanyarwanda birakwiye ko baturana batishishanya.

Yagize ati: “Gahunda yo gutuza Abanyarwanda harimo n’abagize uruhare muri Jenoside yakorewe Abatutsi mu 1994 ndetse abarokotse  byatangiye koko ubona ko bitazapfa gushoboka, ariko kubera gahunda nziza y’imiyoborere myiza byarashobotse, kandi bitanga igisubizo cyiza, aho usanga abari bafitanye inzigo ari bo batabarana, kandi ni Abanyarwanda beza, ubu abarokotse Jenoside ni bamwe rwose usanga barateye intambwe ikomeye kuko, ubu basabana rwose n’ababagiriye nabi ndabashimira kandi nsaba abo bose gukomeza guturana neza.”

Kugeza ubu abo mu Mudugudu w’Ubumwe wa Susa, bishimira ko bagenda batera imbere aho bamaze kubakirwa umuhanda wa Kaburimbo Kalisimbi –Nyamagumba, bafite umuriro w’amashanyarazi n’amazi, ngo mu gihe bo batujwe hariya bumva ko bazanywe mu mashyamba, aho bamwe mu barokotse bavuga ko bazahicirwa nanone, ubu bakaba bariteje imbere bakora ibikorwa binyuranye birimo ubucuruzi n’ubukorikori bunyuranye.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA