Musanze: Ba Mutimawurugo basabwe kwitinyuka
Imibereho

Musanze: Ba Mutimawurugo basabwe kwitinyuka

Imvaho Nshya

October 13, 2023

Mu Nteko y’Inama Rusange y’Inama y’Igihugu y’Abagore mu Ntara y’Amajyaruguru yabereye mu Karere ka Musanze, ba Mutimawurugo basabwe kurushaho kwitinyuka kugira ngo bagire uruhare runini mu iterambere, ibyo  bikubaka umuryango utekanye kandi ushoboye.

Iyo nama yari igamije kuganira ku ruhare rwa Mutimawurugo mu kubaka Umuryango ushoboye kandi utekanye, usigasira ubumwe bw’Abanyarwanda.

Umunyamabanga Nshingwabikorwa w’Intara y’Amajyaruguru Nzabonimpa Emmanuel yashimiye Leta y’u Rwanda yasubije agaciro umugore ndetse anashimira abagore uko babyitwaramo kuko n’intambwe bamaze gutera muri urwo rwego ibigaragaza.

Yagize ati: “Ndashimira Leta y’u Rwanda yahaye agaciro abari n’abategarugori kuko hariho imyumvire yahize ishingiye ku muco yatumaga abagore basa n’abatisanzura mu kugira uruhare mu iterambere ry’umuryango.

Kuri ubu abagore baritinyutse, bafite uburenganzira bwo kugaragaza no gutanga ibitekerezo byabo, nta murimo n’imwe bahejwemo, bakagira uruhare mu iterambere ryabo n’Igihugu muri rusange,bityo bakubaka umuryango utekanye”.

Nzabonimpa yasabye abitabiriye inama gukomeza kuba umusemburo wo kubaka umuryango mwiza, ushoboye kandi utekanye, barushaho kugira uruhare mu guhindura bagenzi babo bafite ingeso mbi, kurwanya amakimbirane mu miryango, kurwanya imirire mibi n’igwingira.

Kugira uruhare mu guca ubuzererezi bw’abana, gusubiza mu ishuri abana baritaye, kurwanya ihohoterwa rikorerwa abangavu, kurwanya ubusinzi n’ibiyobyabwenge, kurwanya ubushoreke n’ubuharike, kwimakaza umuco w’isuku n’ibindi.

Uhagarariye ba Mutimawurugo  mu Ntara y’Amajyaruguru yatangaje ko umugore ukora akagira uruhare mu mibereho ye ya buri munsi bituma umuryango utera imbere, ukugira, ibyo bigatuma urangwamo umutekano.

Umunyamabanga Nshingwabikorwa w’Intara y’Amajyaruguru yabasabye kandi kwitinyuka no gukora neza inshingano batorewe, gushishikariza inzego zatowe gufatanya n’inzego zisanzweho gukemura ibibazo bihari, kubumbatira ubumwe bw’Abanyarwanda no kurwanya icyo ari cyo cyose cyabubangamira.

Abitabiriye inama banagejejweho  ibikorwa byakozwe n’Inama y’Igihugu y’abagore mu Ntara y’Amajyaruguru mu mwaka wa 2022/2023, birimo koroza inka n’amatungo magufi imiryango itishoboye, kubakira inzu abatishoboye, gukangurira abagore kwiga imyuga, gukorana n’Ibigo by’imari, n’ibindi.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA