Musanze: Abishyuwe na kampani y’isuku GUMA LTD barashima ubuvugizi bakorewe
Amakuru

Musanze: Abishyuwe na kampani y’isuku GUMA LTD barashima ubuvugizi bakorewe

NGABOYABAHIZI PROTAIS

April 18, 2024

Abakora isuku mu mujyi wa Musanze bari bamaranye ikibazo amezi 3 badahembwa na kompanyi yitwa GUMA LTD, kuri ubu baravuga ko nyuma y’iminsi ibiri gusa Imvaho Nshya ivuganye n’iyi kompanyi ndetse n’Ubuyobozi bw’Akarere bahise babona amafaranga yabo bakoreye yose.

Umwe mu bavuganye n’Imvaho Nshya yavuze ko ngo icyizere kuri bo cyo kubonera rimwe amafaranga bakoreye hadasigayeyo ibirarane cyari cyarayoyotse nk’uko Mukamabano Ancille abivuga.

Yagize ati: “Kuri ubu turishimye twari twarabuze uruvugiro kugeza ubwo wavugaga ko utari wahembwa bakakureba nabi cyangwa se bakaba bakwirukana, kuri ubu rero njye barampembye rwose kandi icyo nshima ni uko bampembye amafaranga y’amezi yanjye yose uko ari atatu, turashimira buri wese wabigizemo uruhare ngo tube twahembwa kuko icyizere cyari cyayoyotse”.

Aba bakozi bibaza impamvu abakoresha babo barindira kubahemba binyuze mu zindi nzego.

Ruzambirabahizi umwe mu bakozi bari baberewemo ibirarane yagize ati: “Ariko kuki umukoresha wawe arindira ko ubanza gutakamba ku burenganzira bwawe ubu koko umunyamakuru atabonetse, Meya ngo nawe aze akore ubuvugizi ntiwahembwa koko!

Yongeyeho ati: “Tekereza amafaranga nkorera ku munsi na bosi nta n’igikombe cye kimwe cy’icyayi kuko 1000 urabyumva nticyamuhaza, ariko njye ugikorera kugira ngo mpembwe bikansaba kwitabaza itangazamakuru koko! Mwarakoze ubu twarahembwe kandi twijejwe ko bitazongera”.

Uyu mugabo yavuze ko iki kibazo cyo guhembwa habanje kwiyambazwa itangazamakuru ku bakora isuku mu karere ka Musanze atari ubwa mbere kibaye.

Yagize ati: “Umwaka ushize nabwo kugira ngo duhembwe byadusabye ko abanyamakuru babisakuza, twari tuzi ko nibura iki kibazo kitazagaruka ariko ubwo GUMA LTD yabitwijeje reka turebe ukwezi gutaha”.

Aba bakozi icyakora ntibabura kwishimira ko guhera muri Mata 2024 bazajya bakorera amafaranga 1500 ku munsi.

Umuyobozi wungirije wa Kompanyi GUMA LTD ushinzwe ibikorwa Rwakigarama William, avuga ko na bo gutinda guhemba bariya bakozi, byatewe nuko Akarere ka Musanze kari kanze gushyira amafaranga kuri konti yabo, ariko nyuma y’aho baboneye amafaranga bahise bahemba abakozi, kandi na we avuga ko yishimiye ubufatanye ku buvugizi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA