Musanze: Amatsinda y’abagore yahawe inkunga ya miliyoni 10 Frw
Amakuru

Musanze: Amatsinda y’abagore yahawe inkunga ya miliyoni 10 Frw

Imvaho Nshya

October 16, 2023

Abagore bibumbiye mu matsinda 10 bo mu Karere ka Musanze bahawe igishoro cya miliyoni 10 z’amafaranga y’u Rwanda n’Umuryango wita ku bidukikije n’iterambere ry’umuturage uturiye Ikirunga cya Sabyinyo (SACOLA), mu rwego rwo gukomeza kubashyigikira mu bikorwa byabo byo kwiteza imbere.

Iyo nkunga bayihawe ku wa 15 Ukwakira, ubwo u Rwanda rwifatanyaga n’Isi yose mu kwizihiza Umunsi Mpuzamahanga w’Umugore wo mu cyaro.

Iradukunda Ernestine wo mu Murenge wa Nyange akaba abarizwa mu itsinda Urukundo yabwiye Imvaho Nshya ko bagiye kuyibyaza umusaruro.

Yagize ati: “Iyi nkunga duhawe na SACOLA, turishimye cyane kuko ibi ni bimwe mu bigaragaza ko imiyoborere yacu irangajwe imbere na Paul Kagame yazamuye iterambere ry’umugore. Iyi nkunga rero twe tugiye kuyibyaza umusaruro twongere igishoro dukomeze kwiteza imbere, mu mirimo inyuranye dukora aya mafaranga ntabwo ari ayo kurya ahubwo tugiye kuyashora mu mishinga. Nkanjye nkora ubucuruzi bw’ibiribwa ngiye kongeramo ibindi bicuruzwa”.

Iradukunda Ernestine akomeza avuga ko abagore bakwiye kwibumbira mu mashyirahamwe ngo kuko ari kimwe mu bizatuma bakomeza kwiteza imbere.

Yagize ati: “Hari bamwe mu bagore usanga bacyitinya bakaguma mu rugo ngo ntibabona uburyo bwo kujya mu matsinda bo baba bazi ko abari mu matsinda bafite bose baba bafite amafaranga menshi, nka twe twatangiye dutanga amafaranga 300 mu cyumweru urumva ko ni amafaranga 50 ku munsi, none tugeze ku mafaranga asaga ibihumbi 900 kuri konti.

Yakomeje abashishikariza gutinyuka kwegera abandi kuko ari ho ibitekerezo byubaka biva.

Nyirabatware Speciose wo mu itsinda Abahujintego avuga ko acuruza imbuto y’ibirayi. Agiye kongera igishoro ndetse na bagenzi be bongere umubare w’amatungo magufi.

Yagize ati: “Buriya abagize itsinda ntabwo bose baba bakora bimwe ariko intego aba ari imwe yo kwizigamira, ubu rero njye ngiye kongera igishoro nzamure ubucuruzi bwanjye, kimwe na bagenzi banjye na bo borora bongere umubare w’amatungo yabo. Ntabwo ari ubwa mbere iyi SACOLA intera inkunga kuko banyubakiye n’inzu yari igiye kungwaho, ndashimira rero Perezida Kagame washyizeho gahunda y’uko Abanyarwanda bifite bazamura bagenzi be n’ibyo rero na SACOLA yakoze uyu munsi”.

Uwamahoro Immaculee uhagarariye Inama y’Igihugu y’Abagore mu Murenge wa Kinigi, mu izina ry’Akarere yavuze ko ashimira ubuyobozi buzirikana abaturage b’igihugu ndetse bukanashishikariza abifite kuzamura abakiri mu nzira y’amajyambere.

Yagize ati: “SACOLA ihaye inkunga amatsinda y’abagore bo mu Mirenge ya Kinigi na Nyange kugira ngo bakomeze ubushabitsi bwabo iki ni igikorwa cy’ingirakamaro, ndasaba ko abahawe iyi nkunga kimwe n’aborojwe inkoko gukomeza kubibyaza umusaruro. Ntabwo iyi nkunga ari iyo kurya cyangwa se kuguramo imyenda nk’uko bamwe bajya babigenza, ndabasaba gucunga neza ibyo muhawe bikazabungukira. Nshimira imiyoborere myiza twagejejweho na Perezida Kagame wakuye umugore mu gikari akamuha ijambo”.

Umuyobozi wa SACOLA Nsengiyumva Pierre Celestin, yavuze ko igikorwa nk’iki cyo kuremera amatsinda y’abagore agera ku 10, ari mu rwego rwo kugira ngo babafashe kwiteza imbere.

Yagize ati: “Twahaye inkunga amatsinda y’abagore agera ku 10, aya rero akaba akora n’ibimina twabanje kubahugura, turabasura kandi tubafitiye icyizere kuko twasanze uburyo bacunga ibimina dusanga rero bikwiye ko n’inkunga twabaha byababyarira umusaruro bagiye bayashora mu bushabitsi bwabo.

Si ibyo gusa kandi kuko tworoje inkoko 300, abagore bapfakajwe na Jenoside zifite agaciro ka miliyoni imwe n’ibihumbi 600 turabasaba kubyaza umusaruro ibyo tubahaye n’inkunga”.

Hari byinshi abaturage bashimira uyu Muryango SOCOLA harimo kububakira amashuri, amavuriro aciriritse amavomo, kimwe no kubabakira inzu zo kubamo hiyongereyeho no kubafasha mu bworozi bw’amatungo magufi n’amaremare.

Florence Mukarusanga, Umuhuzabikorwa w’Agateganyo w’Inama y’Igihugu y’Abagore mu Karere ka Rutsiro, yavuze ko mu bikibangamiye umugore wo mu cyaro muri aka Karere harimo ikibazo cy’abangavu baterwa inda, abagore bake bishora mu businzi, amakimbirane yo mu ngo n’ubukene.

Akarere ka Rutsiro ku bufatanye n’umwe mu bafatanyabikorwa mu iterambere ry’Akarere, bafashije abagore batishoboye gukora imishinga iciriritse bahabwa igishoro cy’amafaranga y’u Rwanda 150 000 buri umwe abandi, buri umwe agenerwa amatungo magufi byo kubafasha kwivana mu bukene.

Mukarugira Beatha, umuhinzi wo mu Mudugudu wa Sanzari, Akagari ka Kabuga, Umurenge wa Mukura yavuze ko hari byinshi yakeneraga ntabashe kubibona.

Uyu mugore wahisemo umushinga wo gucuruza imboga n’imbuto nyuma yo kubona ko mu gace atuyemo nta bantu benshi babikora kandi bikenewe cyane, afite intego y’uko amafaranga yahawe niyunguka azaguramo itungo kugira ngo ajye abona ifumbire imufashe kongera umusaruro w’ubuhinzi.

Ati “Aya mafaranga y’igishoro bampaye icyo azamfasha ni uko nanjye ninzajya nkenera isabune, amavuta nzajya mbasha kubyigurira bitabaye ngombwa ko byose mbisaba umugabo wanjye.”

Nyinawingeri Nzabirinda Seraphine, watoranyijwe mu bagore batishoboye bahawe amafaranga y’u Rwanda 50 000 yo kuguramo amatungo magufi yavuze ko nta tungo yagiraga.

Uwo mugore w’imyaka 51 yavuze ko kutagira itungo byatumaga yishyura 30 000Frw buri gihembwe cy’ihinga kugira ngo abone ifumbire yo guteza ibirayi, ibigori n’ibindi.

Ati: “Aya mafaranga 50 000 nzaguramo ihene ebyiri, kugira ngo zijye zimfasha kubona ifumbire yo guhingisha bitabaye ngombwa ko nyigura, ningira n’iyo ngura ijye iza ari iyo kunganira iyo nakuye ku bworozi bw’ihene.”

Umunyamabanga Nshingwabikorwa w’Akarere ka Rutsiro Bagirishya Pierre Claver, yavuze ko gahunda yo gufasha abatishoboye kuva mu bukene izwi nka ‘graduation strategy’ ari yo yatumye bahuza Umunsi Mpuzabamahanga w’Umugore wo mu Cyaro no guha ubufasha abagore batishoboye.

Ati: “Byagaragaye ko umugore ari we shingiro ry’iterambere, ni yo mpamvu twifuje kuremera aba bagore kugira ngo turusheho kubaka umuryango.”

Bagirishya yasabye abahawe ubufasha kubukoresha neza kugira ngo bateze imbere imiryango yabo, bateze imbere igihugu muri rusange ariko n’Akarere kabo by’umwihariko.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA